କନକବ୍ୟୁରୋ : ହୃଦୟ ବିଦାରକ, ବୀଭତ୍ସ, ନାରକୀୟ । ଏପରି ଘଟଣା ଯାହା ଶୁଣିଲେ ଆପଣଙ୍କ ଛାତିକୁ ଥରାଇ ଦେବ । ଲୁଟ୍ ପାଇଁ ଦୁର୍ବୃତ୍ତମାନେ କପରି ବୀଭତ୍ସକାଣ୍ଡ ଘଟାଇପାରନ୍ତି ତାହା ଦେଖିବାକୁ ମିଳିଛି କୋରାପୁଟ ନନ୍ଦପୁର ଅଞ୍ଚଳରେ । ସ୍ବାମୀକୁ ଗଛରେ ବାନ୍ଧିଲେ, ନିସ୍ତୁକ ପିଟିଲେ। ପତ୍ନୀଙ୍କୁ ମଧ୍ୟ ମାଡ଼ ମାରି ଲହୁଲୁହାଣ କଲେ । ଏତିକିରେ ମନ ଶାନ୍ତ ହେଲାନି ଯେ, ପତ୍ନୀଙ୍କୁ ହତ୍ୟା ବି କରିଦେଲେ।... 

Advertisment

 ଦୁର୍ବୃତ୍ତଙ୍କ ଦ୍ବାରା ଆକ୍ରମଣ ଶିକାର ଓ ପତ୍ନୀଙ୍କ ମୃତ୍ୟୁ ପରେ କିପରି ତଳେ ଗଡ଼ି ଗଡ଼ି କାନ୍ଦୁଛନ୍ତି ତାଙ୍କ ସ୍ବାମୀ। ନିଜେ କହୁଛନ୍ତି ପୂରା କାହାଣୀ । ଆଉ ତାଙ୍କ କାନ୍ଦ ଶୁଣିଲେ ଆପଣଙ୍କ ହୃଦୟ ବି ଥରି ଉଠିବ ,  ଲମତାପୁଟ ବ୍ଲକ କୁମ୍ଭାରଗନ୍ଧନା ପଂଚାୟତର ହଣ୍ଡାଲତୋଟା ନିକଟ ରାସ୍ତାରେ ଏପରି ହୃଦୟବିଦାରକ ଘଟଣା ଦେଖିବାକୁ ମିଳିଛି  ।

ମୃତ ମହିଳା ହେଉଛନ୍ତି ସାବିତ୍ରୀ ଖରା । ସ୍ବାମୀ ମହେନ୍ଦ୍ର ଖରା। ଆଧାର କାମରେ ଦୁଇ ଜଣ ନନ୍ଦପୁର ବ୍ଲକକୁ ଯାଇଥିଲେ । ସେଠାରେ କାମ ସରିବା ପରେ ଦୁଇ ଜଣ ବାଇକ୍‌ରେ ଘରକୁ ଫେରୁଥିଲେ । ହେଲେ ବାଟରେ ୪ ଜଣ ଦୁର୍ବୃତ୍ତଙ୍କ ହାବୁଡରେ ପଡ଼ିଯାଇଥିଲେ ।  ଦୁର୍ବୃତ୍ତମାନେ ସେମାନଙ୍କୁ ଅଟକାଇବା ପରେ ସ୍ବାମୀଙ୍କୁ ଆକ୍ରମଣ କରିଥିଲେ। ପ୍ରବଳ ମାଡ଼ ମାରିବା ପରେ ତାଙ୍କୁ ଗଛରେ ବାନ୍ଧି ଦେଇଥିଲେ ।

ଏହା ପରେ ସ୍ତ୍ରୀକୁ ମଧ୍ୟ ମାରିଥିଲେ ଦୁର୍ବୃତ୍ତ । ଦୁର୍ବୃତ୍ତଙ୍କ ପ୍ରବଳ ମାଡ଼ରେ ସାବିତ୍ରୀଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଏହା ପରେ ଦୁର୍ବୃତ୍ତମାନେ ତାଙ୍କ ସୁନା ଗହଣା ଆଦି ଲୁଟି ନେଇଛନ୍ତି  । ସ୍ଥାନୀୟ ଲୋକଙ୍କଠାରୁ ଖବର ପାଇଁ ଘଟଣାସ୍ଥଳରେ ପହଂଚିଥିଲା ପୋଲିସ  । ମହେନ୍ଦ୍ରଙ୍କୁ ଉଦ୍ଧାର କରି ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା  । ପ୍ରାଥମିକ ଚିକିତ୍ସା ପରେ ତାଙ୍କୁ ସହିଦ୍ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲକୁ ପଠାଯାଇଛି  ।