ସିଗାରେଟ୍-ଚା' ଛାଡନ୍ତୁ , ୨୦ ଟଙ୍କାରେ ୨ ଲକ୍ଷର ବୀମା ପାଆନ୍ତୁ

କନକ ବ୍ୟୁରୋ: ଆଜିର ମହଙ୍ଗା ଯୁଗରେ, ଯେଉଁଠି ଗୋଟିଏ କପ୍ ଚା' କିମ୍ବା ଗୋଟିଏ ସିଗାରେଟ୍ ପାଇଁ ୧୦-୨୦ ଟଙ୍କା ଖର୍ଚ୍ଚ କରିବା ଏକ ସାଧାରଣ କଥା । ଯଦି ଆପଣଙ୍କୁ କୁହାଯାଏ ଯେ ମାତ୍ର ୨୦ ଟଙ୍କାରେ ଆପଣ ନିଜ ପାଇଁ ୨ ଲକ୍ଷ ଟଙ୍କାର ବୀମା ସୁରକ୍ଷା ପାଇପାରିବେ, ତେବେ ଏହା ଆଶ୍ଚର୍ଯ୍ୟ ଲାଗିପାରେ । ଆଉ କିଛି ସମୟ ଭାବନାରେ  ମଧ୍ୟ ପଡିଯିବେ ଯେ, ସତରେ କଣ ୨୦ ଟଙ୍କାରେ ବୀମା..  କିନ୍ତୁ ଏହା ସମ୍ପୂର୍ଣ୍ଣ ସତ । କେନ୍ଦ୍ର ସରକାରଙ୍କ ଏକ ସ୍ୱତନ୍ତ୍ର ଯୋଜନା ରହିଛି, ଯାହା ସାଧାରଣ ଲୋକଙ୍କୁ, ବିଶେଷକରି ଆର୍ଥିକ ଭାବେ ଦୁର୍ବଳ ଶ୍ରେଣୀର ଲୋକଙ୍କୁ ସାମାଜିକ ସୁରକ୍ଷା ଯୋଗାଇବା ପାଇଁ ଉଦ୍ଦିଷ୍ଟ  ।  ଏହି ଯୋଜନାର ନାମ ହେଉଛି ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା  । 

କ'ଣ ଏହି ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା  ? 
ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା ହେଉଛି କେନ୍ଦ୍ର ସରକାରଙ୍କ ଦ୍ୱାରା ୨୦୧୫ ମସିହାରେ ଆରମ୍ଭ କରାଯାଇଥିବା ଏକ ଦୁର୍ଘଟଣା ବୀମା ଯୋଜନା ।   ଏହାର ମୂଳ ଉଦ୍ଦେଶ୍ୟ ହେଉଛି ଦେଶର ପ୍ରତ୍ୟେକ ନାଗରିକଙ୍କୁ, ବିଶେଷ କରି ଗରିବ ଓ ଅସଂଗଠିତ କ୍ଷେତ୍ରର ଲୋକଙ୍କୁ ଅତି କମ୍ ପ୍ରିମିୟମ୍‌ରେ ବୀମା ସୁରକ୍ଷା ଯୋଗାଇବା । ଏହି ଯୋଜନା ଅଧୀନରେ ବାର୍ଷିକ ମାତ୍ର ୨୦ ଟଙ୍କା ପ୍ରିମିୟମରେ ଆପଣ ୨ ଲକ୍ଷ ଟଙ୍କା ପର୍ଯ୍ୟନ୍ତ ଦୁର୍ଘଟଣା ଜନିତ ବୀମା ପାଇପାରିବେ । ଏହି ଯୋଜନା ପାଇଁ ବାର୍ଷିକ ପ୍ରିମିୟମ୍ ମାତ୍ର ୨୦ ଟଙ୍କା । ଏହି ରାଶି ପ୍ରତିବର୍ଷ ଆପଣଙ୍କ ବ୍ୟାଙ୍କ ଆକାଉଣ୍ଟରୁ ସ୍ୱୟଂଚାଳିତ ଭାବେ   କଟିଯିବ । ଦୁର୍ଘଟଣାରେ ମୃତ୍ୟୁ ହେଲେ କିମ୍ବା ସମ୍ପୂର୍ଣ୍ଣ ଭାବେ ଦୁଇ ଆଖି, ଦୁଇ ହାତ ବା ଦୁଇ ଗୋଡ଼ର କାର୍ଯ୍ୟକ୍ଷମତା ହରାଇଲେ, ବୀମାଧାରୀଙ୍କ ପରିବାରକୁ ଯିଏ ନୋମିନୀ ଥିବେ ତାଙ୍କୁ ୨ ଲକ୍ଷ ଟଙ୍କା ମିଳିବ ।  ଦୁର୍ଘଟଣାରେ ଗୋଟିଏ ଆଖିର ଦୃଷ୍ଟିଶକ୍ତି କିମ୍ବା ଗୋଟିଏ ହାତ ବା ଗୋଡ଼ର କାର୍ଯ୍ୟକ୍ଷମତା ହରାଇଲେ ୧ ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରାଯିବ ।  ତେବେ  ୧୮ ରୁ ୭୦ ବର୍ଷ ବୟସର ଯେକୌଣସି ଭାରତୀୟ ନାଗରିକ, ଯାହାଙ୍କର ଏକ  ସେଭିଙ୍ଗ୍‌ ବ୍ୟାଙ୍କ ଆକାଉଣ୍ଟ ଥିବ ସେ ଏହି ଯୋଜନାରେ ସାମିଲ ହୋଇପାରିବେ । ଏହି ବୀମାର ଅବଧି ଏକ ବର୍ଷ ପାଇଁ, ଯାହା ପ୍ରତିବର୍ଷ ଜୁନ୍ ୧ ତାରିଖରୁ ଆରମ୍ଭ ହୋଇ ପରବର୍ତ୍ତୀ ବର୍ଷ ମେ' ୩୧ ତାରିଖରେ ଶେଷ ହୁଏ । ଏହାକୁ ପ୍ରତିବର୍ଷ ନବୀକରଣ କରିବାକୁ ପଡ଼ିଥାଏ, ଯାହା ବ୍ୟାଙ୍କ ଆକାଉଣ୍ଟରୁ ଟଙ୍କା କଟିବା ପରେ ସ୍ୱୟଂଚାଳିତ ଭାବେ ହୋଇଯାଏ । 

