କୋଟିଆ ପାଇଁ ସରକାରଙ୍କ କସରତ ; ମନ ଜିଣିବାକୁ ମୋହନଙ୍କ ରଣନୀତି

କନକ ବ୍ୟୁରୋ : ମୋହନ ସରକାରଙ୍କ ଫୋକସରେ ରହିଛି କୋରାପୁଟର କୋଟିଆ । କୋଟିଆ ଉପରେ ଆନ୍ଧ୍ର ବାରମ୍ବାର ଆଖି ପକାଇବା ପରେ ସେଠାକାର ଲୋକଙ୍କ ମନ ଜିଣିବାକୁ ବିଜେପି ସରକାର ଜୋରଦାର ଉଦ୍ୟମ ଆରମ୍ଭ କରିଛି । କୋଟିଆକୁ ମାରାଥନ ଗସ୍ତ କରୁଛନ୍ତି ମୋହନଙ୍କ ମନ୍ତ୍ରୀ । କୋରାପୁଟ ଗସ୍ତରେ ଥିବାବେଳେ ନିଜେ ମୁଖ୍ୟମନ୍ତ୍ରୀ କୋଟିଆ ବିକାଶ ପାଇଁ ନକ୍ସା ପ୍ରସ୍ତୁତ କରିଛନ୍ତି । ପ୍ରାକୃତିକ ସମ୍ପଦରେ ଭରପୁର କୋଟିଆ । ପଡୋଶୀ ଆନ୍ଧ୍ର ଏହି ଅଂଚଳ ଉପରେ ବାରମ୍ବାର ଆଖି ପକାଉଥିବାରୁ ମୋହନ ସରକାର ଏହାକୁ ଗୁରୁତର ସହ ନେଇଛନ୍ତି । ସ୍ବତନ୍ତ୍ର କମିଟି ଗଠନ କରିବା ଲଗାତାର ଭାବେ କୋଟିଆ ଗସ୍ତ କରୁଛନ୍ତି ମୋହନଙ୍କ ମନ୍ତ୍ରୀ । 

ଶୁକ୍ରବାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା କୋଟିଆ ଗସ୍ତରେ ଯାଇ ବିଭିନ୍ନ କାର୍ଯ୍ୟର ସମୀକ୍ଷା କରିଛନ୍ତି । କୋଟିଆବାସୀଙ୍କ ମନ ଜିଣିବା ପାଇଁ ସେମାନଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି । କୋଟିଆର ବିକାଶ ପାଇଁ ରଣନୀତି ତିଆରି ଚାଲିଛି ବୋଲି କହିଥିଲେ । ଆଜି କୋରାପୁଟରେ ଗସ୍ତରେ ଯାଇ କୋଟିଆ ବିକାଶର କଥା କହିଛନ୍ତି ମୁଖ୍ୟମନ୍ତ୍ରୀ । 

ସରକାର ବଦଳିବା ପରେ କୋଟିଆ ପାଇଁ ସ୍ବତନ୍ତ୍ର କମିଟି ଗଠନ କରିଛନ୍ତି ରାଜ୍ୟ ସରକାର । କମିଟିରେ ଥିବା ମନ୍ତ୍ରୀମାନେ ବାରମ୍ବାର କୋଟିଆ ଗସ୍ତ କରୁଛନ୍ତି । ଜୁନ୍ ମାସରେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ, ଉପମୁଖ୍ୟମନ୍ତ୍ରୀ କେ.ଭି. ସିଂଦେଓ, ଗଣଶିକ୍ଷାମନ୍ତ୍ରୀ, ପରିବହନ ମନ୍ତ୍ରୀଙ୍କ ସମେତ ବହୁ ଛାମୁଆ ନେତା କୋଟିଆ ଯାଇଥିଲେ ।  ଗ୍ରାମ୍ୟ ଉନ୍ନୟନ, ଶିକ୍ଷା, ସ୍ବାସ୍ଥ୍ୟ ସମେତ ଅନ୍ୟାନ୍ୟ ବିକାଶ କାର୍ଯ୍ୟର ସମୀକ୍ଷା କରିଥିଲେ । କୋଟିଆ ପାଇଁ ସାଢ଼େ ଚାରିକୋଟି ଓଡ଼ିଆ ଏକ ବୋଲି, ବାର୍ତ୍ତା ଦେବାକୁ ବିରୋଧୀ ଦଳର ନେତାମାନଙ୍କୁ ବି ସାଙ୍ଗରେ ନେଇଥିଲେ । ରଥଯାତ୍ରାରେ କୋଟିଆରେ ଏକାଠି ହୋଇ ରଥ ଟାଣିଥିଲେ । କିନ୍ତୁ କୋଟିଆ ବିବାଦ ଯେମିତି ଥିଲା ସେମିତି ରହିଛି । ବାରମ୍ବାର ଆନ୍ଧ୍ର ଅଧିକାରୀମାନେ କୋଟିଆକୁ ଆସି ଲୋକଙ୍କୁ ନିଜ ସପକ୍ଷରେ ନେବାକୁ ଉଦ୍ୟମ କରୁଛନ୍ତି ।

ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, କୋଟିଆ ବିବାଦ ବିଷୟରେ ରାଜ୍ୟ ସରକାର ନିୟମିତ ଭାବେ କେନ୍ଦ୍ର ସରକାରଙ୍କ ସହ ଯୋଗାଯୋଗରେ ରହିଛନ୍ତି । ମହାନଦୀ ଜଳବିବାଦ ତୁଟାଇବା ପାଇଁ ଅଣ୍ଟା ଭିଡିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଛତିଶଗଡ ମୁଖ୍ୟମନ୍ତ୍ରୀଙ୍କ ସହ ଆପୋସ ଆଲୋଚନା ମାଧ୍ୟମରେ ବିବାଦର ସମାଧାନ କରିବାକୁ କଥା ହୋଇଛନ୍ତି । ତେଣୁ କେବେ କୋଟିଆ ବିବାଦର ସମାଧାନ ହେବ ? ଆନ୍ଧ୍ର ସରକାର ସହ ଓଡ଼ିଶା ସରକାର କେବେ ଆଲୋଚନା କରିବେ ? ତା ଉପରେ ସମସ୍ତଙ୍କ ନଜର ।