କନକବ୍ୟୁରୋ : ମାଆ ପାଇଁ ଗଛଟିଏ। ପରିବେଶ ପାଇଁ ପଞ୍ଚାୟତଟିଏ। ପ୍ରଦୂଷଣ ମୁକ୍ତ ପରିବେଶ ଉଦ୍ଦେଶ୍ୟରେ ଆଲୋଚନାଚକ୍ର। ଏମିତି ସ୍ଲୋଗାନ ଦେଇ ଏକାଠି ହୋଇଛନ୍ତି ବିଧାୟକ, ବୁଦ୍ଧିଜୀବୀ ଓ ଛାତ୍ରଛାତ୍ରୀ। ଜଳବାୟୁ ପରିବର୍ତ୍ତନକୁ ରୋକିବା ଦିଗରେ ସମ୍ବାଦ ଗ୍ରୁପର ପରିବେଶ ପଞ୍ଚାୟତକୁ ସଫଳ କରିବା ପାଇଁ ଅଣ୍ଟା ଭିଡ଼ିଛନ୍ତି ସମସ୍ତେ।

Advertisment

ଜଳବାୟୁ ପରିବର୍ତ୍ତନର ପ୍ରଭାବ ମଣିଷ ଅଙ୍ଗେ ନିଭାଉଛି। ଉତ୍ତରାଖଣ୍ଡରୁ ଜମ୍ମୁକାଶ୍ମୀର, ପ୍ରାକୃତିକ ବିପର୍ଯ୍ୟୟର ପ୍ରଳୟଙ୍କାରୀ ଦୃଶ୍ୟ ସମସ୍ତଙ୍କୁ ବ୍ୟତିବ୍ୟସ୍ତ କରୁଛି। ଓଡ଼ିଶାରେ ପାଣିପାଗ ସ୍ଥିତି ବି କିଛି କମ୍‌ ନୁହେଁ। ତେଣୁ ବେଳ ଥାଉଥାଉ ଜାଗିବାକୁ ପଡ଼ିବ।  ପରିବର୍ତ୍ତିତ ପରିସ୍ଥିତିରେ ସତର୍କ ହୋଇ ଆସନ୍ତାକାଲି ପାଇଁ ଆଜିଠୁ ହିଁ ଉଦ୍ୟମ ଆରମ୍ଭ କରିବାକୁ ପଡ଼ିବ। ସୁସ୍ଥ ପରିବେଶ ପାଇଁ ଲଢ଼ିବାକୁ ପଡ଼ିବ।

ଆଉ ସେହି ଲଢ଼େଇରେ ଗୁଣ୍ଡୁଚି ମୂଷା ଭୂମିକା ନିର୍ବାହ କରି ଆସୁଛି ସମ୍ୱାଦ ଗ୍ରୁପ୍‌। କୋରାପୁଟ ଜିଲ୍ଲାର ବିଭିନ୍ନ ନିର୍ବାଚନ ମଣ୍ଡଳରେ ପରିବେଶ ପଞ୍ଚାୟତ ଆୟୋଜନ କରି ସାଧାରଣ ଜନତା ଓ ଛାତ୍ରଛାତ୍ରୀଙ୍କୁ ପରିବେଶମନସ୍କ କରିବାକୁ ଉଦ୍ୟମ ଜାରି ରହିଛି। ବୋରିଗୁମ୍ମା ପରିବେଶ ପଞ୍ଚାୟତରେ ସାମିଲ ହୋଇ ମାଆଙ୍କ ନାଁରେ ଗଛଟିଏ ଲଗାଇଥିଲେ ଭୈରବ ମହାବିଦ୍ୟାଳୟର ଛାତ୍ରଛାତ୍ରୀ ଓ ଅତିଥି। ଗୋଟିଏ ଛାତ ତଳେ ଏକାଠି ହୋଇଥିଲେ ବୁଦ୍ଧିଜୀବୀ, ବିଧାୟକ, ଅଧ୍ୟାପକ ଓ ଛାତ୍ରଛାତ୍ରୀ । 

କେବଳ କୋରାପୁଟ ଜିଲ୍ଲାରେ ରହିଛି ଶତକଡ଼ା ୨୭ ଭାଗ ଜଙ୍ଗଲ। ବାକି ଜିଲ୍ଲାରେ ତା’ଠାରୁ କମ୍‌। ଧୀରେଧୀରେ କୋରାପୁଟ ଜଙ୍ଗଲ ପରିମାଣ କମୁଛି। ଏବେଠୁ ଜଙ୍ଗଲ ସୃଷ୍ଟି କରିବା, ଜୈବିକ ଚାଷକୁ ଗୁରୁତ୍ୱ ଦେବା। ନିଜେ ଶିଖିବା ଓ ଅନ୍ୟମାନଙ୍କୁ ଶିଖାଇବା। ଏମିତି କିଛି ଶୁଣିବାକୁ ମିଳିଥିଲା ପଟ୍ଟାଙ୍ଗୀ ବ୍ଲକର ଗାଙ୍ଗେଶ୍ୱରୀ ମହାବିଦ୍ୟାଳୟ ପରିସରରେ ଆୟୋଜିତ ପରିବେଶ ପଞ୍ଚାୟତରେ। 

କୋରାପୁଟସ୍ଥିତ କୋଟସ୍ ଠାରେ ଆୟୋଜିତ ପରିବେଶ ପଞ୍ଚାୟତର ମୁଖ୍ୟ ଅତିଥି ଭାବେ ସାମିଲ ହୋଇଥିଲେ କୋରାପୁଟ ବିଧାୟକ ରଘୁରାମ ମାଛ । ନିଜ ଅଭିଭାଷଣରେ ବିଧାୟକ ସମ୍ବାଦର ଏହି କାର୍ଯ୍ୟକ୍ରମର ଗୁରୁତ୍ବ ବଖାଣିଥିଲେ । ବର୍ତ୍ତମାନର ସ୍ଥିତିକୁ ନେଇ ଚିନ୍ତା ପ୍ରକଟ କରିବା ସହ ପରିବେଶକୁ ସୁସ୍ଥ ରଖିବା ପାଇଁ ୱାର୍ଡ ସଭ୍ୟ ଠାରୁ ଜିଲ୍ଲା ପର୍ଯ୍ୟନ୍ତ ସମସ୍ତେ କାମ କରିବାକୁ ଆହ୍ବାନ ଦେଇଛନ୍ତି ।   କେବଳ କଥାରେ କହିଲେ କି ସଭା ସମିତିରେ ଆଲୋଚନା କଲେ ହେବନି। ଶିକ୍ଷା କ୍ଷେତ୍ରରେ ମଧ୍ୟ ପରିବେଶ ସଂପର୍କିତ ଆଲୋଚନା ଜରୁରୀ । ବିଦ୍ୟାଳୟରେ ପରିବେଶ ସମ୍ବନ୍ଧୀୟ ଶିକ୍ଷା ଦେଲେ ଭବିଷ୍ୟତ ପିଢ଼ି ପାଇଁ ଏକ ସୁନ୍ଦର ପରିବେଶ ପାଇପାରିବା ।