ସରକାରଙ୍କ ବଡ଼ ପଦକ୍ଷେପ : ସାଇବର ଠକ ପିନ୍ଧିବେ ହାତକଡ଼ି

କନକବ୍ୟୁରୋ :  ଦିନକୁ ଦିନ ସାଇବର୍ ଠକେଇ ବଢ଼ିଚାଲିଛି । କୌଣସି ଲିଙ୍କ୍ ମାଧ୍ୟମରେ ହେଉ କି, ଫୋନ୍ କଲ୍ ମାଧ୍ୟମରେ ହେଉ, ଲୋକଙ୍କୁ ଲୁଟିନେଉଛନ୍ତି ସାଇବର ଠକ । ଆକାଉଣ୍ଟ୍ କୋଟି କୋଟି ଟଙ୍କା ଚଳୁ କରିଦେଉଛନ୍ତି  । ଖାସକରି ଡିଜିଟାଲ୍ ଆରେଷ୍ଟ କରି ଲୋକଙ୍କୁ ଲୁଟୁଛନ୍ତି ସାଇବର ଠକ ।  କିନ୍ତୁ ବର୍ତ୍ତମାନ ଏଥିରୁ ରକ୍ଷା ପାଇବା ପାଇଁ ଉପାୟ ଆସିଯାଇଛି । ଗୋଟିଏ କ୍ଲିକରେ ଡିଜିଟାଲ୍ ଆରେଷ୍ଟରୁ ମୁକ୍ତି ପାଇପାରିବେ ଲୋକେ  ।

ଏବେ ଜାଣନ୍ତୁ  କେମିତି କାମ କରେ ଏହି ବଟନ୍...
ଦେଶରେ ଡିଜିଟାଲ ଆରେଷ୍ଟର ବର୍ଦ୍ଧିତ ଘଟଣାଗୁଡ଼ିକୁ ରୋକିବା ପାଇଁ ସରକାର ଏକ ପ୍ରଭାବଶାଳୀ ରଣନୀତି ଗ୍ରହଣ କରିଛନ୍ତି । ଡିଜିଟାଲ ଗିରଫ ଦାରୀର ସମସ୍ୟାର ସମାଧାନ ପାଇଁ ଗୃହ ମନ୍ତ୍ରଣାଳୟ ଏକ ଉଚ୍ଚସ୍ତରୀୟ କମିଟି ଗଠନ କରିଛି । ଏହି କମିଟି "କିଲ୍ ସ୍ୱିଚ୍" ଭଳି ବିକଳ୍ପଗୁଡ଼ିକ ପରାମର୍ଶ ଦେଇଛି, ଯେଉଁଠାରେ ଗୋଟିଏ ବଟନ୍ ଠକମାନଙ୍କ ଯୋଜନାକୁ ବିଫଳ କରିପାରିବ ।

ଏହା ବ୍ୟତୀତ, ଡିଜିଟାଲ ଗିରଫଦାରୀ ସମୟରେ ହୋଇଥିବା ଯେ କୌଣସି ଆର୍ଥିକ କ୍ଷତିର କ୍ଷତିପୂରଣ ପାଇଁ କମିଟି ଏକ ପରାମର୍ଶ ମଧ୍ୟ ଦେଇଛି  ।
ଗୃହ ମନ୍ତ୍ରଣାଳୟର ଏକ ଉଚ୍ଚସ୍ତରୀୟ କମିଟି "କିଲ୍ ସ୍ୱିଚ୍" ଭଳି ବିକଳ୍ପ ସୁପାରିଶ କରିଛି  । ଏହାର ଅର୍ଥ ହେଉଛି ଯଦି କେହି ଡିଜିଟାଲ୍ ଠକେଇ ସନ୍ଦେହ କରନ୍ତି, ତେବେ ସେମାନେ କିଲ୍ ସ୍ୱିଚ୍ ବଟନ୍ ଉପରେ କ୍ଲିକ୍ କରି ସମସ୍ତ ଆର୍ଥିକ କାରବାରକୁ ତୁରନ୍ତ ବନ୍ଦ କରିପାରିବେ  ।  ଏହା ଠକମାନଙ୍କୁ ସେମାନଙ୍କ ଆକାଉଣ୍ଟରୁ ଟଙ୍କା ଉଠାଇବା କିମ୍ବା ଠକେଇ କରିବାରୁ ରୋକିବ ଏବଂ ବ୍ୟାଙ୍କ ସମସ୍ତ ଉପଭୋକ୍ତାଙ୍କ ଆକାଉଣ୍ଟକୁ ଅସ୍ଥାୟୀ ଭାବରେ ଫ୍ରିଜ୍ କରିବ ।

ବ୍ୟାଙ୍କିଙ୍ଗ ସିଷ୍ଟମରେ ଠକେଇ ସହିତ ଜଡିତ କ୍ଷତିକୁ ପୂରଣ କରିବା ପାଇଁ ଏକ ବୀମା ବ୍ୟବସ୍ଥା ଖୁବ୍ ଶୀଘ୍ର ପ୍ରଚଳନ କରାଯାଇପାରେ , କାରଣ ଡିଜିଟାଲ-ଯୁଗରେ ଠକେଇର ବର୍ଦ୍ଧିତ ସଂଖ୍ୟା ବାଣିଜ୍ୟିକ ବ୍ୟାଙ୍କଗୁଡ଼ିକୁ ସେମାନଙ୍କର ପରିଚାଳନା ଢାଞ୍ଚା ଉପରେ ପୁନଃବିଚାର କରିବାକୁ ବାଧ୍ୟ କରୁଛି  ।  ଏହାର ଲକ୍ଷ୍ୟ ହେଉଛି ଗ୍ରାହକ ଏବଂ ସମଗ୍ର ଆର୍ଥିକ ବ୍ୟବସ୍ଥାକୁ ଭଲ ଭାବରେ ସୁରକ୍ଷା ଦେବା  ।  କମିଟି ଏକ କିଲ୍ ସ୍ୱିଚ୍ ସହିତ ଏପରି ବୀମା ପ୍ରଚଳନ କରିବାକୁ ମଧ୍ୟ ପରାମର୍ଶ ଦେଇଛି  ।

