୨୦୮୦ ପରଠୁ କମିବ ବିଶ୍ୱ ଜନସଂଖ୍ୟା, ରିପୋର୍ଟ ଚିନ୍ତାଜନକ କହିଲେ ବିଶେଷଜ୍ଞ

କନକ ବ୍ୟୁରୋ: ୨୦୮୦ ମସିହା ପରେ ବିଶ୍ୱ ଜନସଂଖ୍ୟା ହ୍ରାସ ପାଇବ । ସେପର୍ଯ୍ୟନ୍ତ ଲୋକଙ୍କ ସଂଖ୍ୟା ବୃଦ୍ଧି ପାଇବ ଏବଂ ପ୍ରାୟ ୧୦.୮ ବିଲିୟନ  ବା ୧୦୮୦ କୋଟିରେ ପହଞ୍ଚିବ । ମିଳିତ ଜାତିସଂଘର ଏକ ରିପୋର୍ଟ ଅନୁଯାୟୀ, ୨୧୦୦ ସୁଦ୍ଧା ବିଶ୍ୱରେ ୧୦ କୋଟି ଲୋକ କମିବେ । ବିଶେଷଜ୍ଞମାନେ ବିଶ୍ୱ ଜନସଂଖ୍ୟା ହ୍ରାସକୁ ଏକ ଚିନ୍ତାର କାରଣ ବୋଲି କହିଛନ୍ତି । ୨୦୨୨ରେ ବିଶ୍ୱ ଜନସଂଖ୍ୟା ୮୦୦ କୋଟିରେ ପହଞ୍ଚିଛି, ଯାହା ଏକ ଶତାବ୍ଦୀ ପୂର୍ବ ତୁଳନାରେ ଚାରି ଗୁଣ ଅଧିକ । ଭାରତ ଭଳି ଦେଶରେ ଜନସଂଖ୍ୟା ବୃଦ୍ଧି ମଧ୍ୟ ଏକ ପ୍ରସଙ୍ଗ । ଅନ୍ୟପକ୍ଷରେ ଜାପାନ ତା’ର ଜନସଂଖ୍ୟା ବୃଦ୍ଧି ପାଇଁ ସଂଘର୍ଷ କରୁଛି । ଭଲ ଖବର ହେଉଛି, ଅତି କମ୍‌ରେ ଆଗାମୀ ୫୫ ବର୍ଷ ପର୍ଯ୍ୟନ୍ତ ଲୋକଙ୍କ ସଂଖ୍ୟା ହ୍ରାସ ପାଇବ ନାହିଁ ।

ଦୁନିଆରେ କମ୍ ଲୋକ ରହିବା ବି ଏକ ସମସ୍ୟା । ଏହା ମୁଖ୍ୟତଃ ଧନୀ, ବିକଶିତ ଦେଶମାନଙ୍କରେ ଦେଖାଯିବ, ଯେଉଁଠାରେ ମହିଳା ଶିକ୍ଷା ଓ ଅନ୍ୟାନ୍ୟ ଅଧିକାର ଜନସଂଖ୍ୟା ହ୍ରାସର ମୁଖ୍ୟ କାରଣ ହେବ । ବଢୁଥିବା ସମାନତା ଓ ସୁଯୋଗ ସହିତ ମହିଳାମାନେ ଶିଶୁ ଜନ୍ମ କରିବା ଅପେକ୍ଷା କ୍ୟାରିୟର ବାଛିବାର ସମ୍ଭାବନା ଅଧିକ । ଅନ୍ୟ ଏକ କାରଣ ହେଉଛି, ଜୀବନଯାପନର ମୂଲ୍ୟ ବୃଦ୍ଧି । ସବୁକିଛି ମହଙ୍ଗା ହେବା ସହିତ ଲୋକମାନେ ସନ୍ତାନ ଜନ୍ମ କରିବାକୁ ଆଗ୍ରହୀ ନୁହନ୍ତି । ଯେଉଁମାନେ ସନ୍ତାନ ଜନ୍ମ ନ କରିବାକୁ ପସନ୍ଦ କରନ୍ତି ସେମାନଙ୍କ ଉପରେ ଟିକସ ଲାଗୁ କରିବାକୁ ମଧ୍ୟ କେତେକ ପରାମର୍ଶ ଦିଅନ୍ତି, ଯଦିଓ ଏହି ଧାରଣାକୁ ଅଯୌକ୍ତିକ ବୋଲି କୁହାଯାଉଛି ।