ଇସ୍ରାଏଲ ଆକ୍ରମଣରେ ହିଜବୁଲ୍ଲାର ବିଶାଳ ଟନେଲ୍ ଧ୍ୱଂସ । ଜଳିଗଲା ଅସ୍ତ୍ରଶସ୍ତ୍ର ଗୋଦାମ ।

କନକ ବ୍ୟୁରୋ: ଇସ୍ରାଏଲ ଆକ୍ରମଣରେ  ହିଜବୁଲ୍ଲାର ବିଶାଳ ଟନେଲ ଧ୍ୱଂସ। ଯାହାର ଭିଡିଓ ସେୟାର କରଛି ଇସ୍ରାଏଲ ସେନା ଆଇଡିଏଫ । ଗୁପ୍ତ ଟନେଲରେ ଲୁଚି ରହି ଇସ୍ରାଏଲ ଉପରେ ଆକ୍ରମଣ କରୁଥିଲେ ହିଜବୁଲ୍ଲା ଆତଙ୍କୀ।  ଲେବାନନରେ ଥିବା ଏହି ଟନେଲରେ ସବୁ ପ୍ରକାରର ସୁବିଧା ରହିଛି ।  ୨୫୦ ମିଟର ପର୍ଯ୍ୟନ୍ତ ଟନେଲକୁ ଇସ୍ରାଏଲ ଧ୍ୱଂସ କରିଦେଇଥିବା ଦାବି କରିଛି। ଇସ୍ରାଏଲ ସେନା ଏବେ ଲେବାନନରେ ଗ୍ରାଉଣ୍ଡ ଅପରେସନ ଆରମ୍ଭ କରିଥିବା ବେଳେ ଟନେଲର ଦୃଶ୍ୟ ସାମ୍ନାକୁ ଆସିଛି। 

ଇସ୍ରାଏଲ ବାୟୁସେନା ଆକ୍ରମଣରେ ଲେବାନନକୁ ସିରିଆ ସହିତ ସଂଯୋଗ କରୁଥିବା ୨ କିଲୋମିଟର ଲମ୍ବା ଟନେଲ ନଷ୍ଟ ହୋଇଯାଇଛି। ହମାସ ଆକ୍ରମଣକୁ ବର୍ଷଟେ ପୁରିବାକୁ ଯାଉଥିବା ବେଳେ ଏହି ଭିଡିଓ ସାମ୍ନାକୁ ଆସିଛି। ଏହି ଟନେଲ ମାଧ୍ୟମରେ ହିଜବୁଲ୍ଲାକୁ ଇରାନରୁ ଅସ୍ତ୍ରଶସ୍ତ୍ର ପଠାଯାଉଥିଲା। ଏହି ଟନେଲ ଉପରେ କେବଳ ହିଜବୁଲ୍ଲାର ୟୁନିଟ୍-୪୪୦୦ର ନିୟନ୍ତ୍ରଣ ଥିଲା । ଟନେଲ ଭିତରେ ଅନେକ ଅସ୍ତ୍ରଶସ୍ତ୍ର ଗୋଦାମ ରହିଥିଲା, ଇସ୍ରାଏଲର ଏୟାର ଷ୍ଟ୍ରାଇକରେ ଏହି ଅସ୍ତ୍ରଶସ୍ତ୍ର ଗୋଦାମ ମଧ୍ୟ ପୋଡ଼ି ପାଉଁଶ ହୋଇଯାଇଛି। ଇସ୍ରାଏଲ ଲେବାନନକୁ ସିରିଆ ସହିତ ସଂଯୋଗ କରୁଥିବା ଏକମାତ୍ର ରାସ୍ତା ଏବଂ ଟନେଲକୁ ଧ୍ୱଂସ କରିଦେଇଛି । ତେଣୁ, ବର୍ତ୍ତମାନ ସିରିଆ ଦେଇ ଯୋଗାଣ ପାଇଁ ହିଜବୁଲ୍ଲା ପାଖରେ କେବଳ ତିନୋଟି ମାର୍ଗ ବାକି ଅଛି। ଏହି ମାର୍ଗଗୁଡ଼ିକ ହେଉଛି ମାର୍ ବାଉନ୍, ନାହର ଅଲ କବୀର ଏବଂ ଶେବା ଫାର୍ମ । କିନ୍ତୁ ଏଗୁଡିକ ମୁଖ୍ୟ ରାସ୍ତା ନୁହେଁ, ଏଗୁଡ଼ିକ ଜଙ୍ଗଲ କିମ୍ବା ପାହାଡ ଦେଇ ଯାଇଥିବା ରାସ୍ତା । ଟ୍ରକ୍ ଏହା ଉପରେ ଯାଇପାରିବ ନାହିଁ, ତେଣୁ ଅସ୍ତ୍ରଶସ୍ତ୍ରଗୁଡିକ ବଡ଼ ଆକାରରେ ଏବଂ ଦ୍ରୁତ ଗତିରେ ହିଜବୁଲ୍ଲାକୁ ହସ୍ତାନ୍ତର କରାଯାଇ ପାରିବ ନାହିଁ । ଇସ୍ରାଏଲ ଏଥିରୁ ସିଧାସଳଖ ଲାଭବାନ ହେବେ।