Year-Ender 2024 : ଚବିଶରେ ଚାଲିଗଲେ ଅନେକ ଚର୍ଚ୍ଚିତ ଚେହେରା । ଏବେବି ଝୁରୁଛି ଭାରତ, ଗୁମୁରି କାନ୍ଦୁଛି ଓଡ଼ିଶା । ଅମର ଆତ୍ମାଙ୍କୁ ଆମର ଅଶ୍ରୁଳ ଶ୍ରଦ୍ଧାଞ୍ଜଳୀ

ଚାହୁଁ ଚାହୁଁ ବେରଙ୍ଗ ହେବାକୁ ବସିଲାଣି ୨୦୨୪ । ଆଉ କିଛି ଦିନ ପରେ ନୂଆରଙ୍ଗ ନେଇ ଆସିଯିବ ୨୦୨୫ । ଫ୍ଲାସବାକରେ ଛିଡ଼ା ହୋଇଥିବେ ଅନେକ ଆଶା,ଅସୁମାରୀ ସ୍ବପ୍ନ ,କେତେ ଅଭୁଲା ମୁହଁଙ୍କ ଲମ୍ବା ଲିଷ୍ଟ୍ । ଏ ବର୍ଷଟି ଅନେକ କିଛି ଦେଇଗଲା ସେଥିପାଇଁ ହୃଦୟରୁ ଧନ୍ୟବାଦ ୨୦୨୪ । କିନ୍ତୁ ସାଙ୍ଗରେ ଅନେକ ବିଶିଷ୍ଟ ବ୍ୟକ୍ତିବିଶେଷଙ୍କୁ ବି ନେଇଚାଲିଗଲା ଏ ନିଷ୍ଠୁର ବର୍ଷ । ସେ ବିଶିଷ୍ଟ ତାବଲା ବାଦକ ଜାକିର୍ ହୁସେନ୍ ହୁଅନ୍ତୁ କି ବିଜନେସ୍ ଟାୟକୁନ୍ ରତନ୍ ଟାଟା । ଗଜଲ ଗାୟକ ପଙ୍କଜ୍ ଉଦାସଙ୍କଠାରୁ ଆରମ୍ଭ କରି ଦଙ୍ଗଲ ଗାର୍ଲ ସୁହାନୀ ଭଟନାଗରଙ୍କୁ ହରାଇ ଏଯାଏଁ ଗୁମୁରି ଗୁମୁରି କାନ୍ଦୁଛି ସାରା ଦେଶ । ତେବେ ବର୍ଷର ଏହି ଶେଷ ଘଡ଼ିରେ ଆସନ୍ତୁ ମନେପକାଇବା ସେ ଅମର ଆତ୍ମାଙ୍କୁ ଯେ ଦୁନିଆରୁ ନିରବି ଗଲେ ସିନା ଲୋକଙ୍କ ହୃଦୟରେ ଏମିତି ଛାପ ଛାଡ଼ି ଗଲେ ଯେ ସେମାନଙ୍କ ଶୂନ୍ୟସ୍ଥାନ ପୂରଣ କରିବା ପାଇଁ ଆଜି ବି ଅମଙ୍ଗୁଛି ଏ ହୃଦୟ । 

ଏ ତାଲିକାରେ ପ୍ରଥମ ନାଁଟି ଆସେ ବିଜନେସ୍ ଟାୟକୁନ୍ ରତନ୍ ଟାଟାଙ୍କର । ଅକ୍ଟୋବର ୯ ତାରିଖ ୨୦୨୪ ରାତି ପ୍ରାୟ ସାଢେ ୧୧ ଖବର ଆସିଲା ପରଲୋକରେ ରତନ୍ ଟାଟା । ରାତିଟା ଆହୁରି ନିଃସ୍ତବ୍ଧ ହୋଇଗଲା ଯେତେବେଳେ ବ୍ୟବସାୟର ବେତାଜ୍ ବାଦଶାହା ରତନ୍ ଟାଟା ୮୬ ବର୍ଷ ବୟସରେ ନିରବି ଗଲେ। ରତନଙ୍କ ପରି ଜଣେ ରତ୍ନଙ୍କୁ ହରାଇ ଏବେ ବି ଝୁରୁଛି ପୁରା ଦେଶ । 

