ହାଇକୋର୍ଟର ୭୮ତମ ପ୍ରତିଷ୍ଠା ଦିବସ ; ମାମଲା ବଢୁଛି, ଫଇସଲା କମୁଛି

କନକ ବ୍ୟୁରୋ : ଆଜି ଓଡ଼ିଶା ହାଇକୋର୍ଟର ୭୮ତମ ପ୍ରତିଷ୍ଠା ଦିବସ । ଗୋଟିଏ ପଟେ ହାଇକୋର୍ଟ ପ୍ରତିଷ୍ଠା ଦିବସକୁ ନେଇ ସମସ୍ତଙ୍କ ଭିତରେ ଯେତିକି ଖୁସି, ଅନ୍ୟପଟେ ହାଇକୋର୍ଟର ବିଚାରପତି ପଦବି ଖାଲି ପଡ଼ିବା ଓ ମାମଲା ସଂଖ୍ୟା ବଢ଼ିବା ସମସ୍ତଙ୍କୁ ଚିନ୍ତାରେ ପକାଇଛି । ୧୯୪୮ ମସିହା ଜୁଲାଇ ୨୬ ଅର୍ଥାତ୍ ଆଜିର ଦିନଟି ପ୍ରତ୍ୟେକ ଓଡ଼ିଆଙ୍କ ପାଇଁ ଥିଲା ଗର୍ବର ଦିନ । କାରଣ ଆଜି ପ୍ରତିଷ୍ଠା ହୋଇଥିଲା ଓଡ଼ିଶାର ହାଇକୋର୍ଟ । ୭୮ବର୍ଷରେ ପାଦ ଥାପିଲା ହାଇକୋର୍ଟ । ୧୯୩୬ ଏପ୍ରିଲ ୧ ରେ ଓଡ଼ିଶା ସ୍ୱତନ୍ତ୍ର ରାଜ୍ୟର ମାନ୍ୟତା ପାଇଥିଲେ ମଧ୍ୟ ଓଡ଼ିଶାରେ ହାଇକୋର୍ଟ ହୋଇ ପାରିନଥିଲା । ୧୨ ବର୍ଷ ପରେ ଓଡ଼ିଶାରେ ପ୍ରତିଷ୍ଠା ହୋଇଥିଲା ହାଇକୋର୍ଟ। ଗୋଟିଏ ପଟେ ପ୍ରତିଷ୍ଠା ଦିବସ ପାଳନ ହେଉଛି । ଆଉ ଗୋଟିଏ ପଟେ ମାମଲା ବୋଝ ଏବେ ବି ହାଇକୋର୍ଟ ପାଇଁ ଏକ ପ୍ରମୁଖ ଆହ୍ବାନ ହୋଇଛି । ବିଚାରାଧୀନ ମାମଲା ସଂଖ୍ୟା ବଢ଼ୁଥିବା ବେଳେ ଫଇସଲା ହାର କିନ୍ତୁ ହ୍ରାସ ପାଇଛି । ସେହିପରି ୩୩ ବିଚାରପତି ପଦରୁ ୧୩ ଟି ପଦ ବର୍ତ୍ତମାନ ଖାଲି ପଡ଼ିଥିବା ବେଳେ ୧.୫୨ଲକ୍ଷ ମାମଲା ବିଚାରାଧୀନ ରହିଛି ।

୨୦୨୫ ଜାନୁଆରିରେ ୧ ଲକ୍ଷ ୪୬ ହଜାର ୩୭୩ ମାମଲା ବିଚାରାଧୀନ ଥିଲା । ଜୁଲାଇ ୨୩ ସୁଦ୍ଧା ୧ ଲକ୍ଷ ୫୨ହଜାର ମାମଲା ବିଚାରାଧୀନ ରହିଛି । ୨୦୨୩ ଓ ୨୦୨୪ର ପ୍ରଥମ ୬ ମାସ ଜାନୁଆରିରୁ ଜୁନ୍ ତୁଳନାରେ ୨୦୨୫ର ପ୍ରଥମାର୍ଦ୍ଧ ଶେଷ ସୁଦ୍ଧା ମାମଲା ଫଇସଲା ହାର ଅହେତୁକ ହ୍ରାସ ପାଇଛି । ଅନ୍ୟପଟେ ବିଗତ ଦୁଇବର୍ଷ ତୁଳନାରେ ହାଇକୋର୍ଟର କାର୍ଯ୍ୟରତ ବିଚାରପତିଙ୍କ ସଂଖ୍ୟା ବି କମିଛି । ହାଇକୋର୍ଟରେ ମୋଟ ୩୩ଟି ମଞ୍ଜୁରିପ୍ରାପ୍ତ ବିଚାରପତି ପଦବି ଥିବା ବେଳେ ଏବେ ମୁଖ୍ୟ ବିଚାରପତିଙ୍କ ସମେତ ମୋଟ ୨୦ଜଣ ବିଚାରପତି ରହିଛନ୍ତି। ୧୩ଟି ବିଚାରପତି ପଦ ପୂରଣ ହୋଇପାରିନାହିଁ । ଯାହା ହାଇକୋର୍ଟ ପାଇଁ ଏକ ଚ୍ୟାଲେଞ୍ଜ ହୋଇ ଉଭା ହୋଇଛି । ୨୦୨୩ ଜାନୁଆରିରେ ହାଇକୋର୍ଟରେ ମୋଟ ୨୨ଜଣ ବିଚାରପତି କାର୍ଯ୍ୟରତ ଥିଲେ,ଏବେ ତାହା କମି ୨୦ରେ ପହଞ୍ଚିଛି । ତେବେ କେଉଁଦିନ ହାଇକୋର୍ଟର ବିଚାରପତି ପଦବି ପୂରଣ ହେଉଛି ଓ ମାମଲା ସଂଖ୍ୟା ହ୍ରାସ ପାଉଛି ତାକୁ ହିଁ ଅପେକ୍ଷା ।