ପାକିସ୍ତାନ କ୍ରିକେଟରଙ୍କ ବଡ଼ ଅଭିଯୋଗ, କହିଲେ ପାକିସ୍ତାନ କ୍ରିକେଟ୍‌ ଅବନତି ପାଇଁ ଭାରତ ଦାୟୀ

କନକ ବ୍ୟୁରୋ: ପୂର୍ବତନ ପାକିସ୍ତାନ କ୍ରିକେଟରଙ୍କ ବଡ ପ୍ରତିକ୍ରିୟା । ପୂର୍ବତନ ୱିକେଟକିପର ରସିଦ ଲତିଫ କହିଛନ୍ତି ପାକିସ୍ତାନ କ୍ରିକେଟ ଅବନତି ଆଡକୁ ଗତି କରୁଛି କାରଣ ବିସିସିଆଇ ପାକିସ୍ତାନ କ୍ରିକେଟରଙ୍କୁ ଆଇପିଏଲରେ ଅଂଶଗ୍ରହଣ କରିବାକୁ ଅନୁମତି ଦେଉନାହିଁ । ୨୦୦୮ ମସିହାରେ ମୁମ୍ବାଇ ଆତଙ୍କବାଦୀ ଆକ୍ରମଣ ପରଠାରୁ ପାକ୍ କ୍ରିକେଟରମାନଙ୍କୁ ଇଣ୍ଡିଆନ ପ୍ରିମିୟର ଲିଗ ଖେଳିବାକୁ ନିଷେଧ କରାଯାଇଛି । ନ୍ୟୁଜିଲ୍ୟାଣ୍ଡ୍, ୱେଷ୍ଟଇଣ୍ଡିଜ୍ ଏବଂ ଦକ୍ଷିଣ ଆଫ୍ରିକା ଭଳି ଦେଶର କ୍ରିକେଟର ଆଇପିଏଲ ଖେଳୁଛନ୍ତି । ଏହି ଦେଶଗୁଡ଼ିକର ଖେଳାଳିମାନେ ଆଇପିଏଲକୁ ଆସି ବିଶ୍ୱର ଶ୍ରେଷ୍ଠ ଖେଳାଳିଙ୍କ ବିପକ୍ଷରେ ଖେଳୁଛନ୍ତି । ଆଇପିଏଲ୍‌ରେ ପ୍ୟାଟ୍ କମିନ୍ସ, ଜୋଫ୍ରା ଆର୍ଚର ଏବଂ କାଗିସୋ ରାବାଡାଙ୍କ ଭଳି ବିଶ୍ୱର ଶ୍ରେଷ୍ଠ ବୋଲରମାନେ ଖେଳୁଛନ୍ତି । ଏବେ କ୍ରିକେଟ୍‌ରେ ପ୍ରତିଯୋଗିତା ଅଧିକ, ତେଣୁ ସେମାନେ ଉଚ୍ଚମାନର ସୁବିଧା ସହିତ ବହୁତ କିଛି ଶିଖିପାରିବେ । ଲତିଫ୍ ଏହା ମଧ୍ୟ ଦର୍ଶାଇଛନ୍ତି ଯେ ଆଫଗାନିସ୍ତାନ ଭଳି ଦଳ, ଯାହାକୁ ଥରେ ଦୁର୍ବଳ  ବୋଲି ବିବେଚନା କରାଯାଉଥିଲା, ସେମାନେ ଆଜି ଆଇପିଏଲ ଯୋଗୁଁ ଲାଭବାନ ହୋଇଛନ୍ତି । ଆଫଗାନିସ୍ତାନକୁ ଭାରତ ଗ୍ରେଟର ନୋଏଡାରେ ଏକ ଷ୍ଟାଡିୟମ ପ୍ରଦାନ କରିଛି ଯାହା ଦ୍ୱାରା ସେମାନେ ଦେଶ ବାହାରେ ବି ପ୍ରଶିକ୍ଷଣ ନେଇପାରିବେ । ଖାଲି ଏତିକି ନୁହେଁ ରସିଦ କହିଛନ୍ତି ପାକିସ୍ତାନ ଚାମ୍ପିୟନ୍ସ ଟ୍ରଫିରେ ଖରାପ ପ୍ରଦର୍ଶନ ଓ ନ୍ୟୁଜିଲ୍ୟାଣ୍ଡ୍‌ରେ ପାକିସ୍ତାନର ଶୋଚନୀୟ ପରାଜୟ ପାଇଁ ଆଇପିଏଲ ହିଁ ଦାୟୀ ।