ପିଲାବେଳେ ଟିଭି ପରଦାରେ ଏକ ବଡ଼ ଚା’ ବ୍ରାଣ୍ଡର ବିଜ୍ଞାପନ ଆସୁଥିଲା ୱାଃ ତାଜ୍ .. ତାବଲାରେ ନିଜ ମ୍ୟାଜିକାଲ୍ ଆଙ୍ଗୁଠିକୁ ବୁଲାଇ ଶ୍ରୁତିମଧୁର ସ୍ବର ବାହାର କରୁଥିବା ସେ ବିଶିଷ୍ଟ ତାବଲା ବାଦକ ଜାକିର୍ ହୁସେନଙ୍କୁ ଅବା କିଏ ନଜାଣେ । ଷ୍ଟେଜରେ ଯେତେବେଳେ ତାବଲା ଏବଂ ଜାକିରଙ୍କ ଯୁଗଳବନ୍ଦୀ ହେଉଥିଲା ଓଃ ଦର୍ଶକ ମତୁଆଲା ନହୋଇ ରହିପାରୁନଥିଲେ । କିନ୍ତୁ ବିଧିର ବିଧାନ ଦେଖନ୍ତୁ ଡିସେମ୍ବର ୧୫ , ୨୦୨୪ ରେ ୭୩ ବର୍ଷ ବୟସରେ ଦୁନିଆକୁ ଅଲବିଦା କହିଥିଲେ ଜାକିର୍ । ପୁରୁଣା ରୋଗ କାରଣରୁ ଚାଲିଯାଇଥିଲା ତାଙ୍କ ଜୀବନ । ଆଉ ନିରବିଗଲା ତାବଲାର ସ୍ବର । 

ମୃତ୍ୟୁ ଦେଖେନି ପ୍ରତିଭା । ଏ ଶୀର୍ଷକଟି ସୁହାନୀଙ୍କ କ୍ଷେତ୍ରରେ ଯେମିତି ସତ ହୋଇଯାଇଛି । ସିନେମା ଦଙ୍ଗଲରେ ବବିତା ଫୋଗଟଙ୍କ ଭୂମିକାରେ ନଜର ଆସିଥିବା ଶିଶୁ କଳାକାର ସୁହାନୀ ଭଟନାଗର ମାତ୍ର ୧୯ ବର୍ଷ ବୟସରେ ଦୁନିଆକୁ ଅଲବିଦା କହିଥିଲେ । ଏକ ଦୁର୍ଲ୍ଲଭ ରୋଗରେ ପୀଡ଼ିତ ହୋଇ ଫେବୃୟାରୀ ୭ ତାରିଖରେ ସେ ଆଖି ବୁଜିଥିଲେ । 

ହିନ୍ଦୀ ଟେଲିଜଗତର ଜଣାଶୁଣା ଚେହେରା ରିତୁରାଜ୍ ସିଂଙ୍କ ଅଭିନୟକୁ ଯିଏ ଦେଖିଥିବେ ତାଙ୍କ ପ୍ରତିଭାର ଦିୱାନା ନିଶ୍ଚୟ ହୋଇଥିବେ । ପ୍ରତିଟି ରୋଲକୁ ଜୀବନ୍ତ କରୁଥିବା ଏହି ଅଭିନେତା ଫେବୃୟାରୀ ୨୦ ତାରିଖରେ ୫୯ ବର୍ଷ ବୟସରେ ହୃଦଘାତ କାରଣରୁ ଆରପାରିକୁ ଚାଲିଯାଇଥିଲେ ।  

