ବିଲ୍ ଦେବାକୁ ପଡ଼ିବ ବୋଲି ଭେଜ୍ ବିରିୟାନିରେ ମିଶାଇଲେ ହାଡ଼ : ସିସିଟିଭି ଫୁଟେଜରେ ନଜର ଆସିଲା ଯୁବକଙ୍କ ସତ

କନକ ନ୍ୟୁଜ୍ : ଏକ ରେଷ୍ଟୁରାଣ୍ଟକୁ କିଛି ଯୁବକ ଡିନର୍ କରିବାକୁ ଯାଉଛନ୍ତି , ଶ୍ରାବଣ ମାସ ଥିବାରୁ କିଛି ଯୁବକ ଭେଜ୍ ବିରିୟାନି ଅର୍ଡର କରିଥିବା ବେଳେ ଆଉ କିଛି ଯୁବକ ଚିକେନ୍ ବିରିୟାନି ଅର୍ଡର କରି ଖାଇବା ଆରମ୍ଭ କରୁଛନ୍ତି । କିନ୍ତୁ ଭେଜ୍ ବିରିୟାନିରେ ହଠାତ୍ ଗୋଟିଏ ହାଡ଼ ବାହାରୁଛି ଆଉ ତା’ପରେ ରେଷ୍ଟୁରାଣ୍ଟରେ ପାଟିତୁଣ୍ଡ ଆରମ୍ଭ ହେଉଛି । ଘଟଣାଟି ହେଉଛି ଉତ୍ତରପ୍ରଦେଶ ଗୋରଖପୁରର । ଏଠାରେ ଜଣେ ଯୁବକଙ୍କ ନିରାମିଷ ଖାଦ୍ୟରୁ ହାଡ଼ ମିଳିଥିବାକୁ ନେଇ ତୁମ୍ବିତୋଫାନ ଦେଖିବାକୁ ମିଳିଥିଲା । କିନ୍ତୁ ସିସିଟିଭି ଫୁଟେଜ୍ ଜମାନାରେ ଆଉ କିଛି ଲୁଚାଇବା ଭଳି ଘଟଣା ହୋଇନାହିଁ । ସିସିଟିଭି ଯାଞ୍ଚ୍ କରିବାରୁ ଜଣାପଡ଼ିଛି ଯେ ଯୁବକ ଜଣକ ନିଜେ ଖାଦ୍ୟରେ ହାଡ଼ ମିଶାଉଛନ୍ତି । ଆଉ ଏପରି କରିବାର କାରଣ ହେଉଛି ଅଧିକ ବିଲ୍ । ମୋଟ ବିଲ୍ ୪୦୦୦ ଟଙ୍କା ଆସିଥିବାରୁ ଯୁବକ ଏଭଳି କାଣ୍ଡ ଭିଆଇଛନ୍ତି । 

ଗୋରଖପୁରର କ୍ୟାଣ୍ଟ ଥାନା ଅଞ୍ଚଳର ଶାସ୍ତ୍ରୀ ଚୌକରେ ଥିବା ‘ବିରିୟାନି ବେ’ ରେଷ୍ଟୁରାଣ୍ଟରେ ଘଟିଛି ଏଭଳି ଘଟଣା । ଜୁଲାଇ ୩୧ ତାରିଖ ରାତି ୯ଟାରେ ୮ରୁ ୧୦ ଜଣ ଯୁବକ ବିରିୟାନି ଖାଇବାକୁ ଆସିଥିଲେ । ସେମାନଙ୍କ ମଧ୍ୟରୁ କିଛି ନନ୍‌ଭେଜ୍ ଏବଂ ଅନ୍ୟମାନେ ଭେଜ୍ ବିରିୟାନି ଅର୍ଡର କରିଥିଲେ । ଖାଇବାର କିଛି ସମୟ ପରେ ଜଣେ ଯୁବକ ଭେଜ୍ ବିରିୟାନିରେ ହାଡ଼ ମିଳିଥିବା ଅଭିଯୋଗ କରିଥିଲେ । ଯୁବକ ଶ୍ରାବଣ ମାସରେ ଭେଜ୍ ବିରିୟାନିରେ ହାଡ଼ ବାହାରିଥିବା ଅଭିଯୋଗ କରି ହଙ୍ଗାମା ଆରମ୍ଭ କରିଦେଇଥିଲେ । ଘଟଣାସ୍ଥଳରେ ପୁଲିସ ପହଞ୍ଚି ମାମଲାକୁ ଶାନ୍ତ କରିଥିଲା । ଏହି ସମୟରେ ରେଷ୍ଟୁରାଣ୍ଟ ମାଲିକ କହିଥିଲେ ଯେ ଯୁବକ ୪ ହଜାର ଟଙ୍କାର ବିଲ୍ ପୈଠ କରିନାହାନ୍ତି । କର୍ମଚାରୀମାନେ ଯେତେବେଳେ ସିସିଟିଭି ଫୁଟେଜ୍ ଯାଞ୍ଚ କଲେ ସେତେବେଳେ ସବୁ ସତ କଥା ସାମ୍ନାକୁ ଆସିଲା ।