ଜରୁରୀକାଳୀନ ବଟନ୍ କିପରି କାମ କରିବ? 
କିଲ୍ ସ୍ୱିଚ୍ ବିଷୟରେ ଆଲୋଚନା କରିବା ପାଇଁ ଗତ ବର୍ଷ ଡିସେମ୍ବରରେ ଏକ ଆନ୍ତଃବିଭାଗୀୟ କମିଟି ଗଠନ କରାଯାଇଥିଲା । ଅନ୍ୟାନ୍ୟ ବିକଳ୍ପଗୁଡ଼ିକ ମଧ୍ୟରେ, ଏଥିରେ ଋଣଦାତାଙ୍କ ପେମେଣ୍ଟ ଆପ୍ସରେ ଏକ ଜରୁରୀକାଳୀନ ବଟନ୍ ସାମିଲ ହୋଇପାରେ ।  ଯେତେବେଳେ ଜଣେ ଉପଭୋକ୍ତା ଅନୁଭବ କରନ୍ତି ଯେ ସେମାନଙ୍କୁ ଠକାଯାଉଛି, ସେମାନେ ଏହି ସମୟରେ ‘କ୍ଲିକ୍ ସ୍ଵିଚ୍’ ବଟନ୍ ଦବାଇ ସମସ୍ତ ବ୍ୟାଙ୍କିଂ କାର୍ଯ୍ୟକୁ ତୁରନ୍ତ ସ୍ଥଗିତ କରିପାରିବେ ।  ସାଧାରଣ ଭାବେ କହିବାକୁ ଗଲେ, ୟୁପିଆଇ ଆପ୍ କିମ୍ବା ବ୍ୟାଙ୍କ ଆପ୍ ଭଳି ଉପଭୋକ୍ତାଙ୍କ ପେମେଣ୍ଟ ଆପ୍ସରେ ଏକ କିଲ୍ ସ୍ୱିଚ୍ ବିଲ୍ଟ କରାଯିବ, ଯାହା ଦ୍ୱାରା ଉପଭୋକ୍ତା ବଟନ୍ ଦବାଇବା ମାତ୍ରେ କୌଣସି ବ୍ୟାଙ୍କିଂ କାରବାର ହୋଇପାରିବ ନାହିଁ ।

କମିଟି ଏହା ଉପରେ ବି ଧ୍ୟାନ ଦେଉଛି କି, ଯଦି କୌଣସି ବ୍ୟକ୍ତି ଠକାମୀର ଶିକାର ହେଉଛନ୍ତି ଏବଂ ତାଙ୍କ ଆକାଉଣ୍ଟରୁ ଟଙ୍କା ଚାଲିଯାଉଛି । ତେବେ ସେହି ଟଙ୍କା ଫେରାଇ ଆଣିବା ପାଇଁ କୌଣସି ଉପାୟ ଅଛି କି ନାହିଁ , ଯାହା ଦ୍ୱାରା ଟଙ୍କା ଆଦାୟ ପାଇଁ ପ୍ରୟାସ କରାଯାଇପାରିବ । 

କେମିତି କରାଯାଏ ଡିଜିଟାଲ୍ ଆରେଷ୍ଟ? 
ଡିଜିଟାଲ୍ ଗିରଫ ଠକେଇରେ, ଠକମାନେ ଭିଡିଓ କଲ୍ ମାଧ୍ୟମରେ ଲୋକଙ୍କୁ ଯୋଗାଯୋଗ କରନ୍ତି, ପୁଲିସ କିମ୍ବା ଅନ୍ୟ ଆଇନ ପ୍ରବର୍ତ୍ତନ ସଂସ୍ଥାର ଅଧିକାରୀ ଭାବରେ ନିଜକୁ ପରିଚୟ ଦେଇ, ଗୁରୁତର ଅପରାଧର ତଦନ୍ତ କରୁଥିବା ଦାବି କରନ୍ତି ।  ସେମାନେ ସେମାନଙ୍କର ବିଶ୍ୱସନୀୟତା ବୃଦ୍ଧି କରିବା ପାଇଁ ଲିକ୍ ହୋଇଥିବା ବ୍ୟକ୍ତିଗତ ତଥ୍ୟ ବ୍ୟବହାର କରନ୍ତି । ସେମାନେ ପ୍ରାୟତଃ ଭୟ ଏବଂ ଆତଙ୍କର ପରିବେଶ ସୃଷ୍ଟି କରନ୍ତି ଏବଂ ପୀଡିତଙ୍କ ଠାରୁ ବହୁ ପରିମାଣର ଟଙ୍କା ଆଦାୟ କରିବା ପାଇଁ ନକଲି ଆଇଡି ଏବଂ ଗିରଫ ୱାରେଣ୍ଟ ବ୍ୟବହାର କରନ୍ତି  ।