ଓଏଚପିସି କର୍ମଚାରୀଙ୍କ ପାଇଁ ଖୁସି ଖବର: ୟୁନିଅନ୍ ବ୍ୟାଙ୍କ ସହ ବୁଝାମଣାପତ୍ର ସ୍ୱାକ୍ଷର, ମିଳିବ ୧.୨୦ କୋଟିର ବୀମା ସୁବିଧା

କନକ ବ୍ୟୁରୋ: ଓଡ଼ିଶା ହାଇଡ୍ରୋ ପାୱାର କର୍ପୋରେସନ ଲିମିଟେଡ ବା OHPCର କର୍ମଚାରୀମାନଙ୍କ କଲ୍ୟାଣ ପାଇଁ ଆଜି ଏକ ବଡ଼ ପଦକ୍ଷେପ ନିଆଯାଇଛି । ଲୋକସେବା ଭବନଠାରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଓଏଚପିସି ଏବଂ ୟୁନିଅନ୍ ବ୍ୟାଙ୍କ ଅଫ୍ ଇଣ୍ଡିଆ ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଛି । ଏହି ବୁଝାମଣା ଅନୁଯାୟୀ, କର୍ମଚାରୀମାନଙ୍କୁ ‘କଷ୍ଟମାଇଜଡ୍ ୟୁନିଅନ୍ ସୁପର ସାଲାରୀ ଆକାଉଣ୍ଟ୍’ ମାଧ୍ୟମରେ ଅନେକ ଆକର୍ଷଣୀୟ ସୁବିଧା ପ୍ରଦାନ କରାଯିବ ।

ଉପ-ମୁଖ୍ୟମନ୍ତ୍ରୀ (କୃଷି, କୃଷକ ସଶକ୍ତିକରଣ ଏବଂ ଶକ୍ତି ବିଭାଗ) କନକ ବର୍ଦ୍ଧନ ସିଂ ଦେଓଙ୍କ ଉପସ୍ଥିତିରେ ଏହି ସମାରୋହ ଅନୁଷ୍ଠିତ ହୋଇଥିଲା । ଓଏଚପିସି ପକ୍ଷରୁ ବରିଷ୍ଠ ମହାପ୍ରବନ୍ଧକ ଗଗନ ବିହାରୀ ମହାରଣା ଏବଂ ୟୁନିଅନ୍ ବ୍ୟାଙ୍କ ପକ୍ଷରୁ ଉପ ମହାପ୍ରବନ୍ଧକ ଏନ. ବାରିକ ଏହି ଚୁକ୍ତିରେ ସ୍ୱାକ୍ଷର କରିଥିଲେ । ଏହି ଅବସରରେ ଶକ୍ତି ବିଭାଗର ପ୍ରମୁଖ ସଚିବ ତଥା ଓଏଚପିସି ସିଏମଡି ବିଶାଳ କୁମାର ଦେବ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ଏହି ନୂତନ ସାଲାରୀ ଆକାଉଣ୍ଟ୍ କେବଳ ବ୍ୟାଙ୍କିଙ୍ଗ୍ ସେବା ନୁହେଁ, ବରଂ କର୍ମଚାରୀ ଓ ସେମାନଙ୍କ ପରିବାର ପାଇଁ ଏକ ସୁରକ୍ଷା କବଚ ଭାବେ କାର୍ଯ୍ୟ କରିବ:

ମୋଟା ଅଙ୍କର ବୀମା: ପ୍ରତ୍ୟେକ କର୍ମଚାରୀଙ୍କୁ ୧.୨୦ କୋଟି ଟଙ୍କାର ବ୍ୟକ୍ତିଗତ ଦୁର୍ଘଟଣା ବୀମା ଏବଂ ୨୦ ଲକ୍ଷ ଟଙ୍କାର ଅତିରିକ୍ତ ଟର୍ମ ଜୀବନ ବୀମା ସୁବିଧା ମିଳିବ ।

ସ୍ୱାସ୍ଥ୍ୟ ସେବା: ବାର୍ଷିକ ୩୦,୦୦୦ ଟଙ୍କାର ହସ୍ପିଟାଲ ନଗଦ ଲାଭ ଏବଂ ପ୍ରତି ତିନି ମାସରେ ଥରେ ମାଗଣା ସ୍ୱାସ୍ଥ୍ୟ ଯାଞ୍ଚର ସୁବିଧା ରହିଛି ।
RuPay ସିଲେକ୍ଟ ଡେବିଟ୍ କାର୍ଡ: ଶୂନ୍ୟ ବାଲାନ୍ସ ଆକାଉଣ୍ଟ ସହ ଏକ ପ୍ରିମିୟମ ଡେବିଟ୍ କାର୍ଡ ମିଳିବ, ଯେଉଁଥିରେ ଅତିରିକ୍ତ ୧୫ ଲକ୍ଷ ଟଙ୍କାର ଦୁର୍ଘଟଣା ବୀମା କଭରେଜ୍ ରହିଛି ।

ଅନ୍ୟାନ୍ୟ ସୁବିଧା: ମାଗଣା ବିମାନବନ୍ଦର ଲାଉଞ୍ଜ ସୁବିଧା ଏବଂ ବାର୍ଷିକ ୭୫,୦୦୦ ଟଙ୍କା ମୂଲ୍ୟର ଜୀବନଶୈଳୀ ଉପହାର ମଧ୍ୟ ଏହି ପ୍ୟାକେଜରେ ସାମିଲ ଅଛି ।