କଙ୍ଗାରୁ କୋର୍ଟକୁ ବନ୍ଦ କର

କନକ ବ୍ୟୁରୋ: ପ୍ରଥମେ ବିଚ୍ ରାସ୍ତାରେ ପ୍ରେମୀ ଯୁଗଳଙ୍କ ବେକରେ ଯୁଆଳି ଯୋଚି, ବଳଦ ପରି ହଳ ବୁଲାଉଥିବାର ଖବର ସାମ୍ନାକୁ ଆସିଥିଲା । ସୋସିଆଲ ମିଡିଆରେ ବି ନିଆଁଭଳି ଭାଇରାଲ୍ ହେଲା । ଆଉ କନକ ନ୍ୟୁଜରେ ଖବର ପ୍ରସାରଣ ପରେ, ପ୍ରଶାସନ ଚେତିଲା । କଙ୍ଗାରୁ କୋର୍ଟର ଏହି ସମ୍ବେଦନଶୀଳ ଖବରକୁ ନେଇ ମାମଲା ହୋଇଛି । କୋରାପୁଟ ଜିଲ୍ଲା ଏବଂ ରାୟଗଡ଼ାରେ ଘଟିଥିବା ଦୁଇଟି ଯାକ ଘଟଣାରେ ପ୍ରଶାସନ ଘଟଣାସ୍ଥଳକୁ ଯାଇ ଲୋକଙ୍କୁ ସଚେତନ କରାଇଛନ୍ତି ।

Advertisment

ଯେଉଁମାନେ ଘଟଣାସ୍ଥଳରେ ରହି ପୂରା ଦୃଶ୍ୟକୁ ଉପଭୋଗ କରୁଥିଲେ, ବିରୋଧ ବଦଳରେ ଏହାର ମଜ୍ଜା ଉଠାଉ ଥିଲେ । ସେ ସମସ୍ତଙ୍କର ଚେହେରା ବି ଭିଜୁଆଲରେ ଜଳଜଳ ହୋଇ ଦିଶୁଛି । ବିଶେଷ କରି ସର୍ଦ୍ଦାର ସାଜିଥିବା ଗାଁ ମୁଖିଆ ଏହାର ମୁଖ୍ୟ କାର୍ପଟଦାର ଥିବା ଜଣାପଡ଼ିଛି । ପ୍ରଶାସନ ରୁଜୁ କରିଛି ମାମଲା, ହେଲେ ଏବେ ବି ଅଭିଯୁକ୍ତ ବୁଲୁଛନ୍ତି ଖୁଲମଖୁଲା ।

ସେପଟେ କଙ୍ଗାରୁକୋର୍ଟ ନେଇ ସରକାରଙ୍କ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି । ପ୍ରେମୀ ଯୁଗଳଙ୍କୁ କଙ୍ଗାରୁ କୋର୍ଟରେ ଦଣ୍ଡ ବିଧାନ ଭଳି ଘଟଣାକୁ ଏକ ଅନୈତିକ ଓ ଘୃଣ୍ୟ ପ୍ରଥା କହି ନିନ୍ଦା କରିଛନ୍ତି । ଏହିଭଳି କାର୍ଯ୍ୟକୁ କେବେ ବି ପ୍ରଶ୍ରୟ ଦିଆଯିବ ନାହିଁ । ଯିଏ କେହି ଏହିଭଳି ଅନୈତିକ କାମ କରିବ ଆଇନକୁ ହାତକୁ ନେବ ତାଙ୍କ ବିରୁଦ୍ଧରେ କଠୋର ଦଣ୍ଡବିଧାନ କରାଯିବ ବୋଲି କହିଛନ୍ତି ଆଇନମନ୍ତ୍ରୀ ।

ସୂଚନାଯୋଗ୍ୟ ଯେ, କଙ୍ଗାରୁ କୋର୍ଟ ପାଇଁ କଡ଼ା ଦଫାରେ ମାମଲା ରୁଜୁ କରିବାର ପ୍ରାବଧାନ ରହିଛି ।

ଆପରାଧିକ ଷଡ୍‌ଯନ୍ତ୍ର
ସଂଗଠିତ ଅପରାଧ
ମାନହାନି ମକଦ୍ଦମା
ହତ୍ୟା ଉଦ୍ୟମ
ଜୀବନରୁ ମାରି ଦେବାକୁ ଧମକ
ଦଙ୍ଗା ସୃଷ୍ଟି ପାଇଁ ଉସୁକାଇବା
ଘୃଣା ଭାବନା ସୃଷ୍ଟି କରାଇ ସାର୍ବଜନୀନ ଶାନ୍ତି ବିପର୍ଯ୍ୟସ୍ତ କରିବା
ବଟି ଆଦାୟ କରିବା

ଆଜିର ଦିନରେ ବି ଲୋକମାନେ ବିଚ୍ ରାସ୍ତାରେ ଆଇନର ଧଜିଆ ଉଡ଼ାଉଛନ୍ତି । ଆଇନକୁ ହାତକୁ ନେଉଛନ୍ତି । ପୁଲିସ ଆଉ ପ୍ରଶାସନ ସବୁ କିଛି ଦେଖି ଯେମିତି ଆଖି କାନ ବନ୍ଦ କରି ଦେଇଛି । ପ୍ରଶ୍ନ ଉଠୁଛି, କେବେ ସଚେତନ ହେବେ ଲୋକେ? ଆଉ କେବେ ବନ୍ଦ ହେବ କଙ୍ଗାରୁକୋର୍ଟ ?