୩ ବର୍ଷ ହେଲା ସରୁନି ହଲ୍‌ ନିର୍ମାଣ, ଅନୁଦାନ ଅଭାବରୁ କାମ ଅଟକିଥିବା ଅଭିଯୋଗ

କନକ ବ୍ୟୁରୋ: ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡିରେ ୪ କୋଟି ୬୦ ଲକ୍ଷ ଟଙ୍କା ବ୍ୟୟରେ ଅତ୍ୟାଧୁନିକ ଟାଉନ ହଲ୍‌ ନିର୍ମାଣ ଆରମ୍ଭ ହୋଇଥିଲା । ୨୦୨୨ ଏପ୍ରିଲ୍‌ରେ ଟେଣ୍ଡର ପାଇ କାମ ଅରମ୍ଭ କରିଥିଲା ଠିକାସଂସ୍ଥା । ୨୦୨୩ ଏପ୍ରିଲ ସୁଦ୍ଧା କାମ ସାରିବା ନେଇ ଲକ୍ଷ୍ୟ ଥିଲା । ପର୍ଯ୍ୟାୟକ୍ରମେ ୩ କୋଟି ୮୦ ଲକ୍ଷ ଟଙ୍କାରେ ପ୍ରାୟ ୭୦% କାମ ସରିଛି। ବର୍ଷେ ହେଲାଣି ନିର୍ମାଣ ବନ୍ଦ ରହିଛି । ଅନୁଦାନ ଅଭାବରୁ କାମ ଆଗକୁ ବଢ଼ୁନଥିବା ଅଭିଯୋଗ ହୋଇଛି । 

ବେତାଗୁଡ଼ା ସ୍ଥିତ ନୂତନ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ନିକଟରେ ଅତ୍ୟାଧୁନିକ ଟାଉନ ହଲ୍‌ ଓ ଅଡିଟୋରିୟମ୍‌ କାମ ଚାଲିଛି । ପ୍ରାୟ ୧ ଏକର ଜମିରେ କଲ୍ୟାଣମଣ୍ଡପ ସହ  ୪୫୦ ସିଟ୍‌ ବିଶିଷ୍ଟ ଅଡିଟୋରିୟମ, ଡ୍ୟୁପ୍ଲେକ୍ସ ହଲ୍‌, ବଗିଚା, ପାର୍କିଂ ସହ ଆଧୁନିକ ସାଉଣ୍ଡ ବ୍ୟବସ୍ଥା ଉପଲବ୍ଧ ହେବ। ହେଲେ କାମ ଅଧାରୁ ବନ୍ଦ ରହିବାରୁ ଅସନ୍ତୋଷ ପ୍ରକାଶ କରିଛନ୍ତି ସହରବାସୀ । ଅନ୍ୟପଟେ ୩ ରୁ ୪ ମାସ ସୁଦ୍ଧା କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଥିବା କହିଛନ୍ତି ପୌରପରିଷଦ ନିର୍ବାହୀ ଅଧିକାରୀ । ନୂତନ ଟାଉନ ହଲ୍‌ର ନିର୍ମାଣ କାର୍ଯ୍ୟ କେବେ ସରିବ। ଆଉ ଲୋକଙ୍କ କାମରେ କେବେ ଲାଗିବ ତାକୁ ଅପେକ୍ଷା ।