ଚେହେରା ଚମକାଇବ ଚାଉଳ ପାଣି : ଘରୋଇ ଉପାୟ ଆପଣାଇ ଏମିତି ପାଆନ୍ତୁ ‘ଗ୍ଲାସ୍ ସ୍କିନ୍’

ପୁରାତନ କାଳରେ ଚେହେରା ଏବଂ ଶରୀରର ସୌନ୍ଦର୍ଯ୍ୟ ବଢ଼ାଇବା ପାଇଁ ଘରୋଇ ଉପଚାର ବ୍ୟବହାର କରାଯାଉଥିଲା । ସେତେବେଳେ କୌଣସି ପ୍ରକାରର ବ୍ୟୁଟି ପ୍ରଡକ୍ଟ ବିକ୍ରି ହେଉନଥିଲା , କେବଳ ପ୍ରାକୃତିକ ଉତ୍ପାଦକୁ ଶରୀରରେ ଲଗାଇ ସୌନ୍ଦର୍ଯ୍ୟ ବଢ଼ାଯାଉଥିଲା । ବର୍ତ୍ତମାନ ସମୟରେ ତ୍ୱଚାର ଯତ୍ନ ନେବା ପାଇଁ ଅନେକ ପ୍ରକାରର ଟ୍ରିଟମେଣ୍ଟର ସାହାଯ୍ୟ ନିଆଯାଉଛି, ଏହା ଦ୍ୱାରା ତ୍ୱଚା ଉପରେ ଅନେକ କୁପ୍ରଭାବ ମଧ୍ୟ ଦେଖିବାକୁ ମିଳୁଛି ଏବଂ ଖର୍ଚ୍ଚ ମଧ୍ୟ ବହୁତ ହେଉଛି । କିନ୍ତୁ, ଆଜି ଆମେ ଆପଣଙ୍କୁ ଏପରି ଏକ ଘରୋଇ ଉପଚାର ବିଷୟରେ କହିବୁ, ଯେଉଁଥିରେ ବିନା ପଇସା ଖର୍ଚ୍ଚ କରି ଆପଣ ନିଜ ତ୍ୱଚାକୁ ସୁନ୍ଦର କରିପାରିବେ ।

ବ୍ୟୁଟି ଏକ୍ସପର୍ଟ ସରିତା କୁମାୱତଙ୍କ କହିବାନୁସାରେ , ଚେହେରା ଏବଂ ଶରୀରର ସୌନ୍ଦର୍ଯ୍ୟ ବଢ଼ାଇବା ପାଇଁ ଚାଉଳର ବ୍ୟବହାର ପୁରୁଣା ସମୟରୁ ହୋଇଆସୁଛି । ବର୍ତ୍ତମାନ ସମୟରେ ମଧ୍ୟ ଏହା ଚେହେରାରେ ଚମକ ଆଣିବାର ଏକ ଉତ୍ତମ ଉପାୟ । ଚାଉଳକୁ ସିଝାଇବା ପରେ ଯେଉଁ ପାଣି ବଳିଥାଏ, ତାହା ତ୍ୱଚାକୁ ଭଲ ପୋଷଣ ଦେଇଥାଏ ଏବଂ ତ୍ୱଚାକୁ ଚମକଦାର କରିଥାଏ ।ଚେହେରାରେ ଲଗାଇବା ପାଇଁ ସର୍ବପ୍ରଥମେ ୨ ରୁ ୩ ଚାମଚ ଚାଉଳକୁ ଏକ ଗ୍ଲାସ୍ ପାଣିରେ ରାତିସାରା କିମ୍ବା ୪ ରୁ ୫ ଘଣ୍ଟା ପାଇଁ ଭିଜାଇ ରଖନ୍ତୁ । ତା'ପରେ ଚାଉଳ ଏବଂ ପାଣିକୁ ଅଲଗା କରନ୍ତୁ । ସେହି ପାଣିକୁ ବ୍ୟବହାର କରନ୍ତୁ । ଏହାଛଡ଼ା ଚାଉଳ ସିଝାଇବା ପରେ ବଳିଥିବା ପାଣିକୁ ମଧ୍ୟ ବ୍ୟବହାର କରିପାରିବେ । 

