କାଞ୍ଜିଭରମରୁ ବମ୍‌କାଇ: ୯ ବଜେଟରେ ୯ ଶାଢ଼ି

କନକ ବ୍ୟୁରୋ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଯେତେବେଳେ ସଂସଦରେ ବଜେଟ୍ ଉପସ୍ଥାପନ କରିବାକୁ ପହଞ୍ଚନ୍ତି, ସେତେବେଳେ ତାଙ୍କ ବଜେଟ୍ ଭାଷଣ ସହ ତାଙ୍କ ପୋଷାକ ମଧ୍ୟ ଚର୍ଚ୍ଚାର ବିଷୟ ହୋଇଥାଏ। ସେ ପ୍ରତିବର୍ଷ ଭିନ୍ନ ଭିନ୍ନ ଶାଢ଼ି ପିନ୍ଧି ଭାରତୀୟ ହସ୍ତତନ୍ତ, ପାରମ୍ପରିକ କଳା ଏବଂ ସରଳତାର ବାର୍ତ୍ତା ଦେଇଥାନ୍ତି। ତାଙ୍କ ଶାଢ଼ିରେ ଏକ ଗମ୍ଭୀର, ଗରିମାମୟ ଏବଂ ‘ଆତ୍ମନିର୍ଭର ଭାରତ’ର ପ୍ରତିଫଳନ ଦେଖିବାକୁ ମିଳେ। ଆସନ୍ତୁ ଜାଣିବା ତାଙ୍କର ୯ଟି ବଜେଟ୍ ଏବଂ ସେହି ସମୟରେ ପିନ୍ଧିଥିବା ୯ଟି ସ୍ୱତନ୍ତ୍ର ଶାଢ଼ି ବିଷୟରେ।

୨୦୨୬: କାଞ୍ଜିଭରମ୍ ସିଲ୍କର ରାଜକୀୟ ଶୈଳୀ
ଏହି ବର୍ଷ ବଜେଟ୍ ଉପସ୍ଥାପନ ସମୟରେ ସୀତାରମଣ ହାତବୁଣା ‘କାଞ୍ଜିଭରମ୍ ସିଲ୍କ’ ଶାଢ଼ି ପିନ୍ଧିଥିଲେ । ତାମିଲନାଡୁର ଏହି ପ୍ରସିଦ୍ଧ ବୁଣାକାରୀ ଶୈଳୀର ଶାଢ଼ିଟି ହାଲୁକା ରଙ୍ଗର ଥିଲା, ଯାହା ତାଙ୍କୁ ଏକ ବୃତ୍ତିଗତ ଏବଂ ପାରମ୍ପରିକ ଲୁକ୍ ଦେଉଥିଲା ।

୨୦୨୫: ପଦ୍ମ ପୁରସ୍କାର ବିଜେତାଙ୍କ କଳାକୃତି
୨୦୨୫ ବଜେଟ୍‌ରେ ସେ ଏକ ‘ଅଫ୍-ହ୍ୱାଇଟ୍’ ହ୍ୟାଣ୍ଡଲୁମ୍ ସିଲ୍କ ଶାଢ଼ି ପିନ୍ଧିଥିଲେ । ଏଥିରେ ମାଛ ଥିମ୍‌ର ସୂକ୍ଷ୍ମ କାରିଗରୀ ଏବଂ ସୁନେଲି ବର୍ଡର ଥିଲା । ବିଶେଷ କଥା ହେଉଛି, ଏହି ଶାଢ଼ିଟି ପଦ୍ମ ପୁରସ୍କାର ବିଜେତା ଦୁଲାରୀ ଦେବୀଙ୍କ ଦ୍ୱାରା ପ୍ରସ୍ତୁତ କରାଯାଇଥିଲା।

୨୦୨୪: ସରଳତା ଓ ଭବ୍ୟତାର ସମନ୍ୱୟ
୨୦୨୪-୨୫ ପୂର୍ଣ୍ଣାଙ୍ଗ ବଜେଟ୍ ସମୟରେ ସେ ଧଳା ରଙ୍ଗର ସିଲ୍କ ଶାଢ଼ି ସହ ବାଇଗଣୀ ଏବଂ ସୁନେଲି ବର୍ଡରର ଏକ କ୍ଲାସିକ୍ ଶୈଳୀ ଆପଣାଇଥିଲେ । ଏହା ଭାରତୀୟ ସିଲ୍କ ଶିଳ୍ପ ପ୍ରତି ତାଙ୍କର ସମ୍ମାନକୁ ଦର୍ଶାଉଥିଲା।

୨୦୨୪ ଅନ୍ତରୀଣ ବଜେଟ୍: କାନ୍ଥା କାରିଗରୀର ଯାଦୁ
ନିର୍ବାଚନ ପୂର୍ବରୁ ଅନ୍ତରୀଣ ବଜେଟ୍ ବେଳେ ସେ ନୀଳ ରଙ୍ଗର ‘ଟସର ସିଲ୍କ’ ଶାଢ଼ି ପିନ୍ଧିଥିଲେ । ଏଥିରେ ପାରମ୍ପରିକ ‘କାନ୍ଥା’ କାରିଗରୀର ସୂକ୍ଷ୍ମ କାମ ହୋଇଥିଲା, ଯାହା ଦେଶୀ କାରିଗରଙ୍କ ଦକ୍ଷତାକୁ ପ୍ରତିପାଦିତ କରୁଥିଲା।

ଆହୁରି ପଢ଼ନ୍ତୁ... ବଜେଟର ବଡ଼ ଖବର: କ’ଣ ଶସ୍ତା ଓ କ’ଣ ମହଙ୍ଗା?