ଚିଠି ଆଇହେ ଆଇହେ ଚିଠି ଆଇହେ .. ଗଜଲ୍ ଆଉ ପଙ୍କଜ୍ ଦୁଇଟି ନାଁ ହେଲେ ଗୋଟିଏ ଆତ୍ମା । ପଙ୍କଜ୍ ଉଦାସ୍ ଗଜଲ୍ ପ୍ରେମୀଙ୍କ ପାଇଁ ଈଶ୍ବରଙ୍କ ବରଦାନ । ସଂଗୀତ ପ୍ରେମୀ ଯେବେଯେବେ ଗଜଲ୍ ଶୁଣିବେ ପଙ୍କଜ୍ ଉଦାସଙ୍କ ସ୍ବରର ଯାଦୁକୁ ମନେ ନ ପକାଇ ରହିପାରିବେନି । ସାଙ୍ଗିଆ ସିନା ଉଦାସ୍ ଥିଲା କିନ୍ତୁ ହସକୁରା ମଣିଷଟେ ଥିଲେ ପଙ୍କଜ । ହେଲେ ଫେବୃୟାରୀ ୨୬ ରେ ନିରବି ଗଲେ ଗଜଲ୍ ଗାଉଥିବା ଏହି ବିଶିଷ୍ଟ ଗାୟକ ଯାହାଙ୍କୁ ଏବେ ବି ଝୁରୁଛି ଦେଶ । 

ନିଜ କମିକ୍ ଅନ୍ଦାଜରେ ସମସ୍ତଙ୍କୁ ହସାଉଥିବା କମେଡିଆନ୍ ଅତୁଲ୍ ପରଚୁରେ ମଧ୍ୟ ଚଳିତବର୍ଷ ଅକ୍ଟୋବର ୧୪ ତାରିଖରେ ଇହଲୀଳା ତ୍ୟାଗ କରିଥିଲେ । ଅନେକ ସ୍ବାସ୍ଥ୍ୟଗତ ସମସ୍ୟା ଏବଂ କ୍ୟାନ୍ସର ତାଙ୍କ ମୃତ୍ୟୁର କାରଣ ପାଲଟିଥିଲା । 

ବିହାରର କୋକିଳକଣ୍ଠୀ ତଥା ପପୁଲାର୍ ଫୋକ୍ ସିଙ୍ଗର୍ ଶାରଦା ସିହ୍ନାଙ୍କ ଦେହାନ୍ତ ନଭେମ୍ବର ୫ ରେ ହୋଇଥିଲା । ନାଁ ଯେମିତି ଶାରଦା ତାଙ୍କ କଣ୍ଠରେ ମଧ୍ୟ ସାକ୍ଷାତ ଦେବୀ ଶାରଦାଙ୍କ ବାସ ଥିଲା ବୋଲି ଜଣାପଡୁଥିଲା । ବିହାରର ଲୋକଗୀତକୁ ବିଶ୍ବରେ ଚର୍ଚ୍ଚିତ କରିବାରେ ଶାରଦାଙ୍କ ଭୂମିକା ଅତୁଳନୀୟ କହିଲେ ଅତ୍ୟୁକ୍ତି ହେବନାହିଁ । 

ଟିଭି ସିରିଏଲ୍ , ୱେବ୍ ସିରିଜର ଚର୍ଚ୍ଚିତ ଚେହେରା ବିକାଶ୍ ସେଟ୍ଟୀଙ୍କ ଦେହାନ୍ତ ହୃଦଘାତ କାରଣରୁ ହୋଇଥିଲା । ସେପ୍ଟେମ୍ବର ୪ ତାରିଖରେ ୪୮ ବର୍ଷ ବୟସରେ ଦୁନିଆକୁ ଅଲବିଦା କହିଥିଲେ ଏହି ଅଭିନେତା ଜଣକ । 

ଏ ତ ଗଲା ଦେଶର କଥା ଚଳିତବର୍ଷ ଓଡ଼ିଶା ମଧ୍ୟ ଅନେକ ଆତ୍ମୀୟଙ୍କୁ ହରାଇ ମ୍ରିୟମାଣ । ବର୍ଷର ଶେଷ ସମୟରେ ଆସନ୍ତୁ ସେ ଅମର ଆତ୍ମାଙ୍କୁ ସୁମରିବା । 

