କନକ ବ୍ୟୁରୋ: ଇସ୍ରାଏଲ୍‌ର ଘନଘନ ଆକ୍ରମଣ ପରେ ଗାଜାରେ ଏବେ ଦହଗଞ୍ଜ କରୁଛି ଖାଦ୍ୟ ସଙ୍କଟ । ଭୋକରେ ଲୋକଙ୍କ ଜୀବନ ଯିବା ଆରମ୍ଭ ହୋଇଛି । ଚାରି ଆଡ଼ୁ ଗାଜାକୁ ବ୍ଲକ୍‌ କରି ରଖିଛି ଇସ୍ରାଏଲ । ଏହାର ଅର୍ଥ ଲୋକଙ୍କ ପାଖରେ  ନା ଖାଦ୍ୟ ପହଞ୍ଚି ପାରୁଛି, ନା ମେଡିସିନ । ବଦ୍ୟୁତ ସେବା ପାଇବା ବି ସମ୍ଭବ ହେଉନି । ଛୋଟ ପିଲାଠାରୁ ଆରମ୍ଭ କରି ବୃଦ୍ଧ ପର୍ଯ୍ୟନ୍ତ ମୁଠାଏ ଖାଦ୍ୟ ପାଇଁ ଡହଳ ବିକଳ ହେଉଛନ୍ତି । ଅନେକ ବ୍ୟକ୍ତିଙ୍କ କ୍ଷୁଧାରୁ ମୃତ୍ୟୁ ହେଉଥିବା ଖବର ବି ସାମ୍ନାକୁ ଆସୁଛି । ଏହି ଖବର ବର୍ତ୍ତମାନ ସାରା ବିଶ୍ୱକୁ ବିଚଳିତ କରିଛି । ୟୁନେସ୍କୋର ବିଭିନ୍ନ କ୍ୟାମ୍ପ୍‌ରେ ଖାଦ୍ୟ ପାଇଁ ଅପେକ୍ଷା କରି ରହୁଛନ୍ତି ଛୋଟଛୋଟ ପିଲାମାନେ ।

ଶୁଣା ଗଲାଣି ଭୋକର ଚିତ୍କାର

Advertisment

ସାମୁଦାୟିକ ଖାଦ୍ୟ ବଣ୍ଟନ ପାଇଁ ଆସୁଥିବା ସାମଗ୍ରୀଗୁଡ଼ିକୁ ଲୁଟି ନେଉଛନ୍ତି ଲୋକେ । ଖାଲି ସେତିକି ନୁହେଁ, ଯେଉଁଠି ସମୁଦାୟିକ ଭାବରେ ଖାଦ୍ୟ ବଣ୍ଟନ କରାଯାଉଛି ସେଠାରେ ଲୋକଙ୍କୁ ସମ୍ଭାଳିବା ମୁସ୍କିଲ୍‌ ହୋଇ ପଡ଼ୁଛି । ଗାଜାର ଉତ୍ତରାଞ୍ଚଳରେ ଏବେ ଲୋକଙ୍କ ପାଖରେ ଖାଦ୍ୟ ପହଞ୍ଚି ପାରୁନି । ସ୍ଥିତି ଏମିତି ହେଲାଣି ଯେ କିଛି ଦିନ ପୂର୍ବରୁ  ୟୁନେସ୍କୋ କ୍ୟାମ୍ପ୍‌ରେ ବି ପିଇବା ପାଣି ସଙ୍କଟ ଦେଖା ଦେଇଥିଲା । ଏଠାରେ ଲୋକ ଏବେ ସପ୍ତାହ ସପ୍ତାହ ଧରି ଭୋକ ଉପାସରେ ରହିବାକୁ ବାଧ୍ୟ ହେଉଛନ୍ତି । ବିଶେଷ କରି ଛୋଟ ପିଲାଙ୍କ ପେଟ ପାଇଁ ଗଣ୍ଡାଏ ଖାଇବା ଯୋଗାଡ଼ କରିବା ବି ସମ୍ଭବ ହେଉନି । ଗାଜାରେ ଏବେ ଭୋକର ଚିତ୍କାର ଶୁଣା ଗଲାଣି ।

ଇସ୍ରାଏଲ୍‌ର ଭୋକ ହତିଆର !

