ଏହି ଦିନରୁ ଆରମ୍ଭ ହେବ ଅର୍ଦ୍ଧକୁମ୍ଭ : ଅଖିଳ ଭାରତୀୟ ଆଖଡ଼ା ପରିଷଦ ପକ୍ଷରୁ ତାରିଖରେ ବାଜିଲା ମୋହର

କନକ ବ୍ୟୁରୋ : ଉତ୍ତରାଖଣ୍ଡର ହରିଦ୍ୱାରରେ ୨୦୨୭ ମସିହାରେ ଅନୁଷ୍ଠିତ ହେବାକୁ ଥିବା ଅର୍ଦ୍ଧକୁମ୍ଭର ତାରିଖ ଘୋଷଣା କରାଯାଇଛି । ଅଖିଳ ଭାରତୀୟ ଆଖଡ଼ା ପରିଷଦ ପୁଷ୍କର ଧାମୀ ସରକାରଙ୍କ ପ୍ରସ୍ତାବକୁ ଅନୁମୋଦନ କରି ନିଜର ମୋହର ଲଗାଇଛନ୍ତି ଏବଂ ଏହା ସହିତ ଶାହୀ ସ୍ନାନର ତାରିଖ ମଧ୍ୟ ସ୍ଥିର କରିଛନ୍ତି । ତେବେ ଉତ୍ତରାଖଣ୍ଡ ସରକାର ଆନୁଷ୍ଠାନିକ ଭାବେ କିଛି ସମୟ ପରେ ତାରିଖ ଘୋଷଣା କରିବେ ଏବଂ ତା’ପରେ ନିଜ ତରଫରୁ ଅର୍ଦ୍ଧକୁମ୍ଭର ପ୍ରସ୍ତୁତି ଆରମ୍ଭ କରିବେ କିନ୍ତୁ ଆଖଡ଼ା ପରିଷଦ ପ୍ରସ୍ତୁତି ଆରମ୍ଭ କରିସାରିଛି ।

ସୂଚନାଯୋଗ୍ୟ ଯେ ଏଥର ହରିଦ୍ୱାରରେ ଅନୁଷ୍ଠିତ ହେବାକୁ ଥିବା ଅର୍ଦ୍ଧକୁମ୍ଭ ୨୦୨୭ରେ ହେବ । ଏକ ପୁରୁଣା ପରମ୍ପରାରେ ପରିବର୍ତ୍ତନ ଦେଖିବାକୁ ମିଳିବ । ଏଥର ସାଧୁ-ସନ୍ନ୍ୟାସୀ, ବୈରାଗୀ ଏବଂ ଆଖଡ଼ାମାନଙ୍କ ସହିତ ୩ଟି ଶାହୀ ସ୍ନାନ ହେବ । ପ୍ରଥମ ଶାହୀ ସ୍ନାନ ୬ ମାର୍ଚ୍ଚ ୨୦୨୭ରେ ମହାଶିବରାତ୍ରୀ ପର୍ବରେ ହେବ । ଦ୍ୱିତୀୟ ଶାହୀ ସ୍ନାନ ୮ ମାର୍ଚ୍ଚ ୨୦୨୭ରେ ସୋମବତୀ ଅମାବାସ୍ୟା ଦିନ ହେବ । ତୃତୀୟ ଶାହୀ ସ୍ନାନ ୧୪ ଏପ୍ରିଲ ୨୦୨୭ରେ ବୈଶାଖୀରେ ହେବ । ବୈଶାଖୀ ଦିନ ମେଷ ସଂକ୍ରାନ୍ତି ହେବ ଏବଂ ଏହି ଦିନ ହେବାକୁ ଥିବା ସବୁଠାରୁ ପବିତ୍ର ଏବଂ ଅମୃତ ସ୍ନାନ ହେବ ।