କିପରି କରିବେ ଆବେଦନ?
ଏହା ଆପଣ ଅଫଲାଇନ୍‌ ଏବଂ ଅନ୍‌ଲାଇନ୍‌ରେ ମଧ୍ୟ ଆବେଦନ କରିପାରିବେ । ଅଫଲାଇନ୍‌ରେ ଯଦି କରିବାକୁ ଚାହୁଛନ୍ତି ତେବେ ଆପଣ ନିଜର ବ୍ୟାଙ୍କ ଶାଖାକୁ ଯାଇ "ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା" ପାଇଁ ଏକ ଫର୍ମ ପୂରଣ କରି ଜମା କରିପାରିବେ । ଫର୍ମରେ ଆପଣଙ୍କୁ ଅଟୋ-ଡେବିଟ୍ ପାଇଁ ସହମତି ଦେବାକୁ ପଡ଼ିବ । ଆଉ ଯଦି ଅନଲାଇନ୍‌ ଆବେଦ କରିବାକୁ ଚାହୁଛନ୍ତି, ତେବେ ଅନେକ ବ୍ୟାଙ୍କ ନିଜର ଇଣ୍ଟରନେଟ୍ ବ୍ୟାଙ୍କିଙ୍ଗ୍ ପୋର୍ଟାଲ୍ କିମ୍ବା ମୋବାଇଲ୍ ଆପ୍ ମାଧ୍ୟମରେ ଏହି ଯୋଜନାରେ ଅନଲାଇନରେ ଆବେଦନ କରିବାର ସୁବିଧା ଦେଉଛନ୍ତି । ଦୁର୍ଘଟଣା କେତେବେଳେ ବି ହୋଇପାରେ । ଏଭଳି ଏକ ଅପ୍ରତ୍ୟାଶିତ ସ୍ଥିତିରେ, ଏହି ବୀମା ଯୋଜନା ପରିବାରକୁ ଏକ ବଡ଼ ଆର୍ଥିକ ସହାୟତା ଯୋଗାଇପାରେ । ବାର୍ଷିକ ମାତ୍ର ୨୦ ଟଙ୍କାର ଏହି ଛୋଟ ନିବେଶ, ଆପଣଙ୍କ ପରିବାରର ଭବିଷ୍ୟତକୁ ସୁରକ୍ଷିତ କରିବାରେ ଏକ ବଡ଼ ଭୂମିକା ଗ୍ରହଣ କରିପାରେ । ତେଣୁ, ଆଉ ଡେରି ନକରି ଆଜି ହିଁ ନିଜ ବ୍ୟାଙ୍କ ଶାଖା ସହ ଯୋଗାଯୋଗ କରନ୍ତୁ ଏବଂ "ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା"ରେ ନିଜ ନାମ ପଞ୍ଜୀକୃତ କରନ୍ତୁ । ଏହା କେବଳ ଏକ ବୀମା ନୁହେଁ, ବରଂ ନିଜ ପରିବାର ପ୍ରତି ଆପଣଙ୍କର ଏକ ଦାୟିତ୍ୱ ।