ଯୁକ୍ତରାଷ୍ଟ୍ର ଆମେରିକାରେ ପ୍ରବାସୀ ଓଡ଼ିଆଙ୍କ ଦ୍ୱାରା ମଧ୍ୟ ଖୁବ୍‌ ହର୍ଷୋଲ୍ଲାସରେ ପାଳିତ ହୋଇଯାଇଛି ଶ୍ରୀଗଣେଶ ପୂଜା । ଦକ୍ଷିଣ କାଲିଫର୍ନିଆ ସ୍ଥିତ ପ୍ରବାସୀ ଓଡ଼ିଆ ସମାଜ ପକ୍ଷରୁ ବିଘ୍ନବିନାଶକଙ୍କ ପୂଜା ଆୟୋଜିତ ହୋଇଛି । ପ୍ରତିବର୍ଷ ପରି ଚଳିତବର୍ଷ ମଧ୍ୟ ସମ୍ପୂର୍ଣ୍ଣ ପାରମ୍ପରିକ ପଦ୍ଧତିରେ ପୂଜା ସମାରୋହ ଅନୁଷ୍ଠିତ ହୋଇଥିଲା । ଏହି ଅବସରରେ ମୁମ୍ବାଇ ନିବାସୀ ଓଡ଼ିଆ ସଙ୍ଗୀତଜ୍ଞ ତଥା ପଦ୍ମ ବିଭୂଷଣ ପଣ୍ଡିତ ହରିପ୍ରସାଦ ଚୌରାସିଆଙ୍କ ଶିଷ୍ୟ ଶୁଭ୍ରଦୀପ ସାହୁ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ । ପୂଜା ସମେତ ଖଡ଼ି ଛୁଆଁ, ପ୍ରସାଦ ସେବନ ଓ ଛୋଟ ପିଲାମାନଙ୍କର ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମମାନ ଅନୁଷ୍ଠିତ ହୋଇଥିଲା । ବିଶେଷ ଭାବରେ ମହାପ୍ରଭୁ ଶ୍ରୀଗଣେଶଙ୍କ ୨୧ଟି ନାମ ଓ ଏହାର ମାହାତ୍ମ୍ୟକୁ ନେଇ ଛୋଟ ପିଲାଙ୍କ ମଧ୍ୟରେ ଏକ ପ୍ରତିଯୋଗିତା ମଧ୍ୟ ଅନୁଷ୍ଠିତ ହୋଇଥିଲା । ଦୀର୍ଘ ୫ ଦିନ ଧରି ଅନୁଷ୍ଠିତ ହୋଇଥିବା ଏହି ପୂଜାରେ ସ୍ଥାନୀୟ ଅଞ୍ଚଳ ସମେତ ଆଖପାଖ ଅଞ୍ଚଳର ପ୍ରାୟ ୩୦୦ ପ୍ରବାସୀ ଓଡ଼ିଆ ଯୋଗଦେଇଥିଲେ । କାଲିଫର୍ନିଆ ପ୍ରବାସୀ ଓଡ଼ିଆ ସମାଜର ପୂଜା ଓ ସାଂସ୍କୃତିକ ମୁଖ୍ୟ ଗଣେଶ ରଥ ଓ ପ୍ରଚେତା ପଣ୍ଡା କାର୍ଯ୍ୟକ୍ରମର ସୁପରିଚାଳନା କରିଥିଲେ। ଏହାସହ ବିଶେଷ ଭାବରେ ଯୁବଗୋଷ୍ଠୀ କାର୍ଯ୍ୟକ୍ରମର ସୁପରିଚାଳନା ପାଇଁ ସହଯୋଗ ମଧ୍ୟ କରିଥିଲେ ।