ସରୁନି ନୂଆ ସ୍କୁଲ ଘର ନିର୍ମାଣ ; ବନ ବିଭାଗ ଘରେ ଚାଲିଛି ପାଠପଢ଼ା

କନକ ବ୍ୟୁରୋ :  ଠିକାଦାର ଓ ଯନ୍ତ୍ରୀଙ୍କ ଅବହେଳା କାରଣରୁ ଅନ୍ଧାରରେ ଛାତ୍ରଛାତ୍ରୀଙ୍କ ଭବିଷ୍ୟତ । ସ୍କୁଲ ଘର ନଥିବାରୁ ବନ ସୁରକ୍ଷା କୋଠରୀରେ ପାଠ ପଢ଼ୁଛନ୍ତି କୁନିକୁନି ପିଲା । ଗୋଟିଏ କୋଠରୀରେ ବସିଛନ୍ତି ଶିଶୁ ବାଟିକାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୬୮ ଜଣ ଛାତ୍ରଛାତ୍ରୀ । ଏହା ବି ବିଦ୍ୟାଳୟର ନିଜସ୍ବ ଘର ନୁହେଁ । ବନ ବିଭାଗର କୋଠରୀରେ ଚାଲିଛି ପାଠପଢ଼ା । ପାପଡ଼ାହାଣ୍ଡି ବ୍ଲକ ମୈଦଲପୁର ପଞ୍ଚାୟତ କେନ୍ଦୁଗୁଡ଼ା ସରକାରୀ ପ୍ରାଥମିକ ବିଦ୍ୟାଳୟର ନିଜର ଶ୍ରେଣୀଗୃହ ନାହିଁ । ପୁରାତନ ଶ୍ରେଣୀଗୃହ ବିପଦସଙ୍କୁଳ ଅବସ୍ଥାରେ ଥିବାରୁ ଏହାକୁ ଭାଙ୍ଗି ନୂଆ ଘର ନିର୍ମାଣ ପାଇଁ କାର୍ଯ୍ୟାଦେଶ ମିଳିଥିଲା । ହେଲେ ବର୍ଷେ ପରେ ବି କାମ ସରୁନି । 

ବନ ବିଭାଗ ଘର ନେଇଗଲେ ପିଲା କେଉଁଠି ପାଠ ପଢ଼ିବେ ? ତାକୁ ନେଇ ପ୍ରଶ୍ନ ଉଠିଛି । ଅନ୍ୟପଟେ ଖୁବ୍‌ଶୀଘ୍ର ସ୍କୁଲ ଘର ନିର୍ମାଣ କାମ ସାରିବା ନେଇ ବିଭାଗୀୟ ଅଧିକାରୀଙ୍କ ସହ ଆଲୋଚନା କରି ପଦକ୍ଷେପ ନେବେ ବୋଲି କହିଛନ୍ତି ଡାବୁଗାଁ ବିଧାୟକ । ଦୁଃଖ ଓ ପରିତାପର ବିଷୟ ଖୋଦ୍‌  ଶିକ୍ଷାମନ୍ତ୍ରୀଙ୍କ ନିଜ ଜିଲ୍ଲାରେ ଏଭଳି ଅବ୍ୟବସ୍ଥା ଘେରରେ ପାଠ ପଢ଼ୁଛନ୍ତି ଛାତ୍ରଛାତ୍ରୀ । ତୁରନ୍ତ ସ୍କୁଲ କାମ ନସରିଲେ ଆନ୍ଦୋଳନ ନେଇ ଚେତାବନୀ ଦେଇଛନ୍ତି ଛାତ୍ରଛାତ୍ରୀ ଓ ଅଭିଭାବକ ।