ପାରାଦୀପ ମାଛଧରା ବନ୍ଦରରେ ଭୟାବହ ଅଗ୍ନିକାଣ୍ଡ : ୧୭ରୁ ଅଧିକ ବୋଟରେ ନିଆଁ

କନକବ୍ୟୁରୋ : ପାରାଦୀପ ମାଛଧରା ବନ୍ଦରରେ ଭୟାବହ ଅଗ୍ନିକାଣ୍ଡ। ହୁତୁହୁତୁ ହୋଇ ଜଳିଗଲା ୧୭ଟି ମାଛଧରା ବୋଟ। କୋଟିଏରୁ ଅଧିକ ଟଙ୍କାର ସମ୍ପତ୍ତି ପୋଡ଼ି ପାଉଁଶ ହୋଇଯାଇଛି ।  ଗତକାଲି ରାତିରେ ବନ୍ଦର ଜେଟିରେ ଥିବା ବୋଟ୍‌ରେ ନିଆଁ ଲାଗି ଗୋଟିଏ ପରେ ଗୋଟିଏ ବୋଟ୍ ଜଳିଯାଇଛି ।   ରୋଷେଇ ବେଳେ ନିଆଁ ଲାଗିଥିବା ସନ୍ଦେହ କରାଯାଉଛି ।  ତେବେ ବୋଟ୍‌ରେ ଥିବା ଗ୍ୟାସ୍ ସିଲିଣ୍ଡର ସବୁ ବିସ୍ଫୋରଣ ଘଟି ନିଆଁ ଅଧିକ ବ୍ୟାପିଥିଲା  । 

ସିଲିଣ୍ଡର ବିସ୍ଫୋରଣ ଏଭଳି ଥିଲା ଯେ, ସମ୍ପୂର୍ଣ୍ଣ ଅଞ୍ଚଳ ଥରି ଉଠିଥିଲା। ନିଆଁ ଲିଭାଇବାରେ ୧୩ଟି ଦମକଳ ବାହିନୀ ନିୟୋଜିତ ହୋଇଥିଲେ। ଘଟଣାରେ ଜଣେ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି  ।   

ସୂଚନା ଅନୁସାରେ ଗତକାଲି ରାତି ପ୍ରାୟ ସାଢ଼େ ୭ଟା ସମୟରେ ପ୍ରଥମେ ନିଆଁ ଲାଗିଥିଲା  । ୧ ନମ୍ବ ଜେଟିରେ ଥିବା ପିତାମାତାଙ୍କ ଆଶୀର୍ବାଦ ନାମକ ବୋଟ୍‌ରୁ ନିଆଁ ଲାଗିଥିଲା ।  ପରେ ଏହା ଗୋଟିଏ ପରେ ଗୋଟିଏ ବୋଟ୍‌କୁ ବ୍ୟାପିଥିଲା  ।  ମାଛଧରା ବୋଟ୍‌ରେ ଥିବା ଗ୍ୟାସ୍ ସିଲିଣ୍ଡର ପାଇଁ ନିଆଁ ଭୟଙ୍କର ଭାବେ ବ୍ୟାପିଥିଲା। ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ, ୩,୪ କିଲୋମିଟର ଦୂରରୁ ନିଆଁ ଦେଖାଯାଉଥିଲା ।