ଗ୍ୟାସ ସିଲିଣ୍ଡର ଫାଟି ଜଳିଗଲା ଘର; ୩ ଗୁରୁତରଙ୍କୁ ଭୁବନେଶ୍ୱର ଏମ୍‌ସ ସ୍ଥାନାନ୍ତର

କନକ ବ୍ୟୁରୋ : ମଧ୍ୟରାତିରେ ଘରେ ଗ୍ୟାସ ସିଲିଣ୍ଡର ବିସ୍ଫୋରଣ । ତିନି ଗୁରୁତରଙ୍କୁ ଏମସ୍‌କୁ ସ୍ଥାନାନ୍ତର କରାଯାଇଛି । ଅନୁଗୁଳ ନାଲକୋ ନଗର ଥାନା ଅନ୍ତର୍ଗତ କୁଲାଡ ଗାଁର ବ୍ରାହ୍ମଣୀ ଦେବୀ ପୀଠ ସମ୍ମୁଖ ଏକ ଅଜବେଷ୍ଟ ଘର ଭିତରେ ମଧ୍ୟ ରାତ୍ରୀରେ ଗ୍ୟାସ ସିଲିଣ୍ଡର ବିସ୍ଫୋରଣ ହୋଇଛି । ରାତିରେ ଖାଇ ପିଇ ସମସ୍ତେ ଶୋଇଥିବା ବେଳେ ହଠାତ୍ ରାତି ସାଢ଼େ ଗୋଟାଏରେ ପ୍ରଚଣ୍ଡ ବିସ୍ଫୋରଣ ଶବ୍ଦ ଶୁଭିଥିଲା । ବିସ୍ଫୋରଣର ତୀବ୍ରତା ଏତେ ଭୟଙ୍କର ଥିଲା ଯେ ତିନୋଟ ଘରର ଆଜବେଷ୍ଟସ ଛପର ସଂପୂର୍ଣ୍ଣ ଉଡ଼ିଯାଇଥିଲା ।

ଘରର ଆସବାବପତ୍ର ହୁତୁହୁତୁ ହୋଇ ଜଳୁଥିଲା । ଜୀବନ ବିକଳରେ କୌଣସିମତେ ପରିବାର ଲୋକ ଘରୁ ବାହାରକୁ ଆସିଥିଲେ । ବିସ୍ଫୋରଣ ଶବ୍ଦ ଶୁଣି ପାଖରେ ଥିବା ଢାବା କର୍ମଚାରୀ ମହାନତା ଦେଖାଇ ଆହତ ପରିବାରଙ୍କୁ ସ୍ଥାନୀୟ ନାଲକୋ ଡାକ୍ତର ଖାନାକୁ ପଠାଇ ଦେଇଥିଲେ । ସେଠାରେ ପ୍ରାଥମିକ ଚିକିତ୍ସା ପରେ ତିନି ଗୁରୁତରଙ୍କୁ ଏମ୍ସ ସ୍ଥାନାନ୍ତର କରାଯାଇଛି ।