ଇଡି ରାଡାର୍‌ରେ ଗୁଗଲ୍ ଓ ମେଟା, ପଚରାଉଚରା ପାଇଁ ସମନ ଜାରି

କନକ ବ୍ୟୁରୋ: ଗୁଗଲ୍ ଓ ମେଟାକୁ ଇଡି ନୋଟିସ୍‌  । ଅନ୍‌ଲାଇନ୍‌ ବେଟିଂ ଆପ୍‌ ମାମଲାରେ ଗୁଗଲ୍ ଓ ମେଟାକୁ ଇଡି ନୋଟିସ୍‌ ପଠାଇଛି । ଉଭୟ କମ୍ପାନୀର ପ୍ରତିନିଧିଙ୍କୁ ପଚରାଉଚରା ପାଇଁ ଜାରି ହୋଇଛି ନୋଟିସ୍‌ । ଉଭୟଙ୍କୁ ଜୁଲାଇ ୧୨ରେ ହାଜର ହେବା ପାଇଁ ଇଡି ସମନ କରିଛି ।   ଅନ୍‌ଲାଇନ୍‌ ବେଟିଂ ଆପ୍‌କୁ ପ୍ରୋତ୍ସାହିତ କରୁଥିବା ଅଭିଯୋଗରେ ଇଡି ସମନ କରିଛି । ମହାଦେବ ଅନଲାଇନ୍ ବେଟିଂ ଆପ୍ ସହ ଜଡ଼ିତ ହଜାର ହଜାର କୋଟି ଟଙ୍କାର ବେଆଇନ କାରବାରର ତଦନ୍ତ ପରିସରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । 

କାହିଁକି ଜାରି ହେଲା ସମନ?
ଇଡି ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗୁଗଲ୍ ଏବଂ ମେଟାର ପ୍ଲାଟଫର୍ମଗୁଡିକରେ ଏହି ବେଆଇନ ବେଟିଂ ଆପ୍‌ଗୁଡ଼ିକର ବ୍ୟାପକ ବିଜ୍ଞାପନ କରାଯାଉଥିଲା । ଏହି ଆପ୍‌ଗୁଡ଼ିକ ନିଜର ପ୍ରଚାର ପାଇଁ ଡିଜିଟାଲ୍ ମାର୍କେଟିଂ ଉପରେ ବହୁଳ ଭାବରେ ନିର୍ଭରଶୀଳ ଥିଲେ । ତଦନ୍ତରୁ ଜଣାପଡିଛି ଯେ ଏହି ବେଟିଂ ପ୍ଲାଟଫର୍ମଗୁଡ଼ିକ ଭାରତରେ ନିଜର ବ୍ୟବସାୟର ପ୍ରସାର ପାଇଁ ବିଜ୍ଞାପନ ବାବଦରେ ପ୍ରାୟ ୪,୦୦୦ କୋଟି ଟଙ୍କା ଖର୍ଚ୍ଚ କରିଛନ୍ତି । ଏହି ବିପୁଳ ପରିମାଣର ଅର୍ଥର ଏକ ବଡ଼ ଅଂଶ ଗୁଗଲ୍ ଏବଂ ମେଟାକୁ ବିଜ୍ଞାପନ ଶୁଳ୍କ ଭାବରେ ଦିଆଯାଇଥିବା ଇଡି ସନ୍ଦେହ କରୁଛି । ତେଣୁ, ଇଡି ଏହି କମ୍ପାନୀଗୁଡ଼ିକଠାରୁ ଜାଣିବାକୁ ଚାହୁଁଛି ଯେ ଏହି ବିଜ୍ଞାପନଗୁଡ଼ିକ ପାଇଁ ସେମାନଙ୍କୁ କେତେ ଟଙ୍କା ଏବଂ କେଉଁ ମାଧ୍ୟମରେ ଦିଆଯାଇଥିଲା । ଏହି ଅର୍ଥ କାରବାରର ସମ୍ପୂର୍ଣ୍ଣ ବିବରଣୀ ହାସଲ କରିବା ହିଁ ଇଡିର ମୁଖ୍ୟ ଉଦ୍ଦେଶ୍ୟ ।  

