ନାକେଦମ୍ କଲାଣି ବର୍ଷା ; କେଉଁଠି କେଞ୍ଚାଏ ତ କେଉଁଠି ମେଞ୍ଚାଏ

କନକ ବ୍ୟୁରୋ : ସାରା ରାଜ୍ୟକୁ କଲବଲ କରୁଛି ବର୍ଷା । କେଉଁଠି ଲଗାଣ ବର୍ଷା ତ ଆଉ କେଉଁଠି ନିଅଣ୍ଟିଆ । କେଉଁଠି ବନ୍ୟା ପରିସ୍ଥିତି ତ ଆଉ କେଉଁ ଆସନ୍ନ ଗଜା ମରୁଡ଼ି ଆଶଙ୍କା । ଓଡ଼ିଶାର ଲୋକଙ୍କୁ ନାକେଦମ୍ କରିଛି ମୌସୁମୀ । ବଲାଙ୍ଗୀର ଓ ପୁରୀ ଜିଲ୍ଲାରେ ବର୍ଷା ଉଭାନ ହୋଇଯାଇଛି , ପେଷି ହେଉଛନ୍ତି ଚାଷୀ । କେବେ ବର୍ଷା ହେବ, ବିଲରେ ଧାନ ତଳି ରୁଆ ହେବ, ତାକୁ ଅପେକ୍ଷା କରି ରହିଛି ଚାଷୀକୁଳ।

ବଲାଙ୍ଗୀର ଜିଲ୍ଲାର ବଙ୍ଗୋମୁଣ୍ଡା ଓ ତୁରେକେଲା ବ୍ଲକରୁ ଉଭାନ ହୋଇଯାଇଛି ମୌସୁମୀ । ବିଲରେ ଧାନ ଚାଷ ପାଇଁ ପାଣି ନାହିଁ। ବିଲ ଶୁଖିଲା ପଡ଼ିଛି । ଧାନ ତଳି ରୁଆ ହୋଇପାରୁନାହିଁ । ପାଣି ଅଭାବରୁ ତଳି ନଷ୍ଟ ହେଉଛି। ଖରିଫ ଧାନଚାଷ ପାଇଁ ସାର ଦେଇ ଜମିକୁ ପ୍ରସ୍ତୁତ କରିବା ପାଇଁ ବର୍ଷା ନିହାତି ଆବଶ୍ୟକ । ହେଲେ ଜୁଲାଇ ସରିଲାଣି ହେଲେ ବର୍ଷାର ଅଭାବ ପାଇଁ ଧାନ ତଳି ପ୍ରସ୍ତୁତ କରି ଚାଷୀ ହାତ ବାନ୍ଧି ବସିଛି । 

ବଙ୍ଗୋମୁଣ୍ଡା ଓ ତୁରେକେଲା ବ୍ଲକ ମରୁଡ଼ି ପ୍ରଭାବିତ ଅଞ୍ଚଳ । ଏହି ୨ଟି ବ୍ଲକରେ ଜଳସେଚନର ବିଶେଷ ସୁବିଧା ନାହିଁ । ଅନ୍ୟପଟେ ଜଳସେଚନ ବିଭାଗକୁ କହି ଚାଷ ଜମିକୁ ପାଣି ଯୋଗାଇ ଦିଆଯିବ ବୋଲି କହିଛନ୍ତି ଟିଟିଲାଗଡ଼ ଅତିରିକ୍ତ ଜିଲ୍ଲା କୃଷି ଅଧିକାରୀ । ଚଳିତ ବର୍ଷ ମୌସୁମୀ ସଅଳ ଆସିଥିବାରୁ ଚାଷୀ ଉତ୍ସାହିତ ଥିଲେ । ଭଲ ଫସଲ ହେବା ନେଇ ଆଶା ରଖିଥିଲେ । ହେଲେ ନିଅଣ୍ଟିଆ ବର୍ଷା, ଚାଷୀଙ୍କୁ ହତାଶ କରୁଛି ।