ଜର୍ମାନୀ-ଭାରତ ୮ ବିଲିୟନ ଡଲାରର ବୁଡ଼ାଜାହାଜ ଚୁକ୍ତି ସ୍ୱାକ୍ଷର କରିବେ

କନକ ବ୍ୟୁରୋ : ଭାରତ ଏବଂ ଜର୍ମାନୀ ରଣନୈତିକ ସହଭାଗୀତାର ୨୫ ବର୍ଷ ପୂରଣ କରିଛନ୍ତି । ଜର୍ମାନ ଚାନ୍ସେଲର ଫ୍ରେଡ୍ରିକ୍ ମର୍ଜ ୨ ଦିନିଆ ଭାରତ ଗସ୍ତରେ ଆସୁଛନ୍ତି । ସେ ଜାନୁଆରି ୧୨ ତାରିଖରେ ଅହମଦାବାଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବେ । ଏହା ପରେ ସେମାନେ ସାବରମତୀ ଆଶ୍ରମ ପରିଦର୍ଶନ କରିବେ ଏବଂ ସାବରମତୀ ନଦୀକୂଳରେ ଅନ୍ତର୍ଜାତୀୟ ଗୁଡ଼ି ଉଡ଼ା ମହୋତ୍ସବରେ ଯୋଗଦେବେ । ପ୍ରଧାନମନ୍ତ୍ରୀ ମୋଦି ଏବଂ ଜର୍ମାନ ଚାନ୍ସେଲର ମହାତ୍ମା ମନ୍ଦିରରେ ଦ୍ୱିପାକ୍ଷିକ ଆଲୋଚନା  କରିବାର କାର୍ଯ୍ୟକ୍ରମ ରହିଛି । 

ଜର୍ମାନୀ ଏବଂ ଭାରତ ୮ ବିଲିୟନ ଡଲାରର ବୁଡ଼ାଜାହାଜ ଚୁକ୍ତି କରିବାର କାର୍ଯ୍ୟକ୍ରମ ରହିଛି । ରିପୋର୍ଟ ଅନୁଯାୟୀ, ଏହି ଚୁକ୍ତି ଏପର୍ଯ୍ୟନ୍ତ ଭାରତର ସବୁଠାରୁ ବଡ଼ ପ୍ରତିରକ୍ଷା ଚୁକ୍ତି ହେବ। ପ୍ରଥମ ଥର ପାଇଁ ଜର୍ମାନୀ ଭାରତକୁ ବୁଡ଼ାଜାହାଜ ନିର୍ମାଣ ପ୍ରଯୁକ୍ତିବିଦ୍ୟା ଯୋଗାଇବ । ଏହି ବୁଡ଼ାଜାହାଜ ଚୁକ୍ତି ଚୂଡ଼ାନ୍ତ ହେଲେ ଭାରତ ଫ୍ରାନ୍ସରୁ ଆଉ ତିନୋଟି ବୁଡ଼ାଜାହାଜ କ୍ରୟ କରିବ ନାହିଁ। ଏହି ଚୁକ୍ତି ଦ୍ବାରା ଭାରତର ସାମରିକ ଶକ୍ତି ବେଶ୍ ବୃଦ୍ଧି ପାଇବ ବୋଲି କୁହାଯାଉଛି ।

ଅଧିକ ପଢ଼ନ୍ତୁ---କ୍ଷମା ସତ୍ତ୍ୱେ ପୂର୍ବତନ ନୌସେନା ଅଧିକାରୀ କାତାରରେ ଜେଲରେ: ପ୍ରଧାନମନ୍ତ୍ରୀଙ୍କ ଅପିଲ୍ କଲେ ପରିବାର ସଦସ୍ୟ

ରିପୋର୍ଟ ଅନୁଯାୟୀ, ନୂତନ ବୁଡ଼ାଜାହାଜଗୁଡ଼ିକରେ ଏୟାର ଇଣ୍ଡିପେଣ୍ଡେଣ୍ଟ୍ ପ୍ରୋପଲସନ ପ୍ରଣାଳୀ ରହିବ । ଏହି ପ୍ରଣାଳୀ ଦ୍ବାରା ଡିଜେଲ-ଇଲେକ୍ଟ୍ରିକ୍ ଇଞ୍ଜିନ ଅପେକ୍ଷା ବୁଡ଼ାଜାହାଜଗୁଡ଼ିକୁ ଅଧିକ ସମୟ ପାଇଁ ପାଣି ତଳେ ରହିବାକୁ ସକ୍ଷମ ହେବ ।