କ'ଣ ଏହି ମହାଦେବ ବେଟିଂ ଆପ୍ ମାମଲା?
ମହାଦେବ ଅନଲାଇନ୍ ବୁକ୍ ହେଉଛି ଏକ ବେଆଇନ ଅନଲାଇନ୍ ବେଟିଂ ପ୍ଲାଟଫର୍ମ। ଏହା କ୍ରିକେଟ୍, ଫୁଟବଲ୍, ଟେନିସ୍, କାର୍ଡ୍ ଗେମ୍ ଏବଂ କ୍ୟାସିନୋ ଭଳି ବିଭିନ୍ନ ଖେଳ ଉପରେ ବାଜି ଲଗାଇବାର ସୁଯୋଗ ଦେଉଥିଲା। ଏହାର ମୁଖ୍ୟ ପ୍ରମୋଟରମାନେ ଦୁବାଇରୁ ଏହି ସମଗ୍ର ନେଟୱର୍କକୁ ପରିଚାଳନା କରୁଥିଲେ। ଏହି ଆପ୍ ମାଧ୍ୟମରେ ପ୍ରାୟ ୬,୦୦୦ କୋଟି ଟଙ୍କାରୁ ଅଧିକ ଟଙ୍କାର ହେରଫେର ହୋଇଥିବା ଅନୁମାନ କରାଯାଉଛି। ଏହି ମାମଲାରେ ଅନେକ ବଡ଼ ରାଜନେତା, ବଲିଉଡ ଅଭିନେତା ଏବଂ ବ୍ୟବସାୟୀଙ୍କ ସମ୍ପୃକ୍ତି ଥିବା ନେଇ ମଧ୍ୟ ତଦନ୍ତ ଜାରି ରହିଛି। ଇଡି ଏହି ମାମଲାରେ ବ୍ୟାପକ ତଦନ୍ତ ଚଳାଇ ଏପର୍ଯ୍ୟନ୍ତ ଦେଶର ବିଭିନ୍ନ ସ୍ଥାନରୁ ଅନେକ ଲୋକଙ୍କୁ ଗିରଫ କରିବା ସହ ଶହ ଶହ କୋଟି ଟଙ୍କାର ସମ୍ପତ୍ତି ଜବତ କରିସାରିଲାଣି।

ଆଗାମୀ ପଦକ୍ଷେପ
ଗୁଗଲ୍ ଏବଂ ମେଟାର ଅଧିକାରୀମାନେ ଇଡି ସମ୍ମୁଖରେ ହାଜର ହୋଇ ବିଜ୍ଞାପନ ସମ୍ବନ୍ଧୀୟ ସମସ୍ତ ତଥ୍ୟ ଏବଂ ଆର୍ଥିକ କାରବାରର ବିବରଣୀ ପ୍ରଦାନ କରିବେ। ଏହି ପଚରାଉଚରାରୁ ମିଳିବାକୁ ଥିବା ତଥ୍ୟ ଆଧାରରେ ଇଡି ମନି ଲଣ୍ଡରିଂର ଗୁମର ଖୋଲିବାରେ ସକ୍ଷମ ହେବ ବୋଲି ଆଶା କରାଯାଉଛି। ଯଦି ଏହି ଟେକ୍ କମ୍ପାନୀଗୁଡ଼ିକର କୌଣସି ଅବହେଳା କିମ୍ବା ସିଧାସଳଖ ସମ୍ପୃକ୍ତିର ପ୍ରମାଣ ମିଳେ, ତେବେ ସେମାନଙ୍କ ବିରୁଦ୍ଧରେ ମଧ୍ୟ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ।   ଆଭିମୁଖ୍ୟ ଗ୍ରହଣ କରିଛନ୍ତି ।