୨୦୨୩: କସୁତୀ କାମର ଚମତ୍କାରିତା
୨୦୨୩ରେ ସେ ଲାଲ୍ ଏବଂ କଳା ରଙ୍ଗର ଏକ ଶାଢ଼ି ପିନ୍ଧିଥିଲେ, ଯେଉଁଥିରେ ‘ଟେମ୍ପଲ ବର୍ଡର’ ଏବଂ କର୍ଣ୍ଣାଟକର ପ୍ରସିଦ୍ଧ ‘କସୁତୀ’ ଧାଗାର କାମ ଥିଲା । ଏହି ଶାଢ଼ିଟି ସଂସଦରେ ଏକ ସଶକ୍ତ ସାଂସ୍କୃତିକ ବାର୍ତ୍ତା ଦେଇଥିଲା।

୨୦୨୨: ଓଡ଼ିଶାର ଗର୍ବ ‘ବମ୍‌କାଇ’
୨୦୨୨ ବଜେଟ୍ ବେଳେ ସେ ଓଡ଼ିଶାର ପ୍ରସିଦ୍ଧ ‘ବମ୍‌କାଇ ସିଲ୍କ’ ଶାଢ଼ି ପିନ୍ଧିଥିଲେ । ବ୍ରାଉନ୍ ରଙ୍ଗର ଏହି ଶାଢ଼ିରେ ଧଳା ରଙ୍ଗର ବର୍ଡର ଥିଲା, ଯାହା ଓଡ଼ିଶାର ପାରମ୍ପରିକ ହସ୍ତତନ୍ତ କଳାକୁ ଜାତୀୟ ସ୍ତରରେ ଗୌରବାନ୍ୱିତ କରିଥିଲା ।

୨୦୨୧: ପୋଚମ୍ପଲ୍ଲୀର ପରିଚୟ
୨୦୨୧ରେ ଅର୍ଥମନ୍ତ୍ରୀ ଲାଲ୍ ଏବଂ ଅଫ୍-ହ୍ୱାଇଟ୍ ରଙ୍ଗର ‘ପୋଚମ୍ପଲ୍ଲୀ ସିଲ୍କ’ ଶାଢ଼ି ପିନ୍ଧିଥିଲେ । ତେଲେଙ୍ଗାନାର ଏହି ସୂକ୍ଷ୍ମ ବୁଣାକାରୀ ଶୈଳୀ ତାଙ୍କ ବ୍ୟକ୍ତିତ୍ୱକୁ ଅଧିକ ପ୍ରଭାବଶାଳୀ କରିଥିଲା ।

୨୦୨୦: ଶୁଭ ହଳଦିଆ ରଙ୍ଗ
୨୦୨୦ରେ ସେ ଏକ ହଳଦିଆ ରଙ୍ଗର ସିଲ୍କ ଶାଢ଼ି ପିନ୍ଧିଥିଲେ, ଯେଉଁଥିରେ ସବୁଜ ରଙ୍ଗର ବର୍ଡର ଥିଲା । ଏହି ରଙ୍ଗ ସମୃଦ୍ଧି ଏବଂ ଶୁଭେଚ୍ଛାର ପ୍ରତୀକ ଭାବେ ଗ୍ରହଣ କରାଯାଇଥିଲା ।

୨୦୧୯: ପ୍ରଥମ ବଜେଟ୍ ଓ ମଙ୍ଗଳଗିରି
ନିଜର ପ୍ରଥମ ବଜେଟ୍ ଉପସ୍ଥାପନ ବେଳେ ସେ ଗୋଲାପି ରଙ୍ଗର ‘ମଙ୍ଗଳଗିରି’ ଶାଢ଼ି ପିନ୍ଧି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ସୁନେଲି ଜରି କାମ ଥିବା ଏହି ଶାଢ଼ି ତାଙ୍କର ଗମ୍ଭୀର ଓ ବୃତ୍ତିଗତ ରୂପକୁ ଉଜାଗର କରିଥିଲା।

ଏହିପରି ଭାବେ, ପ୍ରତିବର୍ଷ ନିର୍ମଳା ସୀତାରମଣ ନିଜ ଶାଢ଼ି ମାଧ୍ୟମରେ ଭାରତର ବିଭିନ୍ନ ପ୍ରାନ୍ତର ବୁଣାକାର ଓ କାରିଗରମାନଙ୍କୁ ସମ୍ମାନ ଜଣାଇବା ସହ ଭାରତୀୟ ସଂସ୍କୃତିକୁ ବିଶ୍ୱ ଦରବାରରେ ଉପସ୍ଥାପନ କରିଛନ୍ତି ।