ଦଦରା ଘରେ ଜଳେଶ୍ୱରର ଅଭାବୀ ମଣିଷ ରାଜ କୁମାରଙ୍କ ପରିବାର । ଉଠିଲା ପ୍ରଶ୍ନ, କାହା ପାଇଁ ସରକାରୀ ଆବାସ

କନକ ବ୍ୟୁରୋ : ପ୍ରକୃତରେ ସରକାରୀ ସହାୟତା କାହା ପାଇଁ? କେଉଁ ମାନ ଦଣ୍ଡରେ ପ୍ରଦାନ କରାଯାଉଛି ସରକାରୀ ସହାୟତା? ବାଲେଶ୍ବର ଭୋଗରାଇର ବ୍ଲକର ଏକ ଅଭାବୀ ପରିବାରର ଅବସ୍ଥା ଦେଖିବା ପରେ ଆପଣମାନେ ମଧ୍ୟ ଏଭଳି ପ୍ରଶ୍ନ କରିବେ । 

ଦୀର୍ଘ ୧୨ ବର୍ଷ ହେଲା ଭଙ୍ଗା ଦଦରା ଘରେ ଦିନ କାଟୁଛି ଦୁଃଖି ପରିବାର । ଆଜି ପର୍ଯ୍ୟନ୍ତ ଆବାସ ଯୋଜନାରେ ଘର ଖଣ୍ଡିଏ ମିଳିନାହିଁ । ଭୋଗରାଇ ବ୍ଲକ ନିମାତପୁର ଗ୍ରାମର ରାଜ କୁମାର ପରିଡ଼ା । ସ୍ତ୍ରୀ ଓ ଦୁଇ ପିଲାଙ୍କୁ ନେଇ ରାଜ କୁମାର ଏଇ ଘରେ ରହୁଛନ୍ତି । ଯେଉଁଠି କାନ୍ଥର ସ୍ଥାନ ନେଇଛି ଲୁଗା । ଛାତ ଦାୟିତ୍ୱ ମୁଣ୍ଡାଇଛି କଳା ପଲିଥିନ୍ । ଖରା, ବର୍ଷା, ଶୀତ ସବୁ ଏଇଠି ବିତୁଛି । କାରଣ ଅଭାବୀ ରାଜ କୁମାରଙ୍କ ଭାଗ୍ୟ ସରକାରୀ ଆବାସଟିଏ ଜୁଟି ନାହିଁ । 

ନିଜ ସ୍ୱଳ୍ପ ରୋଜଗାରରେ ପକ୍କା ଘରଟିଏ କରିବା ଦିବା ସ୍ୱପ୍ନ । ତେଣୁ ସରକାରୀ ଆବାସଟିଏ ପାଇଁ ସରପଞ୍ଚଙ୍କ ଠାରୁ ବ୍ଲକ କାର୍ଯ୍ୟାଳୟ ପାଖରେ ବାରମ୍ବାର ଗୁହାରି କରିଛନ୍ତି ରାଜ କୁମାର । ହେଲେ କେହି ତାଙ୍କ କଥା ଶୁଣିନାହାନ୍ତି କି କାହାରି ଆଖିକୁ ତାଙ୍କ ଦୁଃଖ ଦେଖାଯାଉନାହିଁ । ଏହି ପରିବାର ପ୍ରତି ସରକାରୀ ସହାୟତା ତ ନାହିଁ, କାହାରି ସହାନୁଭୂତି ବି ନାହିଁ । ସେପଟେ ଏହି ପରିବାରର ସମସ୍ୟା ବାବଦରେ ବିଡ଼ିଓଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇନାହିଁ । ବାତ୍ୟା ଦାନାରେ ପିଲାଙ୍କୁ ପଡ଼ୋଶୀ ଘରକୁ ପଠାଇ ସେହି ଭଙ୍ଗା ଘରେ ରାତି କାଟିଥିଲେ ରାଜ କୁମାର ଓ ପତ୍ନୀ ମଧୁମିତା ।