ଆସନ୍ତାକାଲିଠୁ ଆମେରିକାର ଅତିରିକ୍ତ ଟାରିଫ୍, ମୁକାବିଲା ପାଇଁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବଡ଼ ବୈଠକ

କନକ ବ୍ୟୁରୋ : ଆମେରିକାର ଟାରିଫ ଟେନସନ ଭିତରେ ଦିଲ୍ଲୀରେ ଉଚ୍ଚସ୍ତରୀୟ ବୈଠକ । ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ବସିଛି ଏହି ବୈଠକ । କାଲିଠୁ ଭାରତରେ ଆମେରିକା ଘୋଷଣା କରିଥିବା ଅତିରକ୍ତି ୨୫ % ଟାରିଫ ଲାଗୁ ହେବ । ଏହାକୁ ମିଶାଇ ଭାରତରୁ ଆମଦାନୀ ହେଉଥିବା ସାମଗ୍ରୀ ଉପରେ ୫୦ ପ୍ରତିଶତ ଶୁଳ୍କ ଦେବାକୁ ପଡିବ ।  ଏହା ଭିତରେ  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକାର ଶୁଳ୍କ ଉପରେ ଏକ ବଡ଼ ବୈଠକ କରୁଥିବା  ସୂଚନା ମିଳିଛି । ଏହି ବୈଠକ ପିଏମଓରେ ଚାଲିଛି । ପ୍ରଧାନମନ୍ତ୍ରୀ ମୋଦିଙ୍କ ସହିତ ଏହି ବୈଠକରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ ଉପସ୍ଥିତ ଅଛନ୍ତି । ବୈଠକରେ ବାଣିଜ୍ୟ ଏବଂ ଅର୍ଥ ମନ୍ତ୍ରଣାଳୟର ଅନେକ ବରିଷ୍ଠ ଅଧିକାରୀ ମଧ୍ୟ ଉପସ୍ଥିତ ରହିଥିଲେ । ନୂତନ ଶୁଳ୍କ ବ୍ୟବସ୍ଥା ବୟନଶିଳ୍ପ, ଚମଡା, ଇଞ୍ଜିନିୟରିଂ ସାମଗ୍ରୀ ଏବଂ ସ୍ୱତନ୍ତ୍ର ରାସାୟନିକ ପଦାର୍ଥ ଭଳି କ୍ଷେତ୍ରଗୁଡ଼ିକୁ ପ୍ରଭାବିତ କରିବ ବୋଲି ଆଶା କରାଯାଉଛି ।  ବୈଠକରେ ଭାରତର ପ୍ରତିକ୍ରିୟାର ରୂପରେଖ ଚୂଡ଼ାନ୍ତ ହେବ ବୋଲି ଆଶା କରାଯାଉଛି ।