କନକ ବ୍ୟୁରୋ: ଏପଟେ ରାଜ୍ୟସଭା ଉପ-ନିର୍ବାଚନ ପାଇଁ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଛି, ଆଉ ସେପଟେ କିଏ ରାଜ୍ୟସଭା ଯିବ, ସେନେଇ ବଡ ବୟାନ ଦେଇଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ । ମମତା ମହନ୍ତଙ୍କ ଫର୍ମୁଲାରେ ବିଜେପି ସୁଜିତ୍ କୁମାରଙ୍କୁ ରାଜ୍ୟସଭାକୁ ପଠେଇପାରେ ବୋଲି କହିବା ସହ ରାଜ୍ୟସଭା ଉପନିର୍ବାଚନରେ କିଏ ପ୍ରାର୍ଥୀ ହେବ, ସେନେଇ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି ବିଶ୍ୱେଶ୍ୱର ।

Advertisment

ଗଣମାଧ୍ୟମକୁ ପ୍ରତିକ୍ରିୟା ଦେଇ ବିଶ୍ୱେଶ୍ୱର କହିଛନ୍ତି ଯେ, ଆଲୋଚନା ତ ଅନେକ ହେବ । ହେଲେ ତାଙ୍କୁ ଲାଗୁଛି ଯେ, ମମତା ମହନ୍ତଙ୍କ ଫର୍ମୁଲାରେ ସୁଜିତ୍ କୁମାରଙ୍କୁ ରାଜ୍ୟସଭା ପଠାଯିବ । ତେବେ ଯେହେତୁ ଏହା ପୂର୍ଣ୍ଣାଙ୍ଗ କାର୍ୟ୍ୟକାଳ ନୁହେଁ, ତେଣୁ ମମତା ମହନ୍ତଙ୍କ ଭଳି ସୁଜିତ୍ କୁମାର ହିଁ ରାଜ୍ୟସଭା ଯିବେ ବୋଲି ତାଙ୍କୁ ଲାଗୁଥିବା କହିଛନ୍ତି ବିଶ୍ୱେଶ୍ୱର ଟୁଡୁ । ତେବେ ପାର୍ଟିର ସଂସଦୀୟ ବୋର୍ଡ ନିଷ୍ପତ୍ତି କିନ୍ତୁ ସର୍ବମାନ୍ୟ ବୋଲି କହିଛନ୍ତି ବିଶ୍ୱେଶ୍ୱର ।

ଜାଣିରଖିବା ଉଚିତ୍ ଯେ, ବିଜେଡିରୁ ରାଜ୍ୟସଭାକୁ ଯାଇଥିବା ସୁଜିତ୍ କୁମାର ଗତ ସେପ୍ଟେମ୍ବର ୬ ତାରିଖରେ ଦଳରୁ ଇସ୍ତଫା ଦେବା ସହ ରାଜ୍ୟସଭା ସାଂସଦ ପଦରୁ ମଧ୍ୟ ଇସ୍ତଫା ଦେଇଥିଲେ । ଆଉ ଦଳରୁ ଇସ୍ତଫା ଦେବାର କିଛି ଘଣ୍ଟା ପରେ ସେ ଦିଲ୍ଲୀରେ ବିଜେପିର ହାତ ଧରିଥିଲେ । ଏହାପରଠୁ ଏହି ରାଜ୍ୟସଭା ଆସନଟି ଖାଲି ପଡିଛି । ଯେଉଁଥିପାଇଁ ଆଜି ବିଧିବଦ୍ଧ ଭାବେ ଉପ-ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇଛି ।

ବିଧାନସଭା ସଚିବାଳୟ ପକ୍ଷରୁ ପ୍ରକାଶ ପାଇଥିବା ବିଜ୍ଞପ୍ତି ମୁତାବକ, ଆଜିଠାରୁ ଆସନ୍ତା ୧୦ ତାରିଖ ପର୍ୟ୍ୟନ୍ତ ନାମାଙ୍କନ ପତ୍ର ଦାଖଲ କରାଯିବ । ୧୧ ତାରିଖରେ ପ୍ରାର୍ଥୀପତ୍ର ଯାଞ୍ଚ ହେବାକୁ ଥିବା ବେଳେ ୧୩ ତାରିଖ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାର ହେବ। ସେହିଭଳି ଡିସେମ୍ବର ୨୦ ତାରିଖରେ ନିର୍ବାଚନ ହେବା ନେଇ ବିଜ୍ଞପ୍ତି ପ୍ରକାଶ ପାଇଛି । ତେବେ ସୁଜିତ କୁମାର ଇସ୍ତଫା ଦେବା ପରେ ଫାଙ୍କା ପଡିଥିବା ଏହି ରାଜ୍ୟସଭା ଆସନ, ସଂଖ୍ୟା ଦୃଷ୍ଟିରୁ ଶାସକ ବିଜେପି ଖାତାକୁ ଯିବା ଏକପ୍ରକାର ନିଶ୍ଚିତ । ତେବେ ଖାଲି ପଡିଥିବା ଆସନରେ କିଏ ରାଜ୍ୟସଭା ଯିବ ତାହାକୁ ନେଇ ଏବେ ବି ସସପେନ୍ସ ଲାଗି ରହିଛି। ହେଲେ ଏହାରି ଭିତରେ ବିଶ୍ୱେଶ୍ୱରଙ୍କ ଏହି ବୟାନ ଚର୍ଚ୍ଚାକୁ ଖୋରାକ ଯୋଗାଇଛି ।