ଏସିଆ କପରେ ପରାଜିତ ଟିମ୍ ବି ହେବେ ମାଲାମାଲ, ଜାଣନ୍ତୁ ଚାମ୍ପିୟନଙ୍କୁ ମିଳିବ କେତେ ଟଙ୍କା?

କନକ ବ୍ୟୁରୋ: ଆଜିଠାରୁ ଆରମ୍ଭ ହୋଇଛି ଏସିଆ କପ୍ ୨୦୨୫ । ପ୍ରଥମ ମ୍ୟାଚରେ ଆଫଗାନିସ୍ତାନ ଏବଂ ହଂକଂ ମଧ୍ୟରେ ଖେଳାଯିବ । ସେପ୍ଟେମ୍ବର ୧୦ରେ ଭାରତ ଦୁବାଇ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ UAE ବିପକ୍ଷରେ ତାର ମ୍ୟାଚ୍ ଆରମ୍ଭ କରିବ । ଏହି ଟୁର୍ଣ୍ଣାମେଣ୍ଟ ସେପ୍ଟେମ୍ବର ୨୮ ପର୍ଯ୍ୟନ୍ତ ଚାଲିବ । 

ବିଶେଷ କଥା ହେଉଛି ଏଥର ଭାରତ ଏବଂ ପାକିସ୍ତାନ ତିନି ଥର ମୁହାଁମୁହିଁ ହୋଇପାରନ୍ତି । ଏଥର ଏସିଆ କପ୍ ଟି-୨୦ ଫର୍ମାଟରେ ଅନୁଷ୍ଠିତ ହେବାକୁ ଯାଉଛି, ଯାହା ଆସନ୍ତା ବର୍ଷ ଭାରତ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେବାକୁ ଥିବା ଆଇସିସି ଟି-୨୦ ବିଶ୍ୱକପ୍ ପ୍ରସ୍ତୁତି ପାଇଁ ବହୁତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ ।

ରିପୋର୍ଟ ଅନୁଯାୟୀ, ୨୦୨୫ ସିଜିନ୍ ପାଇଁ ପୁରସ୍କାର ରାଶି ମଧ୍ୟ ବୃଦ୍ଧି କରାଯାଇଛି । ସୂଚନା ଅନୁସାରେ ଚାମ୍ପିଅନ୍ ଦଳକୁ ପ୍ରାୟ ୨.୬ କୋଟି ଟଙ୍କା  ମିଳିବ, ଯେତେବେଳେ ରନର୍ସ-ଅପ୍ ଦଳକୁ ପ୍ରାୟ ୧.୩ କୋଟି ଟଙ୍କା ଦିଆଯିବ। ଏସୀୟ କ୍ରିକେଟ୍ ପରିଷଦ (ACC) ପକ୍ଷରୁ ଏପର୍ଯ୍ୟନ୍ତ ଆନୁଷ୍ଠାନିକ ନିଶ୍ଚିତକରଣ ମିଳିନାହିଁ । ଯଦି ଏହା ନିଶ୍ଚିତ ହୁଏ, ତେବେ ଏହା ଗତ ଏସିଆ କପ୍ ତୁଳନାରେ ବୃଦ୍ଧି ହେବ । 

ଏଥର ଏସିଆ କପ୍ ଟ୍ରଫି ଜିତିବା ପାଇଁ 8ଟି ଦଳ ପରସ୍ପର ବିପକ୍ଷରେ ପ୍ରତିଦ୍ୱନ୍ଦ୍ୱିତା କରୁଥିବାର ଦେଖାଯିବ । ଭାରତ, ପାକିସ୍ତାନ, ଶ୍ରୀଲଙ୍କା, ବାଂଲାଦେଶ ଏବଂ ଆଫଗାନିସ୍ତାନ ସିଧାସଳଖ ପ୍ରବେଶ ପାଇଛନ୍ତି । ଏହା ବ୍ୟତୀତ UAE, ଓମାନ , ହଂକଂ ମଧ୍ୟ ଏହି ଟୁର୍ଣ୍ଣାମେଣ୍ଟରେ ସ୍ଥାନ ପାଇଛନ୍ତି, ଯେଉଁମାନେ ଆସୋସିଏଟ୍ ଦେଶ ପାଇଁ ACC ପ୍ରିମିୟର କପରେ ଶ୍ରେଷ୍ଠ 3 ଦଳ ମଧ୍ୟରେ ଥିଲେ ।