ନର୍ଥ ବ୍ଲକରୁ ଖାଲି ହେଉଛି ଗୃହ ମନ୍ତ୍ରାଳୟ; ଜାଣନ୍ତୁ, କେଉଁଠି ରହିବ ନୂଆ ଅଫିସ୍?

କନକ ବ୍ୟୁରୋ: ନର୍ଥ ବ୍ଲକରୁ ଖାଲି ହେଉଛି ଗୃହ ମନ୍ତ୍ରାଳୟ । ରାୟସିନା ହିଲ୍ ସ୍ଥିତ ବ୍ରିଟିଶକାଳର ନର୍ଥ ବ୍ଲକ କୋଠାରୁ ଗୃହ ମନ୍ତ୍ରାଳୟକୁ ସିସିଏସ୍-୩ ଭବନକୁ ସ୍ଥାନାନ୍ତର କରିବା ପ୍ରକ୍ରିୟା ଆରମ୍ଭ ହୋଇଛି । ଖୁବଶୀଘ୍ର ଦେଶର ଗୃହ ମନ୍ତ୍ରାଳୟ ଇଣ୍ଡିଆ ଗେଟ ପାଖ କର୍ତ୍ତବ୍ୟ ପଥରେ ଥିବା ସିସିଏସ୍-୩ ଭବନରୁ କାର୍ଯ୍ୟ ଆରମ୍ଭ କରିବ । ଯାହାକି କେନ୍ଦ୍ର ସରକାରଙ୍କ ସେଣ୍ଟ୍ରାଲ ଭିଷ୍ଟା କାର୍ଯ୍ୟକ୍ରମର ଅଂଶବିଶେଷ ।

ବୁଧବାର କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ ଏବଂ କିଛି ସହ ସଚିବ ଏବଂ ଅତିରିକ୍ତ ସଚିବ ସ୍ତରର ଅଧିକାରୀ ତାଙ୍କ କର୍ମଚାରୀଙ୍କ ସହିତ ନୂଆ ସିସିଏସ୍-୩ ଭବନକୁ ସ୍ଥାନାନ୍ତର ହୋଇଛନ୍ତି । ଖୁବଶୀଘ୍ର ଅନ୍ୟ କର୍ମଚାରୀମାନେ ମଧ୍ୟ ନୂଆ କାର୍ଯ୍ୟାଳୟକୁ ସିଫ୍ଟ ହେବେ ବୋଲି ସୂଚନା ରହିଛି । ତେବେ ଦେଶର ଗୃହମନ୍ତ୍ରୀ ଅମିତ ଶାହାଙ୍କ କାର୍ଯ୍ୟାଳୟ ଏବେ ସ୍ଥାନାନ୍ତରିତ ହୋଇନି, ଏବେ କେବଳ ସ୍ଥାନାନ୍ତର ପାଇଁ ପ୍ରକ୍ରିୟା ଆରମ୍ଭ ହୋଇଛି ।

୯୦ ବର୍ଷ ଧରି ନର୍ଥ ବ୍ଲକରେ ଥିଲା ଗୃହ ମନ୍ତ୍ରାଳୟ

ଦୀର୍ଘ ୯୦  ବର୍ଷ ହେଲା ନର୍ଥ ବ୍ଲକରେ କାର୍ଯ୍ୟ କରି ଆସୁଥିଲା ଦେଶର ଗୃହ ମନ୍ତ୍ରାଳୟ । ହେଲେ ସେଣ୍ଟ୍ରାଲ ଭିଷ୍ଟା କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସହିତ ଗୃହ, ଅର୍ଥ, ପ୍ରତିରକ୍ଷା ଏବଂ ବିଦେଶ ମନ୍ତ୍ରାଳୟ ପାଇଁ କାର୍ଯ୍ୟାଳୟ ନିର୍ମାଣ କରାଯାଇଥିଲା । ଯାହା ପରେ ଏବେ ଏହାର ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହୋଇଛି । ସରକାରଙ୍କ ଯୋଜନା ମୁତାବକ, କାର୍ଯ୍ୟାଳୟ ଖାଲି ହେବା ପରେ, ନର୍ଥ ବ୍ଲକ୍ ଏବଂ ସାଉଥ୍ ବ୍ଲକରେ ଗୋଟିଏ ବିଶାଳ ସଂଗ୍ରହାଳୟ ତିଆରି କରାଯିବ । ଯାହାକି ୧.୫୫ ଲକ୍ଷ ବର୍ଗ ମିଟରରେ ପରିବ୍ୟାପ୍ତ ରହିବ । ଏହା ୯୦୦ ରୁମ୍ ବିଶିଷ୍ଟ ବିଶ୍ୱର ସବୁଠୁ ବଡ଼ ସଂଗ୍ରହାଳୟରୁ ଗୋଟିଏ ହେବ ।

ସିସିଏସ୍-୩ କୋଠାରେ ଗୃହ ମନ୍ତ୍ରାଳୟ ସହିତ ବିଦେଶ ମନ୍ତ୍ରାଳୟ, ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ, ଗ୍ରାମୀଣ ବିକାଶ ମନ୍ତ୍ରାଳୟର ମଧ୍ୟ କାର୍ଯ୍ୟାଳୟ ରହିବ ।