ତାଲିକାର ପ୍ରଥମ ସ୍ଥାନରେ ଆସନ୍ତି ସ୍ବର୍ଗୀୟ ବରିଷ୍ଠ ବିଜେଡି ନେତା ଦାମୋଦର ରାଉତ । ଓଡ଼ିଶା ରାଜନୀତିର ମହାଦ୍ରୁମ ଦାମ ରାଉତ ୮୩ ବର୍ଷ ବୟସରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ । ହୃଦଘାତ ପରେ ବ୍ରେନଡେଡ୍ ହୋଇ ଆରପାରିକୁ ଚାଲିଯାଇଥିଲେ ଓଡ଼ିଶା ଇତିହାସର ଏ ଟାଣୁଆ ନେତା । ଦାମଙ୍କ ଭଳି ନେତାଙ୍କୁ ହରାଇ ଝୁରୁଛି ଓଡ଼ିଶା , ଝୁରୁଛନ୍ତି ସମର୍ଥକ । 

ମୋ ପ୍ରଭୁ ଜଗନ୍ନାଥ , ସେ ଯେ କମଳାକାନ୍ତ .. ସେ ପ୍ରଭୁ ଶ୍ରୀଜଗନ୍ନାଥଙ୍କୁ ସମର୍ପିତ ଭଜନ ଗାଉଥିଲେ କିନ୍ତୁ ଶ୍ରୋତାଗଣଙ୍କ ମନ ହେଉଥିଲା ଶାନ୍ତି । କହିବାକୁ ଗଲେ ମନକୁ ଶାନ୍ତି ଦେଉଥିବା ଜଣେ ଗାୟିକା ଥିଲେ ଶାନ୍ତିଲତା ବାରିକ । କିନ୍ତୁ କର୍କଟ ରୋଗରେ ପୀଡିତ ହୋଇ ଏପ୍ରିଲ୍ ୧ ତାରିଖ ରାତି ୮ ଟାରେ ସମସ୍ତଙ୍କୁ ଅଶାନ୍ତିର ସାଗରରେ ଭସାଇ ନିରବିଗଲେ ଶାନ୍ତିଲତା । 

ଓଡ଼ିଶା ସେତେବେଳେ ସ୍ତବ୍ଧ ହୋଇଗଲା ଯେତେବେଳେ ବରିଷ୍ଠ ବିଜେପି ନେତା ସମୀର ଦେ ଦୁନିଆକୁ ଅଲବିଦା କହିଲେ । ନଭେମ୍ବର ୧୮ , ୨୦୨୪ । ୬୭ ବର୍ଷ ବୟସରେ ଚିକିତ୍ସାଧୀନ ଅବସ୍ଥାରେ ଆଖିବୁଜିଥିଲେ ସମୀର ଦେ ।

ଏହି ତାଲିକାରେ ଭୁବନେଶ୍ବର ମଧ୍ୟ ପୂର୍ବତନ ବିଧାୟକ ବିଜୟ ମହାନ୍ତିଙ୍କ ନାଁ ମଧ୍ୟ ରହିଛି ସାମିଲ୍ । ୬୦ ବର୍ଷ ବୟସରେ ଇହଲୀଳା ତ୍ୟାଗ କରି ସଭିଁଙ୍କୁ ଶୋକର ସାଗରରେ ବୁଡ଼ାଇ ଚାଲିଗଲେ ବିଜୟ । ସୁଖ-ଦୁଃଖର ପ୍ରହେଳିକା ଭିତରେ ୨୦୨୪ ସମାପ୍ତ ହେବାକୁ ବସିଛି । ଆଶା ୨୦୨୫ କିଛି ନୂଆ ଆଶା ନେଇ ଆସିବ । ୨୪ ରେ ଦୁନିଆକୁ ଅଲବିଦା କହିଥିବା ଅମର ଆତ୍ମାଙ୍କୁ ଆମର ଭାବପୂର୍ଣ୍ଣ ଶ୍ରଦ୍ଧାଞ୍ଜଳୀ ।