ବର୍ଷା ଢ଼ାଳୁଥିଲା, ଅଚେତ ଥିଲା ମାଆ ଆଉ କୋଳରେ ଥିଲା ୭ ଦିନର ଶିଶୁ । ଆଉ ବଡ଼ ମେଡିକାଲ କରୁଥିଲା ଅଟ୍ଟହାସ୍ୟ

କନକ ବ୍ୟୁରୋ :  କୋଳରେ କଅଁଳ ଶିଶୁ ବସିଛି ଆଉ ମାଆ ତା'ର ଅଚେତ ଅବସ୍ଥାରେ ରହିଛି । ଆଉ ପରିବାର ଲୋକେ କେବଳ ଅସହାୟ ନୁହଁନ୍ତି ବ୍ୟବସ୍ଥାର ତାଡ଼ନା ଆଗରେ ନିରୁପାୟ ମଧ୍ୟ । ଶୁକ୍ରବାର ରାତି ଗୋଟାଏରୁ ଶନିବାର ସକାଳ ୭ ଟା ହୋଇଗଲା । କଟକ ବଡ଼ ମେଡିକାଲର ଏ ବିଭାଗର ସେ ବିଭାଗ ବୁଲି ବୁଲି ନିରୁପାୟ ହୋଇପଡିଛନ୍ତି ପରିବାର ଲୋକେ । ତୁହାକୁ ତୁହା ବର୍ଷା ଯେମିତି ନାଗରିକର ଅଧିକାର ଆଉ ବ୍ୟବସ୍ଥାର ଉପହାସକୁ କଟାକ୍ଷ କରୁଛି ।  ଅନେକ ଦୂରରୁ ଅନେକ ଆଶା ନେଇ କଟକ ବଡ଼ ମେଡିକାଲକୁ ଆସିଥିବା ଜଣେ ସଦ୍ୟ ପ୍ରସୂତି ମହିଳାଙ୍କ ଦୁଃଖ ଯିଏ ଦେଖିଛି ସେ ବ୍ୟବସ୍ଥାର ଅବ୍ୟବସ୍ଥାକୁ ହୃଦୟଙ୍ଗମ କରିପାରିବ । 

କ'ଣ ଥିଲା ଘଟଣା 
ବାଲେଶ୍ୱର ଜିଲ୍ଲା ରେମୁଣା ଅଞ୍ଚଳର ଜଣେ ପ୍ରସୂତି ମହିଳାଙ୍କ ଦେହ ଅସୁସ୍ଥ ହେବାରୁ ସେ ପ୍ରଥମେ ରେମୁଣା ମେଡିକାଲକୁ ଯାଇଥିଲେ । ହେଲେ ସେଠିକାର ଡାକ୍ତର ତାଙ୍କୁ ତୁରନ୍ତ କଟକ ବଡ଼ ମେଡିକାଲକୁ ପଠାଇ ଦେଇଥିଲେ । ପ୍ରସୂତି ମହିଳା ଓ ତାଙ୍କୁ କୁନି ପିଲାଟିକୁ ଧରି ପରିବାର ଲୋକେ ଶୁକ୍ରବାର ରାତି ଗୋଟାଏରେ କଟକ ବଡ଼ ମେଡିକାଲରେ ପହଂଚିଥିଲେ । ସ୍ଥିତି ଗୁରୁତର ଥିବାରୁ ପ୍ରଥମେ ତାଙ୍କୁ କାଜୁଆଲଟିରେ ଭର୍ତ୍ତି କରାଯାଇଥିଲା । ହେଲେ କାଜୁଆଲଟିରେ ଥିବା ଡାକ୍ତର କ'ଣ ବୁଝିଲେ କେଜାଣି ତାଙ୍କୁ ତୁରନ୍ତ ମାନସିକ ବିଭାଗକୁ ପଠାଇ ଦେଇଥିଲେ । ହେଲେ ମାନସିକ ବିଭାଗ ତାଙ୍କୁ ପୁଣି ପସୂତି ବିଭାଗକୁ ପଠାଇ ଦେଇଥିଲେ । ୭ ଦିନର କୁନି ପିଲାକୁ କୋଳରେ ଧରି ବର୍ଷା ରାତିରେ ବଡ଼ ମେଡିକାଲର ଏ ବିଭାଗରୁ ସେ ବିଭାଗ ହେଉଥିଲେ ରୋଗୀ ମମତା ଓ ତାଙ୍କ ପରିବାର ଲୋକେ । ତାରି ଭିତରେ ମମତା ଅଚେତ ହୋଇପଡିଥିଲେ । ବଡ଼ ଡାକ୍ତରଖାନା, ବଡ଼ ଡାକ୍ତର । ସବୁ ସୁବ୍ୟବସ୍ଥିତ ଭାବି ମମତାଙ୍କ ପରିବାର ଲୋକେ କେତେ ଆଶାରେ ବୋହୂକୁ ଭଲ କରିବାକୁ କଟକ ନେଇଆସିଥିଲେ । ହେଲେ ଏତେ ଗୁରୁତର ଥିବା ମମତାଙ୍କୁ ପ୍ରସୂତି ବିଭାଗର ଡାକ୍ତର ଦେଖି କେବଳ କିଛି ଔଷଧ ଲେଖି ବିଦା କରିଦେଇଥିଲେ । ଜଣେ ଅଚେତ ରୋଗୀଙ୍କୁ କାହିଁକି ଡାକ୍ତର ଆଡମିଶନ ହେବାକୁ ପରାମର୍ଶ ଦେଲେନି ତାହା ହିଁ ପ୍ରଶ୍ନ । 

 ୨୪ ଘଣ୍ଟିଆ ଚିକିତ୍ସା ଯୋଗାଇ ଦେଉଥିବା ଏସସିବି ମେଡ଼ିକାଲକୁ ନେଇ କର୍ତ୍ତୁପକ୍ଷ , ପ୍ରଶାସନ ଏବଂ ରାଜ୍ୟ  ସରକାର ଡିଡ଼ିମ୍ବ ପିଟୁଥିବା ବେଳେ ବାସ୍ତବ ଚିତ୍ର କ'ଣ ପ୍ରମାଣିତ କରୁଛି । ଅଧିକ ଯନ୍ତ୍ରଣାରୁ ରୋଗୀର ଯଦି କିଛି ହେଇଯାଏ ସେଥିପାଇଁ କିଏ ଦାୟୀ ରହିବେ , ସରକାର୍ ନାଁ ମେଡ଼ିକାଲ୍ କର୍ତ୍ତୁପକ୍ଷ । ଏହି ଘଟଣା ଦେଖିଲା ପରେ ସାଧାରଣ ଲୋକଟେ ଏସସିବି ମେଡ଼ିକାଲକୁ ନେଇ ତା'ର ଚିନ୍ତାଧାରା କ'ଣ ରହିବ । ତେବେ ବଡ଼ ଡାକ୍ତରଖାନାର କତୃପକ୍ଷଙ୍କ ଏଭଳି ମାନସିକତାକୁ ଆପଣ କେମିତି ଦେଖୁଛନ୍ତି ।