ସଡକ ସୁରକ୍ଷା ନାଁ ରେ ଠକେଇ; ଦିଲ୍ଲୀରୁ ଆସି ସୁନ୍ଦରଗଡ଼ରେ ଚାନ୍ଦା ଆଦାୟ କରୁଛନ୍ତି ଠକ ଦଳ

କନକ ବ୍ୟୁରୋ : ସଡକ ସୁରକ୍ଷା ନାଁରେ ଚାନ୍ଦା ଆଦାୟ । ଦିଲ୍ଲୀରୁ ଆସି ସୁନ୍ଦରଗଡରେ ଚାନ୍ଦା ଆଦାୟ କରୁଛନ୍ତି ଠକ ଦଳ । ତାହା ପୁଣି ପୋଲିସର ସୁରକ୍ଷା ବଳୟ ଭିତରେ । ସୁନ୍ଦରଗଡ ଭଷ୍ମା ଥାନା କୁଣ୍ଡୁକେଲା ନିକଟ ୧୦ ନମ୍ବର ରାଜ୍ୟ ରାଜପଥର ଉଭୟ ପାଶ୍ୱର୍ରେ ଖୁଲମ ଖୁଲ୍ଲା ଚାଲିଛି ଟ୍ରକ ଡ୍ରାଇଭରଙ୍କ ଠାରୁ ଚାନ୍ଦା ଆଦାୟ । ସାମାନ୍ୟ ଖଣ୍ଡେ ନାଲି ରଙ୍ଗର ରେଡିୟମ ଲଗାଇ ଟଙ୍କା ମାଗୁଛନ୍ତି ଠକ । ସାଥିରେ ତିନି ପ୍ରକାର ରସିଦ । ଗୋଲାପି ରଙ୍ଗର ୧୦୦ ଟଙ୍କିଆ, ହଳଦିଆ ରଙ୍ଗର ୨୦୦ ଟଙ୍କିଆ ଏବଂ ନୀଳ ରଙ୍ଗର ୩୦୦ ଟଙ୍କିଆ ରସିଦ । ଆଉ ଏକ ଷ୍ଟିକର ଯେଉଁଥିରେ ଆଲକହଲ ଲେଖାଅଛି, ତା ପାଇଁ ୫୦୦ ଟଙ୍କା ଆଦାୟ କରୁଛନ୍ତି ଠକ ଦଳ ।

ଥରେ ରସିଦ କଟାଇଲେ ଦୁଇ ମାସ ପର୍ଯ୍ୟନ୍ତ ତାର ବୈଧତା ଅଛି ବୋଲି କହୁଛି । ବଡ଼ କଥା ହେଲା ନା ପୋଲିସ ନା ପରିବହନ ବିଭାଗ କାହା ପାଖରେ ବି ନାହିଁ ଏହି ଠକଙ୍କ ନେଇ କୌଣସି ଖବର । ରୋଡ ସେଫଟି କ୍ୟାମ୍ପ ନାଁରେ ବ୍ୟାନର ମାରି ବେଧଡକ ଚାଲିଛି ଲୁଟ । ଜୋର ଜବରଦସ୍ତ ଟ୍ରକ ଗୁଡିକୁ ଅଟକାଇ ରେଡିୟମ ଲଗାଇ ରସିଦ ଧରାଇ ଟଙ୍କା ଆଦାୟ କରାଯାଉଛି ।

ରାତିରେ କୁହୁଡି ଥିବା ସମୟରେ ଗାଡି ନ ଦିଶିବ କହି ରେଡିୟମ ଲଗାଉଛନ୍ତି । ତେବେ ତା ପାଇଁ ନା ତାଙ୍କ ପାଖରେ ପରିବହନ ବିଭାଗ ନା ପୋଲିସର ଅନୁମତି ଅଛି । ଦିଲ୍ଲୀରୁ ଏହି ଯୁବକମାନେ ଆସି ଆରଟିଓ ମାନଙ୍କ ଭଳିଆ ଗାଡି ଗୁଡିକୁ ଅଟକାଇ ଜୋର ଜବରଦସ୍ତ ଭାବରେ ଟଙ୍କା ଆଦାୟ କରୁଛନ୍ତି । ଘଟଣାକୁ ନେଇ ଆରଟିଓ ବିଭାଗ ସହ ଯୋଗାଯୋଗ କରାଯାଇଥିଲା, ସେମାନଙ୍କ ପାଖରେ ଏସମ୍ପର୍କରେ କୌଣସି ସୂଚନା ନଥିବା କହିଛନ୍ତି ।