ଆମେରିକାରୁ ଆସିଲା ଖୁସି ଖବର: ଭାରତ ଉପରୁ ଟାରିଫ୍ ହଟାଇବେ ଟ୍ରମ୍ପ!

କନକ ବ୍ୟୁରୋ: ଆମେରିକାରୁ ଭାରତ ପାଇଁ ଏକ ବଡ଼ ଖୁସି ଖବର ଆସିଛି । ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ସେ ଭାରତ ଉପରେ ଟାରିଫକୁ ଅଧା ଅର୍ଥାତ୍ 50% ହ୍ରାସ କରିବେ । ଟ୍ରମ୍ପଙ୍କ ତରଫରୁ ଏହା ମଧ୍ୟ ସ୍ପଷ୍ଟ କରାଯାଇଛି ଯେ ରୁଷିଆ ତେଲ କ୍ରୟ ହିଁ ସେହି ବଡ଼ କାରଣ ଥିଲା, ଯେଉଁଥିପାଇଁ ଭାରତ ଉପରେ ଲଗାଯାଇଥିବା ଟାରିଫକୁ ଦ୍ୱିଗୁଣିତ କରାଯାଇଥିଲା । ବର୍ତ୍ତମାନ ସେ ଏହି ଉଚ୍ଚ ଟାରିଫକୁ କମ୍ କରିବାକୁ ଘୋଷଣା କରିଛନ୍ତି ।

ଡୋନାଲ୍ଡ ଟ୍ରମ୍ପ କହିଛନ୍ତି ଯେ, 'ବର୍ତ୍ତମାନ ରୁଷର ତେଲ ଯୋଗୁଁ ଭାରତ ଉପରେ ଟାରିଫ ବହୁତ ଅଧିକ ଅଛି । କିନ୍ତୁ ସେ ବର୍ତ୍ତମାନ ଋଷିଆଠାରୁ ତୈଳ କ୍ରୟକୁ କମ୍ କରିଛନ୍ତି ।' ଆମେରିକୀୟ ରାଷ୍ଟ୍ରପତି ଆହୁରି କହିଛନ୍ତି ଯେ ଏହି କାରଣରୁ ବର୍ତ୍ତମାନ ଆମେ ମଧ୍ୟ ଭାରତ ଉପରେ ଲଗାଇଥିବା ଟାରିଫକୁ କମ୍ କରିବୁ । ଏହା ପୂର୍ବରୁ ଟ୍ରମ୍ପ ଭାରତ ସହିତ ବ୍ୟାପାର ସମ୍ବନ୍ଧରେ ନରମ ଆଭିମୁଖ୍ୟର ସଙ୍କେତ ଦେଇ କହିଥିଲେ ଯେ ଆମେ ଭାରତ ସହିତ ଟ୍ରେଡ ଡିଲର ବହୁତ ନିକଟରେ ଅଛୁ, ଶୀଘ୍ର ଭାରତୀୟ ସାମଗ୍ରୀ ଉପରେ ଲଗାଯାଇଥିବା ଉଚ୍ଚ ଟାରିଫରେ ହ୍ରାସ କରାଯାଇପାରେ।

ଆହୁରି ପଢ଼ନ୍ତୁ... ଦିଲ୍ଲୀ ବ୍ଲାଷ୍ଟ ପଛରେ ରହିଛି କି ପାକିସ୍ତାନର ହାତ ? ଗିରଫ ଶାହୀନ ଶାହିଦ୍‌ଙ୍କ ଅଛି ମସୁଦ ଅଜହରର ଭଉଣୀ ସହ ଲିଙ୍କ୍

