ଉତ୍ତରରୁ ଉପକୂଳ, ବନ୍ୟା କରୁଛି କଲବଲ; ବାହ୍ୟ ଜଗତରୁ ୩ ଗାଁ ବିଚ୍ଛିନ୍ନ, ସହାୟତା କରୁନି ପ୍ରଶାସନ

କନକ ବ୍ୟୁରୋ : ବ୍ରାହ୍ମଣୀ ଓ କାଣୀ ନଦୀରେ ବନ୍ୟା ଆସିବା ପରେ କେନ୍ଦ୍ରାପଡାର ୪ ବ୍ଲକ ଓ ଯାଜପୁରର ବରୀ ଅଞ୍ଚଳରେ ପୁଣି ପଶିଛି ବନ୍ୟାଜଳ । ପଟ୍ଟାମୁଣ୍ଡାଇ ଓ ଆଳିରେ ସ୍ଥିତି ସାଂଘାତିକ । ରାଜନଗରରେ କେନାଲରେ ଭାସୁଛି କୁମ୍ଭୀର । ଏସବୁ ଭିତରେ ଲଗାତାର ଦୁଇଥର ବନ୍ୟା ବରୀ ବାସୀଙ୍କୁ କଲବଲ କରୁଛି ।

ରାସ୍ତା ବୁଡିଛି, ଟ୍ୟୁବୱେଲ ବୁଡିଛି । ଜଳବନ୍ଦୀ ଭିତରେ ପୁରା ଗାଁ ଫଶିଛି । ବ୍ରାହ୍ମଣୀ ନଦୀରେ ତୃତୀୟ ଥର ବନ୍ୟା ଓ କାଣୀ ନଦୀରେ ବନ୍ୟା ଆସିବା ପରେ କେନ୍ଦ୍ରାପଡ଼ାର ୪ ବ୍ଲକ ଏବେ ଜଳାର୍ଣ୍ଣବ । ପଟ୍ଟାମୁଣ୍ଡାଇ ଓ ଆଳିର ସର୍ବାଧିକ ୧୦ ପଞ୍ଚାୟତ, ରାଜକନିକାର ୮ ପଞ୍ଚାୟତ ପାଣି ଘେରରେ ରହିଛି । ଗାଁ ରାସ୍ତାରେ ଡଙ୍ଗା ଚାଲୁଛି । ଚାଷ ଜମିରେ ଅକାତକାତ ପାଣି । ପଟ୍ଟାମୁଣ୍ଡାଇ କୋଳଥିଆ-ପେଣ୍ଠପାଳ ରାସ୍ତାର ଜେନାସାହି ନିକଟରେ ଘାଇ ହେବାରୁ କୋଳଥିଆ, ବ୍ରାହ୍ମଣସାହି, ଜେନାସାହି ବାହ୍ୟଜଗତରୁ ବିଚ୍ଛିନ୍ନ ହୋଇଛି । ଦୁର୍ଦ୍ଦଶା ଡାକି ଆଣିଛି ବନ୍ୟା । ପାନୀୟ ଜଳ ପାଇଁ ଲୋକେ କଲବଲ ହେଉଥିବା ବେଳେ ପଶୁଙ୍କ ଖାଦ୍ୟ ଏଯାଏଁ ମିଳିନି । ପ୍ରଶାସନ ସହାୟତା କରୁନଥିବାରୁ ଅସନ୍ତୋଷ ଝାଡିଛନ୍ତି ଲୋକେ । ସେହିଭଳି ରାଜନଗର ବ୍ଲକର ଅନେକ ଅଞ୍ଚଳରେ ପଶିଛି ବନ୍ୟାଜଳ । ବନ୍ୟାର ଦୁର୍ଦ୍ଦଶାକୁ ବଢାଇଦେଇଛି କୁମ୍ଭୀର । ଝାଡ଼ପଡା କେନାଲରେ ବିରାଟ କୁମ୍ଭୀର ଭାସୁଥିବାର ଦେଖିବାକୁ ମିଳିଛି ।

ଖରସ୍ରୋତାର ଶାଖା ନୂଆ ନଈରେ ବନ୍ୟା ଆସିବାରୁ ବରୀ ଅଞ୍ଚଳରେ ପୁଣି ବନ୍ୟା ଜଳ ଲହଡି ମାରୁଛି । ପାଣି ଭିତରେ ମାସ ମାସ ଧରି ଚାଷ ଜମି ବୁଡି ରହିବାରୁ ଫସଲ ନଷ୍ଟ ହୋଇଛି । ଦଶରଥପୁରରେ ଲୋକଙ୍କ ଜୀବନ ଜୀବିକା ଛଡାଇ ନେଇଛି କାଣୀ ନଦୀର ଘାଇ । ଜିଲ୍ଲାପାଳଙ୍କ ଆଗରେ କାନ୍ଦି କାନ୍ଦି ଦୁଃଖ ଜଣାଇଛନ୍ତି ବନ୍ୟା ବିପନ୍ନ । ବାଲେଶ୍ୱର କୁମ୍ଭୀରଗଡି ପଞ୍ଚାୟତରେ ପାଣି କମିଥିଲେ ମଧ୍ୟ ଉଜୁଡା କ୍ଷେତକୁ ଦେଖି ମୁଣ୍ଡରେ ହାତ ଦେଇଛି ଚାଷୀ ।

ବାହ୍ୟ ଜଗତରୁ ବିଚ୍ଛିନ୍ନ ହୋଇଥିବା ଅଞ୍ଚଳରେ ଏଯାଏଁ ପାନୀୟ ଜଳ ଓ ଶୁଖିଲା ଖାଦ୍ୟ ପହଞ୍ଚି ପାରିନି । ବନ୍ୟାରେ ବୁଡି ରହିଥିବା ଟ୍ୟୁବୱେଲରୁ ପାଣି ପିଉଛନ୍ତି ଲୋକେ । ଯାହା ଆଗକୁ ସାଂଘାତିକ ସୃଷ୍ଟି କରିପାରେ ।