ବଢୁଛି ମଣିପୁରରେ ହିଂସା ଆକ୍ସନ ମୋଡରେ ଗୃହମନ୍ତ୍ରୀ । ଆଜି ଗୁରୁତ୍ବପୂର୍ଣ୍ଣ ବୈଠକରେ ହେବ ଆଲୋଚନା

କନକବ୍ୟୁରୋ : ମଣିପୁରରେ ପୁଣି ଉତ୍ତେଜନା। ଇମ୍ଫାଲରେ ବିଜେପି ବିଧାୟକ କଙ୍ଗଖାମ୍ ରବିନ୍ଦୋଙ୍କ ପୈତୃକ ବାସଭବନରେ ଶନିବାର ଉତ୍ତ୍ୟକ୍ତ ଲୋକ ଆକ୍ରମଣ କରିଥିଲେ । ଏଥିସହ ମନ୍ତ୍ରୀଙ୍କ ଘରେ ପଶି ବ୍ୟାପକ ଭଙ୍ଗାରୁଜା କରିଛନ୍ତି  । ଅନେକ ଗାଡିରେ ମଧ୍ୟ ନିଆଁ ଲଗାଇ ଦେଇଛନ୍ତି ।  ଗତକାଲି ଏକ ଗୋଷ୍ଠୀ ଜୋର ଜବରଦସ୍ତ ଇମ୍ଫାଲରେ ରବିନ୍ଦୋଙ୍କ ଘରେ ପଶି ତାଙ୍କ ସହ ସାକ୍ଷାତ କରିବାକୁ ଦାବି କରିଥିଲେ, କିନ୍ତୁ ସେ ଘରେ ଉପସ୍ଥିତ ନଥିଲେ  ।

ତେଣୁ ତାଙ୍କ ବାପା  ଲୋକଙ୍କୁ କହିଥିଲେ ଯେ ସେମାନେ ଯାହା ବାର୍ତ୍ତା ଦେବେ, ସେ ତାହା ତାଙ୍କ ପୁଅଙ୍କୁ ଜଣାଇବେ । ହେଲେ ଉତ୍ୟକ୍ତ ଲୋକ କିଛି ଶୁଣିବାକୁ ନାରାଜ। ପୋଲିସର ସୂଚନା ଅନୁସାରେ,  ରାଜ୍ୟରେ ଲାଗି ରହିଥିବା ଜାତିଗତ ହିଂସାକାଣ୍ଡକୁ ନେଇ ଉତ୍ୟକ୍ତ ଲୋକ ବିଜେପି ବିଧାୟକଙ୍କ ଆଭିମୁଖ୍ୟ ଜାଣିବାକୁ ଚାହୁଁଥିଲେ । ମଣିପୁର ଜିରିବାମ ଜିଲ୍ଲାରେ ୩ ଜଣ ମହିଳା ଓ ୩ ଜଣ ଶିଶୁଙ୍କ ମୃତଦେହ ମିଳିବା ପରେ ରାଜ୍ୟରେ ଉତ୍ତେଜନା ପ୍ରକାଶ ପାଇଛି  ।

ଏହି ଖବର ଲୋକଙ୍କ ପାଖରେ ପହଞ୍ଚିବା ମାତ୍ରେ ଉତ୍ତ୍ୟକ୍ତ ଜନତା ହିଂସାତ୍ମକ ବିକ୍ଷୋଭ ପ୍ରଦର୍ଶନ କରୁଛନ୍ତି। ଶନିବାର ରାଜ୍ୟର ୩ ଜଣ ମନ୍ତ୍ରୀ ଓ ୬ ଜଣ ବିଧାୟକଙ୍କ ଘରେ ଆକ୍ରମଣ କରିଥିଲେ ପ୍ରଦର୍ଶନକାରୀ ।   କେନ୍ଦ୍ର ଗୃହମନ୍ତ୍ରୀ ଅମିତ ଶାହା ରବିବାର ମଣିପୁରର ସୁରକ୍ଷା ସ୍ଥିତିର ସମୀକ୍ଷା କରିବା ସହ  ରାଜ୍ୟରେ ଶାନ୍ତି ସୁନିଶ୍ଚିତ କରିବା ପାଇଁ ସମସ୍ତ ସମ୍ଭାବ୍ୟ ପଦକ୍ଷେପ ନେବାକୁ ବରିଷ୍ଠ ସୁରକ୍ଷା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ।  ଆଜି ମଧ୍ୟ ଅପରାହ୍ଣ ୧୨ଟା ବେଳେ ମଣିପୁର ସ୍ଥିତିକୁ ନେଇ ଗୁରୁତ୍ତ୍ବପୂର୍ଣ୍ଣ ବୈଠକ ଡାକିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ।