ଭତ୍ତା ଟଙ୍କା ପାଇଁ ବ୍ୟାଙ୍କ ଯାଉଥିଲେ, ଚାଲିଗଲା ଜୀବନ

କନକ ବ୍ୟୁରୋ : ଭତ୍ତା ଟଙ୍କା ପାଇଁ ବ୍ୟାଙ୍କରେ ପହଞ୍ଚି ପାରିଲେନି ବୃଦ୍ଧା। କୋରାପୁଟ ବନ୍ଧୁଗାଁ ବ୍ଳକ ବାଉଁଶପୁଟ ଗାଁରୁ ଦୁଇଜଣ ବୃଦ୍ଧା ବାର୍ଦ୍ଧକ୍ୟ ଭତ୍ତା ଟଙ୍କା ଉଠାଇବା ପାଇଁ ୫ କିଲୋମିଟର ରାସ୍ତା ଚାଲି ଆସୁଥିବା ବେଳେ ବାଟରେ ଜଣକର ମୃତ୍ୟୁ ହୋଇଯାଇଅଛି। ଶୁକ୍ରବାର ସକାଳ ୧୧ ଘଣ୍ଟା ସମୟରେ ନିଜ ଗାଁ ରୁ ସୋନାଇ ମେଲେକା ଓ ବଡ଼ ଭଉଣୀ  କାନ୍ତା ମେଲେକା ୮୩ ବର୍ଷ  ଦୁଇଜଣ ନିଜ ପାଖରେ ଭତ୍ତା କାର୍ଡ ଧରି ବାହାରି ଥିଲେ। କାନ୍ତା ମେଲେକା ଭଲ ଭାବରେ ଦେଖି ପାରନ୍ତି ନାହିଁ, ଅସୁସ୍ଥ ଥିବା ଯୋଗୁଁ ସେ ଚାଲିବା କଷ୍ଟକର ରହିଥିଲା।  ଦୁଇ ଭଉଣୀ ଭତ୍ତା ପାଇବା ପାଇଁ ଅନ୍ଧ ଭଉଣୀକୁ ବାଡି ଧରେଇ କଷ୍ଟରେ ବ୍ୟାଙ୍କକୁ ଯିବା ପାଇଁ ବାହାରି ଥିଲେ।  ବୃଦ୍ଧା ଜଣକ  ଦୂର ରାସ୍ତା ଚାଲି  ଭତ୍ତା ଟଙ୍କା ପାଇଁ  କିସ୍କୋ ବ୍ୟାଙ୍କକୁ ଯାଇଥିଲେ। ସେଠାରେ ପ୍ରବଳ ଭିଡ଼ ଥିବାରୁ ଟଙ୍କା ନ ଉଠାଇ ଦୁଇ ଭଉଣୀ ପୁନର୍ବାର ଚାଲି ଚାଲି ଫେରି ଆସି ଜୟଗୁଡା ଗାଁକୁ ଯାଉଥିଲେ। ଅପରାହ୍ନ ୫ ଘଣ୍ଟା ସମୟରେ ବୃଦ୍ଧା ଜଣକ ଗାଁ ଠାକୁରାଣୀ ମନ୍ଦିର ମଣ୍ଡପ ଦେଇ ଯାଉଥିବା ପାଦଚଲା ରାସ୍ତା ନିକଟରେ ବସି ପଡ଼ିଥିଲେ। ପାଖରେ ଭଲିବଲ ଖେଳୁଥିବା ଯୁବକ ମାନେ ଯାଇ ଜୀବିତ ଅବସ୍ଥାରେ ଥିବା ବୃଦ୍ଧାକୁ ଖୋଲା ପଡିଆକୁ ଆଣି ଥିଲେ।

