ସିକ୍ରେଟ୍ ଚାମ୍ବରରେ ସିକ୍ରେଟ୍ ବ୍ୟବସାୟ; ସବୁକିଛି ସିକ୍ରେଟ୍, କୋଡ୍‌ ୱାର୍ଡରେ ବେପାର

କନକ ବ୍ୟୁରୋ : ଯେତେ ଖୋଳିଲେ ସେତେ ବାହାରୁଛି । ଅବକାରୀ ବିଭାଗର ବାରମ୍ବାର ରେଡ୍ ପରେ ବି ଥମୁନି ବେଆଇନ ମଦ ବ୍ୟବସାୟ । ରାଜଧାନୀର ଛାତି ଉପରେ ପୁଲିସ ଓ ଅବକାରୀ ବିଭାଗକୁ ଚକମା ଦେଇ ମାଫିଆ ଚଳାଇଛନ୍ତି ବେଆଇନ କାରବାର ।

ଘର ବାହାରୁ ଦେଖିବାକୁ ଯେତିକି ସୁନ୍ଦର ଭିତରେ ପଶିଲେ ଗନ୍ଧରେ ନାକ ଫାଟି ପଡୁଛି । ଘର କାନ୍ଥରେ ଘାସ ଗାଲିଚା, ଆଉ ତା ଭିତରେ ଲୁଚି ରହିଛି ଏକ ସିକ୍ରେଟ ବାଟ । ତାରି ଭିତରେ ଚାଲିଥିଲା ଦେଶୀ ମଦ ଭାଟି । ଭୁବନେଶ୍ୱର ସାଲିଆସାହିରେ ଦୀର୍ଘ ଦିନ ଧରି ପୁଲିସ ଓ ଅବକାରୀ ବିଭାଗକୁ ଚକମା ଦେଇ ଚାଲିଥିଲା ଏ ବେଆଇନ କାରବାର । ଚଢ଼ଉ ବେଳେ ୨୦୦ ଲିଟର ଦେଶୀ ମଦ ଓ ପୋଚ ନଷ୍ଟ କରାଯାଇଛି, ଜଣଙ୍କୁ ଗିରଫ କରିଛି ଅବକାରୀ ବିଭାଗ ।

ଏ କେବଳ ଗୋଟିଏ ଘର ନୁହେଁ, ରାଜଧାନୀରେ ବିଭିନ୍ନ ସ୍ଥାନରେ ଏଭଳି ଚୋରା ମଦଭାଟି କରି ବେଧଡ଼କ ନିଶା କାରବାର ଚଳାଇଛନ୍ତି ମଦ ମାଫିଆ । ପୂର୍ବରୁ ଅନେକ ଥର ମଦ ମାଫିଆଙ୍କ ଘରେ ବୁଲଡୋଜର ଚଢ଼ିଥିଲେ ବି ଥମୁନି ବେଆଇନ କାରବାର । ଆଗକୁ କଡ଼ା ଆକ୍ସନ ହେବ ବୋଲି ରୋକଠୋକ୍‌ ଶୁଣାଇଛନ୍ତି ଅବକାରୀ ଅଧିକାରୀ । ଆଗକୁ ଦୀପାବଳି ଓ କାଳୀପୂଜା ଥିବାରୁ ପାର୍ବଣରେ ସକ୍ରିୟ ହେବେ ନିଶା ବେପାରୀ । ଏମାନଙ୍କୁ ଅବକାରୀ ବିଭାଗ କେମିତି ଚେକ୍ ଦେଉଛି ତା ଦେଖିବାର କଥା ।