ପେଜର ପରେ ୱାକି ଟକିରେ ବିସ୍ଫୋରଣ । ୨୦ ଲୋକ ମୃତ, ୪୫୦ରୁ ଅଧିକ ଆହତ

କନକ ବ୍ୟୁରୋ : ଲଗାତାର ବିସ୍ଫୋରଣରେ ଦୋହଲିଛି ଲେବାନନ। ମଙ୍ଗଳବାର ପେଜରରେ ବିସ୍ଫୋରଣ ହୋଇଥିବା ବେଳେ ବୁଧବାର ସମସ୍ତ ବୈଦ୍ୟୁତିକ ଉପକରଣରେ ବିସ୍ଫୋରଣ ହୋଇଛି । ଯେଉଁଥିରେ ଲାପଟପ, ୱାକି ଟକି, ମୋବାଇଲ ଆଦି ସାମିଲ ରହିଛି । ଏହି ବିସ୍ଫୋରଣରେ ୨୦ଜଣଙ୍କ ମୃତ୍ୟୁ ଘଟିଥିବା ବେଳେ ୪୫୦ରୁ ଅଧିକ ଆହତ ହୋଇଛନ୍ତି । 

ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁୟାୟୀ, ବେରୁତ, ବେକା ଏବଂ ଦକ୍ଷିଣ ଲେବାନନରେ ଏକ ଘଣ୍ଟା ଭିତରେ ଶତାଧିକ ଲୋକ ଆହତ ହୋଇଛନ୍ତି । ବିସ୍ଫୋରଣରେ ମୋବାଇଲ୍ ଫୋନ୍ ଓ ଅନ୍ୟାନ୍ୟ ଉପକରଣ ମଧ୍ୟ ନଷ୍ଟ ହୋଇଥିବା ଜଣାପଡ଼ିଛି । ଏହାସହ କିଛି ବିଲ୍ଡିଂରେ ନିଆଁ ଲାଗିଛି । ସମଗ୍ର ଦକ୍ଷିଣ ଲେବାନନ୍ ଏବଂ ବେରୁତର ଦକ୍ଷିଣ ଉପକଣ୍ଠରେ ଏହି ବିସ୍ଫୋରଣର ଶବ୍ଦ ଶୁଣିବାକୁ ମିଳିଛି । ଏହି ଆକ୍ରମଣ ପଛରେ ଇସ୍ରାଏଲର ହାତ ଥିବା ଲେବାବନ ଦାବି କରିଛି । ଲେବାନନରେ ଯେଉଁ ପେଜରରେ ବିସ୍ଫୋରଣ ହୋଇଛି, ତାକୁ ହଙ୍ଗେରୀର ଏକ କମ୍ପାନୀ ଦ୍ୱାରା ପ୍ରସ୍ତୁତ କରାଯାଇଥିଲା । ସେପଟେ ପେଜର ବିସ୍ଫୋରଣରେ ମୃତକଙ୍କ ସଂଖ୍ୟା ୧୨ରେ ପହଞ୍ଚିଥିବା ବେଳେ ୩ହଜାରରୁ ଅଧିକ ଲୋକେ ଆହତ ହୋଇଛନ୍ତି । ତେବେ କେତେ ପରିମାଣରେ ୱାକି-ଟକି ବିସ୍ଫୋରଣ ଘଟିଥିବା ସ୍ପଷ୍ଟ ହୋଇପାରି ନାହିଁ । ସେହିପରି ସୂଚନା ଆସିଛି ଯେ ପୂର୍ବ ଲେବାନନର କିଛି ସ୍ଥାନରେ ଲ୍ୟାଣ୍ଡଲାଇନ ଟେଲିଫୋନ୍‌ ବିସ୍ଫୋରଣ ମଧ୍ୟ ଘଟିଛି । ସୂଚନା ଅନୁଯାୟୀ, ଯେଉଁ ସମୟରେ ପେଜରଗୁଡ଼ିକୁ କିଣା ଯାଇଥିଲା, ସେହି ସମୟରେ ୱାକି-ଟକିଗୁଡ଼ିକୁ ମଧ୍ୟ କିଣାଯାଇଥିଲା । କାଲି ଘଟିଥିବା ୱାକି-ଟକି ବିସ୍ଫୋରଣ ମଧ୍ୟରୁ ଅତି କମରେ ଗୋଟିଏ ଏକ ଅନ୍ତିମ ସଂସ୍କାର ସ୍ଥଳରେ ଘଟିଥିଲା । ଗତକାଲି ପେଜର ବିସ୍ଫୋରଣରେ ମରିଥିବା କିଛି ଲୋକଙ୍କ ଅନ୍ତିମ ସଂସ୍କାର କରାଯାଉଥିବା ବେଳେ ୱାକି-ଟକି ବିସ୍ଫୋରଣ ହୋଇଥିଲା । ହେଜବୁଲ୍ଲା ପକ୍ଷରୁ ଏହି ଅନ୍ତିମ ସଂସ୍କାର କରାଯାଉଥିଲା ।

‘ମୋସାଦ’ର ବିସ୍ଫୋରକ ଚିପ୍

ଆତଙ୍କୀ ସଂଗଠନ ହିଜବୁଲ୍ଲାକୁ ଟାର୍ଗେଟ୍
ପେଜର ପରେ ୱାକି-ଟକି ବିସ୍ଫୋରଣ
ଜବୁଲ୍ଲାର ବ୍ୟବହାର କରୁଥିବା ୱାକି-ଟକିରେ ବିସ୍ଫୋରଣ ହୋଇଛି
ଲେବାନନର ରାଜଧାନୀ ବେରୁଟ୍‌ ସହିତ ଦକ୍ଷିଣ ଲେବାନନରେ
୯ ମୃତ, ୩୦୦ରୁ ଅଧିକ ଆହତ
ମଙ୍ଗଳବାର ପେଜର ବିସ୍ଫୋରଣରେ ୧୨ ଜଣଙ୍କ ମୃତ୍ୟୁ ଘଟିଥିଲା
୩୦୦୦ରୁ ଅଧିକ ଆହତ ହୋଇଥିଲେ
ପେଜର ବିସ୍ଫୋରଣରେ ମରିଥିବା ଲୋକଙ୍କ ଅନ୍ତିମ ସଂସ୍କାର ବେଳେ ବିସ୍ଫୋରଣ
ସୋସିଆଲ ମିଡିଆରେ ଘୁରିବୁଲୁଛି ବିସ୍ଫୋରଣର ଭିଡିଓ