ବନ୍ୟାରେ ଭାସୁଛି ୨୬ ବ୍ଲକ : ବାଲେଶ୍ବର, ଭଦ୍ରକ ଅଧିକ ପ୍ରଭାବିତ

କନକ ବ୍ୟୁରୋ : ବନ୍ୟାରେ ଭାସୁଛି ରାଜ୍ୟର ୨୬ଟି ବ୍ଲକ । ବିଶେଷକରି ବାଲେଶ୍ବର ଓ ଭଦ୍ରକର ଅଧିକାଂଶ ଅଞ୍ଚଳ ସୁବର୍ଣ୍ଣରେଖା ବନ୍ୟାରେ ପ୍ରଭାବିତ ହୋଇଛି । ଜଳସ୍ତର କମୁଥିଲେ ବି ତଳିଆ ଅଞ୍ଚଳରେ ଅନେକ ସ୍ଥାନ ପାଣି ଘେରରେ ଅଛି । ଭଦ୍ରକ ଓ ଯାଜପୁରର ବନ୍ୟା ସ୍ଥିତି ନାହିଁ । ବନ୍ୟାରେ ଉବୁଟୁବୁ ହେଉଛି ରାଜ୍ୟର ୨୬ ବ୍ଲକ । ବାଲେଶ୍ୱର, ଭଦ୍ରକ, ଯାଜପୁର, କେନ୍ଦୁଝର, ମୟୂରଭଞ୍ଜ, ସୁନ୍ଦରଗଡ଼ ଓ ଦେବଗଡ଼ର ଏହି ବ୍ଲକ ବନ୍ୟାରେ ପ୍ରଭାବିତ ହୋଇଛି । ସୁବର୍ଣ୍ଣରେଖାରେ ବନ୍ୟା ଯୋଗୁଁ ୪ଟି ବ୍ଲକ ଜଳେଶ୍ବର, ଭୋଗରାଇ, ବସ୍ତା ଓ ବାଲିଆପାଳ ପ୍ରଭାବିତ ହୋଇଛି । ସୁବର୍ଣ୍ଣରେଖାରେ ଜଳସ୍ତର କମୁଥିଲେ ବି ଭୋଗରାଇର ନଦୀବନ୍ଧ ଭିତର ପଟ ଗାଁଗୁଡ଼ିକରେ ବନ୍ୟାପାଣି ପ୍ରବେଶ କରୁଛି । ଭୋଗରାଇର ୫ଟି ପଞ୍ଚାୟତ ଜଳବନ୍ଦୀ ହୋଇରହିଛି । ବାଲିଆପାଳରେ ୩୦ରୁ ଅଧିକ ଗାଁ ପାଣିଘେରରେ ଅଛି ।  

ଭଦ୍ରକ, ଯାଜପୁରରେ କମୁଛି ବନ୍ୟାପାଣି
ପାଣିଘେରରେ ତଳିଆ ଅଞ୍ଚଳ, ବଢ଼ୁଛି ଦୁର୍ଦ୍ଦଶା

ଭଦ୍ରକର ୨ ଟି ଓ ଯାଜପୁରର ୩ ଟି ବ୍ଲକ ବନ୍ୟା ପାଣି ପଶିଥିଲେ ବି ପାଣି କମିଲାଣି । ଆଖୁଆପଦାରେ ବୈତରଣୀ ବିପଦ ସଙ୍କେତ ତଳେ ଅଛି । ଭଦ୍ରକ ଓ ଯାଜପୁରରେ ଆଉ ବନ୍ୟା ସ୍ଥିତି ନାହିଁ । ତଳିଆ ଅଞ୍ଚଳରୁ ପାଣି ଧୀରେ ଧୀରେ କମିବାରେ ଲାଗିଛି । ମୟୂରଭଞ୍ଜ ରାସଗୋବିନ୍ଦପୁର ବ୍ଲକର ଲେଦାର ଜମ୍ଭିରାରେ ଘାଇ ହୋଇଥିଲା । ପ୍ରାୟ ୨୦୦ ମିଟରର ଘାଇ ହୋଇଥିବାରୁ ମରାମତି ଚାଲିଛି ।  ଭଦ୍ରକର ଧାମନଗର, ତିହିଡ଼ି ଓ ଯାଜପୁରର ଦଶରଥପୁରରେ ପାଣି ପଶିଥିଲା । ତେବେ ଆଖୁଆପଦାରେ ବିପଦ ସଙ୍କେତ ତଳକୁ ଆସିବା ପରେ ଧୀରେ ଧୀରେ ସ୍ଥିତି ସାମାନ୍ୟ ହେଉଛି । ପ୍ରାୟ ସବୁ ନଦୀରେ ଜଳସ୍ତର କମୁଛି । ତଳିଆ ଅଞ୍ଚଳରୁ ପାଣି ଛାଡ଼ିବା ପାଇଁ ସମୟ ଲାଗିବ । ପାଗ ଅନୁକୂଳ ହେଲେ ଆସନ୍ତାକାଲି ଆକାଶମାର୍ଗରୁ ବନ୍ୟାଞ୍ଚଳ ପରିଦର୍ଶନ କରିବେ ମୁଖ୍ୟମନ୍ତ୍ରୀ ।