ଉଲ୍ଲେଖଯୋଗ୍ୟ ଯେ ଡୋନାଲ୍ଡ ଟ୍ରମ୍ପ ପ୍ରଥମେ ଭାରତ ଉପରେ ୨୫ ପ୍ରତିଶତର ରେସିପ୍ରୋକାଲ ଲଗାଇଥିଲେ । କିନ୍ତୁ କିଛି ମାସ ପରେ ଏହାକୁ ହଠାତ୍ ବଢ଼ାଇ ୫୦%  କରିଦିଆଯାଇଥିଲା । ଟ୍ରମ୍ପ ଭାରତ ଉପରେ ରୁଷୀୟ ତେଲ ଏବଂ ଅସ୍ତ୍ରଶସ୍ତ୍ର କ୍ରୟ କରି ଭ୍ଲାଦିମିର ପୁଟିନଙ୍କ ୟୁକ୍ରେନ ଯୁଦ୍ଧରେ ଆର୍ଥିକ ସହାୟତା କରିବାର ଅଭିଯୋଗ ଲଗାଇଥିଲେ । କେବଳ ଟ୍ରମ୍ପ ନୁହଁନ୍ତି, ବରଂ ତାଙ୍କ ମନ୍ତ୍ରୀମାନେ ମଧ୍ୟ ଏହି ପ୍ରସଙ୍ଗରେ ଭାରତ ଉପରେ ଲଗାତାର ଟାର୍ଗେଟ୍ କରୁଥିଲେ ।

ଯଦି ଭାରତ ଏବଂ ଆମେରିକା ମଧ୍ୟରେ ଟ୍ରେଡ ଡିଲକୁ ନେଇ ଅପଡେଟ୍ କଥା କହିବା, ତେବେ ଉଭୟ ଦେଶ ମଧ୍ୟରେ ବ୍ୟାପାର ବାର୍ତ୍ତା ଚଳିତ ବର୍ଷ ଫେବୃଆରୀ ୨୦୨୫ରେ ଆରମ୍ଭ ହୋଇଥିଲା । ଭାରତ ଏବଂ ଆମେରିକାର ନେତାମାନେ ନିଜ ଅଧିକାରୀମାନଙ୍କୁ ଏକ ପ୍ରସ୍ତାବିତ ଦ୍ୱିପାକ୍ଷିକ ବ୍ୟାପାର ଚୁକ୍ତି ଉପରେ ବାର୍ତ୍ତା ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ ।

କିନ୍ତୁ, ଯେତେବେଳେ ଟାରିଫର ଡବଲ ଆଟାକ୍ ହେଲା, ସେତେବେଳେ ଏହି ଟ୍ରେଡ ଡିଲ୍ ଉପରେ ବ୍ରେକ୍ ଲାଗିଲା । ଏହା ପୂର୍ବରୁ ପାଞ୍ଚ ପର୍ଯ୍ୟାୟର ବାର୍ତ୍ତା ଶେଷ ହୋଇସାରିଥିଲା । ଅଗଷ୍ଟରେ ଟ୍ରମ୍ପ ଭାରତ ଉପରେ ଟାରିଫ ୫୦% କରିଥିଲେ ଏବଂ ସେତେବେଳେ କଥା ଅଟକି ଯାଇଥିଲା । ତେବେ, ଏହାପରେ ବର୍ତ୍ତମାନ ଲଗାତାର ଏହାର ସକାରାତ୍ମକ ଭାବରେ ଆଗକୁ ବଢ଼ିବାର ଅପଡେଟ୍ ସାମ୍ନାକୁ ଆସୁଛି ।

ଏଠାରେ କହି ରଖୁଛୁ ଯେ ଡୋନାଲ୍ଡ ଟ୍ରମ୍ପଙ୍କ ତରଫରୁ ଗତ କିଛି ଦିନ ମଧ୍ୟରେ ଲଗାତାର ଏପରି ବୟାନ ଦିଆଯାଇଛି, ଯେଉଁଥିରେ କୁହାଯାଇଛି ଯେ ଭାରତ ରୁଷୀୟ ତେଲର କ୍ରୟକୁ କମ୍ କରିଦେଇଛି, କିମ୍ବା ଏହାକୁ ବନ୍ଦ କରୁଛି । ଏତିକି ନୁହେଁ ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରୁଥିବା ମଧ୍ୟ ନଜର ଆସିଛନ୍ତି । ତେବେ, ଭାରତ ଏପରି କୌଣସି ଦାବିର ବର୍ତ୍ତମାନ ପର୍ଯ୍ୟନ୍ତ ପୁଷ୍ଟି କରିନାହିଁ ।