କନକ ବ୍ୟୁରୋ: ମଣ୍ଡିରେ ବେଆଇନ କାର୍ଯ୍ୟ ହେଲେ ତୁରନ୍ତ ହେବ ଆକ୍ସନ। ମଣ୍ଡିରେ ଅସୁବିଧାର ସମ୍ମୁଖୀନ ହେଉଥିଲେ ସରକାରଙ୍କୁ ସିଧାସଳଖ ଅଭିଯୋଗ କରିପାରିବେ ଚାଷୀ। ଏଥିପାଇଁ ଏକ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯାଇଛି। ଯାହାକୁ ଉଦଘାଟନ କରିଛନ୍ତି ରାଜ୍ୟ ଖାଦ୍ୟ ଯୋଗାଣ ମନ୍ତ୍ରୀ।  ଏହି କଣ୍ଟ୍ରୋଲ ରୁମ ଜରିଆରେ ସବୁ ମଣ୍ଡି ଉପରେ ସିସିଟିଭି ଜରିଆରେ ନଜର ରଖିବ ଯୋଗାଣ ବିଭାଗ। ଏହାସହ ୧୯୬୭ ନମ୍ବରରେ କଲ କରି ସିଧାସଳଖ ମଣ୍ଡି ସମ୍ପର୍କିତ ନିଜ ସମସ୍ୟା ବିଷୟରେ ଜାଣିପାରିବେ ଚାଷୀ। ଏହି କମାଣ୍ଡ କଣ୍ଟ୍ରୋଲ ସେଣ୍ଟର ମଣ୍ଡିରେ ଚାଷୀଙ୍କ ପାଇଁ ବେଶ ସହାୟକ ହେବ ବୋଲି କହିଛନ୍ତି ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର। ଏଥିସହ ସୁରୁଖୁରୁରେ ଧାନ ଉଠିବା ଓ ମଣ୍ଡି ଜନିତ ସମସ୍ୟା ଦୂର କରିବାକୁ ଏଭଳି ପଦକ୍ଷେପ ନେଇଛି ବିଭାଗ।