ମାସ ସହ ସଂଘର୍ଷରେ ଇସ୍ରାଏଲ୍‌ ଭୋକ ହତିଆର ବ୍ୟବହାର କରୁଥିବା ଅନ୍ତର୍ଜାତୀୟ ମିଡିଆରେ ଚର୍ଚ୍ଚା ହେଉଛି । କିନ୍ତୁ ଇସ୍ରାଏଲ ବେସରକାରୀ ସଂଗଠନ ଗୁଡ଼ିକ ଦ୍ୱାରା ଖାଦ୍ୟ ଯୋଗାଇ ଦେଉଥିବା ଦାବି କରୁଛି । ଏବେ ୧୪ ହଜାର ଛୋଟ ପିଲା ଏବେ ବି ଖାଦ୍ୟ ଅପେକ୍ଷାରେ ରହିଛନ୍ତି । ଏମାନଙ୍କ ସ୍ଥିତି ଏମିତି ରହିଛି ଯେ, ସଠିକ ସମୟରେ ଖାଦ୍ୟ ନମିଳିଲେ ଏମାନଙ୍କ ଜୀବନ ପ୍ରତି ବିପଦ ରହିଛି । ଜାତିସଂଘ ପକ୍ଷରୁ ଏହି ସୂଚନା ହସ୍ତଗତ ହୋଇଛି । ୬୦୦ ଦିନ ଧରି ଚାଲିଥିବା ହମାସ-ଇସ୍ରାଏଲ ସଂଘର୍ଷରେ କେବଳ ସାଧାରଣ ଲୋକଙ୍କ ଜୀବନ ଯାଉଛି କହିଲେ ଭୁଲ ହେବନି । କେତେବେଳେ ଇସ୍ରାଏଲ୍‌ର ମିସାଇଲ ମାଡ଼ରେ  ଜୀବନ ଚାଲି ଯାଉଛି ତ କେତେବେଳେ ମୁଠାଏ ଖାଇବାକୁ ନପାଇ ଛୋଟଛୋଟ ପିଲାଙ୍କ ନିଶ୍ୱାସ ବନ୍ଦ ହେଇ ଯାଉଛି । ବର୍ତ୍ତମାନ ସୁଦ୍ଧା ଗାଜାରେ ୨୮ ହଜାର ମହିଳା ଓ ଶିଶୁଙ୍କ ମୃତ୍ୟୁ ହୋଇ ସାରିଛି । ସରକାରୀ ଭାବରେ ଏହି ରିପୋର୍ଟ ପ୍ରକାଶ କରାଯାଇଛି । କିନ୍ତୁ ବାସ୍ତବ ମୃତ୍ୟୁ ଏହି ସଂଖ୍ୟାଠାରୁ ଢେର ଅଧିକ ବୋଲି କୁହାଯାଉଛି ।

ପିଲାଙ୍କ ଭୋକ କିଭଳି ମେଣ୍ଟବ ?  

ଆତଙ୍କୀ ସଂଗଠନ ହମାସର ମୂଳୋତ୍ପାଟନ କରିବା ଲକ୍ଷ୍ୟରେ ରହିଛି ଇସ୍ରାଏଲ । ଏଥିପାଇଁ ଏବେ ଗାଜା ଉପରେ ଘନଘନ ମିସାଇଲ ମାଡ଼ ଜାରି ରହିଛି । ଗାଜାରେ ସହାୟତା ପାଇଁ ପହଞ୍ଚାଇବା ଅତି ସଂକୀର୍ଣ୍ଣ ରାସ୍ତା ଛାଡ଼ିଛି । ଯାହା ସହାୟତା ପ୍ରକ୍ରିୟା ତ୍ୱରାନ୍ୱିତ କରିବାକୁ ଯଥାର୍ଥ ହେଉନି । ଏଭଳି ସ୍ଥିତିରେ ଏବେ ପ୍ରଶ୍ନ ଉଠୁଛି ଗାଜାରେ ସେହି  ୧୪ ହଜାର ଛୋଟ ପିଲାଙ୍କ ଭୋକ କିଭଳି ମେଣ୍ଟବ ?