ରାତ୍ରରେ ଥଣ୍ଡା କାକରରେ ପୁଣି ଅସୁସ୍ଥତା ପାଇଁ ପଡ଼ି ରହିବାରୁ ବୃଦ୍ଧାଙ୍କ  ରାତି ୧୨ ଘଣ୍ଟା ସମୟରେ ମୃତ୍ୟୁ ହୋଇଥିବା ସୋନାଇ ମେଲେକା ୭୫ ବର୍ଷ  ଜଣାଇ ଥିଲେ। ସ୍ଥାନୀୟ ୟୁ ଜି ବ୍ୟାଙ୍କ ମ୍ୟାନେଜରଙ୍କ ଠାରୁ ପ୍ରାପ୍ତ ସୁଚନା ଅନୁଯାଇ ବୃଦ୍ଧା ଜଣକ ଚଳିତ ମାସର ଭତ୍ତା ଟଙ୍କା ନିଜ ଜମା ଖାତାକୁ ଆସିଥିଲେ ମଧ୍ୟ ଟଙ୍କା ଉଠାଇ ନାହାନ୍ତି। ପ୍ରତି ମାସରେ ଦୁଇ ଜଣ ବୃଦ୍ଧା ସ୍ଥାନୀୟ କିସ୍କ ବ୍ୟାଙ୍କକୁ ଯାଇ ଉଠାଇଥାନ୍ତି। ସ୍ଥାନୀୟ ସରପଞ୍ଚ ଲକ୍ଷ୍ମୀ କାଡ୍ରାକା  ଅତ୍ୟଧିକ ବୃଦ୍ଧ ବୃଦ୍ଧାଙ୍କୁ ବ୍ୟାଙ୍କରେ ନ ଦେଇ ହାତରେ ନେଇ ଭତ୍ତା ଟଙ୍କା ଦେବା ପାଇଁ ଜିଲ୍ଲାପାଳ ଓ ପଞ୍ଚାୟତ ସ୍ତରୀୟ ଅଭିଯୋଗ ଶୁଣାଣିରେ ଅନୁରୋଧ କରିଥିଲେ ହେଁ କିଏ ମଧ୍ୟ ଗୁରୁତ୍ତ୍ଵ ଦେଇ ନ ଥିଲେ । ବନ୍ଧୁଗାଁ ବ୍ଲକ ଆନ୍ଧ୍ର ସୀମାନ୍ତ ଅଞ୍ଚଳକୁ ଲାଗି ରହିଛି ଓ ଗାଁ ଗୁଡିକ ବଡ ବଡ ପାହାଡ ଉପରେ ଥିବାରୁ ଅନେକ ବୟସ୍କ ବ୍ୟକ୍ତି ଭତ୍ତା ଆଣିବା ପାଇଁ ଆସିବା ସହ ଫେରି ଯିବା ଅନେକ ଅସୁବିଧାର ସମ୍ମୁଖୀନ ହେଉଛନ୍ତି। ସରକାର ଏଥିପ୍ରତି ପଦକ୍ଷେପ ଗ୍ରହଣ କରି ବୟସ୍କ ଲୋକଙ୍କୁ ନିଜ ଘରେ ନେଇ ଭତ୍ତା ଟଙ୍କା ଦେବା ପାଇଁ ବ୍ଲକ ର ଜନସାଧାରଣ ଅନୁରୋଧ କରିଛନ୍ତି।

ଆମ ଗଣମାଧ୍ୟମ ତରଫରୁ ବିଡ଼ିଓ ଅବିନାଶ ବିଶ୍ୱଜିତ ସେଠୀଙ୍କୁ ଫୋନ ମାଧ୍ୟମରେ ଯୋଗାଯୋଗ କରିବାରୁ ଅସହାୟ ବୃଦ୍ଧାଙ୍କ ଶବ ନେବା ପାଇଁ ମେଡିକାଲ ରୁ ଆମ୍ବୁଲାନ୍ସ ପଠାଇ ଥିଲେ। ବାଉଁଶପୁଟ ଗାଁରୁ ପୂର୍ବତନ ସରପଞ୍ଚ ନାଗା କାଡ୍ରାକା, ନାର୍ଷାଣା ହାରାକା, ପୋଲେୟା କାଡ୍ରାକା ଓ ୱାର୍ଡ ମେମ୍ବର ଲିମ୍ବେ ମେଲେକା ଓ ସମ୍ପର୍କୀୟ ଉପସ୍ଥିତ ରହି ଶବ ସତ୍କାର କରିଥିଲେ। ଏ ନେଇ ଆମେ କୋରାପୁଟ ଉପଜିଲ୍ଲାପାଳ ବେଣୁଧର ଶବରଙ୍କୁ ଭେଟିଥିଲୁ ସେ କହିଲେ ଏମିତି ହେବା କଥା ନୁହେଁ। କେଉ ପରିସ୍ଥିତି ରେ ଏମିତି ହେଳା ତାହା ତଦନ୍ତ କରାଯିବ। ବୃଦ୍ଧ ବୃଦ୍ଧାଙ୍କୁ ଘରଘରକୁ ଯାଇ ଭତା ଦେବାର ନିୟମ ରହିଛି । ତଥାପି ଏ ନେଇ ଆମେ ବିଡ଼ିଓ ମାନକ ସହ ଆଲୋଚନା କରିବୁ ବୋଲି ନିଜ ପ୍ରତିକ୍ରିୟାରେ କହିଛନ୍ତି ଉପଜିଲ୍ଲାପାଳ ବେଣୁଧର ସବର।