गोरखपुर के एक रेस्टोरेंट में वेज बिरयानी में हड्डी मिलने का आरोप उस वक्त फर्जी निकला जब CCTV फुटेज में लड़कों की साजिश सामने आई। वीडियो में देखा गया कि उन्होंने खुद बिरयानी में हड्डी मिलाकर हंगामा किया। पुलिस ने जांच के बाद आरोपियों को रेस्टोरेंट से बाहर कर मामला शांत कराया.… pic.twitter.com/Q1uroSk5De

— ABP News (@ABPNews) August 4, 2025

ସିସିଟିଭିରେ ସ୍ପଷ୍ଟ ଦେଖାଯାଉଛି ଯେ ଜଣେ ଯୁବକ ମଝିରେ ବସିଥିବା ଯୁବକଙ୍କୁ ହାଡ଼ର ଖଣ୍ଡ ଦେଉଛି ଯାହାକୁ ସେ ଭେଜ୍ ଖାଉଥିବା ସାଙ୍ଗର ଥାଳିରେ ପକାଇ ଦେଉଛି । ଅଭିଯୋଗ ଅନୁସାରେ, ସେହି ଯୁବକମାନଙ୍କର ଖାଇବା ବିଲ୍ ୫ ରୁ ୬ ହଜାର ଟଙ୍କା ହୋଇଥିଲା ଏବଂ ସେମାନେ ଏହାର ଟଙ୍କା ଦେବାକୁ ଚାହୁନଥିଲେ ଯେଉଁ କାରଣରୁ ସେମାନେ ଏପରି କରିଥିଲେ । ଏହି ଘଟଣା ଉପରେ ରେଷ୍ଟୁରାଣ୍ଟର ମାଲିକ ରବିକର ସିଂ କହିଛନ୍ତି ଯେ ସେମାନଙ୍କ ରେଷ୍ଟୁରାଣ୍ଟରେ ନନ୍‌ଭେଜ୍ ଏବଂ ଭେଜ୍ ଦୁଇଟି ଅଲଗା ଅଲଗା ଭାବରେ ତିଆରି କରାଯାଏ । ଅନ୍ୟ କାହା ଥାଳିରେ ହାଡ଼ ନାହିଁ କେବଳ ଏମାନଙ୍କ ଥାଳିରେ ହାଡ଼ କେମିତି ଆସିଲା । ସେ ପୁଲିସକୁ କହିଥିଲେ ଯେ ବିଲ୍ ଅଧିକ ଆସିଛି ସେଥିପାଇଁ ଏମାନେ ହଙ୍ଗାମା କରୁଛନ୍ତି । ସେ ଆହୁରି ମଧ୍ୟ କହିଥିଲେ ଯେ ସେ ୧୫ ବର୍ଷ ଧରି ରେଷ୍ଟୁରାଣ୍ଟ ବ୍ୟବସାୟ ସହିତ ଜଡ଼ିତ ଅଛନ୍ତି ଏବଂ କାହାରି ଭାବନାକୁ ଆଘାତ ଦେବା ତାଙ୍କର କାମ ନୁହେଁ । ଘଟଣାସ୍ଥଳରେ ପୁଲିସ ମଧ୍ୟ ସିସିଟିଭି ଫୁଟେଜ୍ ଦେଖି ଯୁବକମାନଙ୍କୁ ଧକ୍କା ମାରି ବାହାର କରିଦେଇଥିଲା । ଏହି ଘଟଣାର ଏକ ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେଉଛି ଯେଉଁଥିରେ କିଛି ଯୁବକ ନନ୍‌ଭେଜ୍ ଥାଳିରୁ ହାଡ଼ ନେଇ ଭେଜ୍ ଥାଳିରେ ରଖୁଥିବା ଦେଖାଯାଉଛି ।