ବ୍ୟୁଟି ଏକ୍ସପର୍ଟଙ୍କ କହିବାନୁସାରେ , ଚାଉଳ ପାଣିରେ ଭିଟାମିନ ବି , ସି ଏବଂ ଇ ରହିବା ସହିତ ପର୍ଯ୍ୟାପ୍ତ ପରିମାଣରେ ଆଣ୍ଟିଅକ୍ସିଡାଣ୍ଟ ମଧ୍ୟ ରହିଥାଏ, ଯାହା କେବଳ ତ୍ୱଚାର ଛିଦ୍ରକୁ କମ୍ କରିନଥାଏ ବରଂ ତ୍ବଚାକୁ ଫ୍ରେଶ୍ ରଖିବାରେ ମଧ୍ୟ ସହାୟକ ହୋଇଥାଏ । ଏହା ବ୍ୟତୀତ ଏଥିରେ ଥିବା ଭିଟାମିନ ବି କମ୍ପ୍ଲେକ୍ସ ତ୍ୱଚାର ରଙ୍ଗକୁ ଗୋରା କରିବାରେ ସହାୟକ ହୋଇଥାଏ ।

ଚାଉଳ ପାଣି ତ୍ୱଚାକୁ ହାଇଡ୍ରେଟେଡ୍ ରଖିଥାଏ ଏବଂ ଏହାର ଚିକ୍କଣ ରଖିବାର ଗୁଣ ତ୍ୱଚାକୁ କୋମଳ କରିଥାଏ । ଚାଉଳ ପାଣିରେ ଆଣ୍ଟିଇନଫ୍ଲାମେଟୋରୀ ଗୁଣ ମଧ୍ୟ ରହିଥାଏ ଯାହା ତ୍ୱଚାରେ ଲାଲିମା ଏବଂ ଜ୍ୱାଳାକୁ କମ୍ କରିବାରେ ସାହାଯ୍ୟ କରିଥାଏ । ଚାଉଳ ପାଣି ତ୍ୱଚାରୁ ମୃତ କୋଷିକାଗୁଡ଼ିକୁ ହଟାଇବାରେ ମଧ୍ୟ ସହାୟକ ହୋଇଥାଏ, ଯେଉଁଥିପାଇଁ ତ୍ୱଚା ସଫା ଏବଂ ସତେଜ ଦେଖାଯାଏ । ଏହା ତ୍ୱଚାରୁ ମଇଳା ହଟାଇବାରେ ସାହାଯ୍ୟ କରିଥାଏ । ଏକ ତୁଳା ସାହାଯ୍ୟରେ ଚାଉଳ ପାଣି ନେଇ ଚେହେରାରେ ଧୀରେ ଧୀରେ ଲଗାନ୍ତୁ । କିଛି ସମୟ ପରେ ଚେହେରାକୁ ଥଣ୍ଡା ପାଣିରେ ଧୋଇ ଦିଅନ୍ତୁ । କିଛି ଦିନ ପରେ ଚେହେରାରେ ଫରକ ଜାଣିପାରିବେ । ଚାଉଳ ପାଣିକୁ ଟୋନର୍ ରୂପେ ମଧ୍ୟ ବ୍ୟବହାର କରିବା ପାଇଁ ଏକ ସ୍ପ୍ରେ ବୋତଲରେ ଭରି ଫ୍ରିଜରେ ଷ୍ଟୋର୍ କରନ୍ତୁ । ଏହା ପରେ ସଫା ଚେହେରାରେ ସ୍ପ୍ରେ କରି ଟୋନର୍ ରୂପେ ବ୍ୟବହାର କରନ୍ତୁ । ଯଦି ଆପଣଙ୍କ ଚେହେରାରେ ବ୍ରଣ ହୋଇଛି, ତେବେ ଚାଉଳ ପାଣିକୁ ତୁଳାର ସାହାଯ୍ୟରେ ବ୍ରଣ ହୋଇଥିବା ସ୍ଥାନରେ ଲଗାନ୍ତୁ । ଶୁଖିଗଲା ପରେ ଥଣ୍ଡା ପାଣିରେ ଧୋଇ ଦିଅନ୍ତୁ । ଏପରି କରିବା ଦ୍ୱାରା ଆପଣ ବ୍ରଣରୁ ଆରାମ ପାଇବେ ।