ବର୍ଷାରେ ଭାଙ୍ଗିଗଲା ଘର ; ସାହାରା ଖୋଜୁଛନ୍ତି କୁଚିଣ୍ଡାର ଅସହାୟ ପରିବାର

କନକ ବ୍ୟୁରୋ : ଚଳିତ ଥର ହୋଇଥିବା ଲଗାଣ ବର୍ଷା ଆଣିଦେଇଛି ଅନେକଙ୍କୁ ଦୁଃଖ । ବନ୍ୟା ଆସିଲା, ଛାଡ଼ି ବି ଗଲା ହେଲେ ଅନେକଙ୍କୁ ବେସାହାରା କରିଦେଲା । କାହାର ଘର ଭାଙ୍ଗି ଯାଇଛି ତ ଆଉ କାହାର ସର୍ବସ୍ୱ ମାଟିତଳେ ରହିଯାଇଛି । ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡରେ ବ୍ୟାପକ କ୍ଷତି କରିଛି ବର୍ଷା । କୁଚିଣ୍ଡା ଓ ବାମରା ବ୍ଲକରେ ଭାଙ୍ଗିଛି ଶହଶହ କଚ୍ଚା ଘର । ବାସହରା ହୋଇ କିଏ ପଲିଥିନ ତଳେ ରହୁଛି ତ ଆଉ କିଏ ବାର ଦୁଆର ବୁଲୁଛନ୍ତି । ସାହାରା ଖୋଜୁଛନ୍ତି କୁଚିଣ୍ଡା ବ୍ଲକ ବକ୍ସମା ପଞ୍ଚାୟତର ବୃଦ୍ଧ ଦମ୍ପତି । ବର୍ଷାରେ ଘର ଭାଙ୍ଗି ଯାଇଛି । ପ୍ରଶାସନ ସେମାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଇଛି । ସେହିଭଳି ଦୟନୀୟ ସ୍ଥିତିରେ ଅଛନ୍ତି ହାଲକାପଡ଼ାର ଏହି ବୃଦ୍ଧ ଦମ୍ପତି । ଘର ଭାଙ୍ଗିଯିବା ପରେ ପରଘରେ ଆଶ୍ରୟ ନେଇଛନ୍ତି । ଆଉ ପ୍ରାଶାସନିକ ସହାୟତାକୁ ଚାହିଁ ବସିଛନ୍ତି । 

କେବଳ ରଜନୀ ପିଙ୍ଗ କି ନାରାୟଣ ପ୍ରଧାନ ବେସାହାରା ହୋଇଛନ୍ତି ତା’ନୁହେଁ, ତାଙ୍କ ଭଳି ଅନେକ ପରିବାରର ହାଲ ବେହାଲ କରିଛି ବର୍ଷା । ଏବେ ସେମାନେ ସରକାରୀ ସାହାଯ୍ୟ ଓ ସହଯୋଗ ଅପେକ୍ଷାରେ । ଅନ୍ୟପଟେ ବନ୍ୟା କ୍ଷତିଗ୍ରସ୍ତ ଅଞ୍ଚଳ  ବୁଲି ଦେଖିବା ସହ ସବୁ ଆନୁଷଙ୍ଗିକ ବ୍ୟବସ୍ଥା କରୁଥିବା କହିଛନ୍ତି ବିଡିଓ । ସେପଟେ ଅନେକ ସ୍ଥାନରେ ପ୍ରାଶାସନିକ ବାବୁ କ୍ଷତିଗ୍ରସ୍ତ ପରିବାରଙ୍କୁ ଭେଟି ନଥିବା ଅଭିଯୋଗ ହୋଇଛି ।