ବାତ୍ୟାରୁ ବର୍ତ୍ତିଗଲେ, ହାତୀ ଦଳିଦେଲା । ଉତ୍ପାତ କରୁଛନ୍ତି ୭୦ ଟିକିଆ ହାତୀପଲ ।

କନକ ବ୍ୟୁରୋ: ବାତ୍ୟାରୁ ବର୍ତ୍ତିଗଲା, ହାତୀ ଦଳି ଦେଲା। ବାତ୍ୟା ଦାନାଠାରୁ ବଳିଗଲା ଝାଡ଼ଖଣ୍ଡି ହାତୀଙ୍କ ଆତଙ୍କ । ବାଲେଶ୍ୱର ଜଳେଶ୍ଵର ବ୍ଲକ ରାଇବଣିଆ ଅଞ୍ଚଳରେ ହାତୀ ଉପଦ୍ରବ ଜାରି ରହିଛି । ୭୦ ଟିକିଆ ହାତୀପଲ ସବୁଜ ଧାନ ବିଲକୁ ଦଳିଚକଟି ନଷ୍ଟ କରି ଦେଇଛନ୍ତି । ଗତ କିଛି ଦିନ ଧରି ରାଇବଣିଆର କୁଶଗଡ଼ ଛୋଟ ହଳଦିଗୁଣ୍ଡି ଗାଁରେ ଧାନ ଚାଷ ନଷ୍ଟ କରି ଚାଲିଛନ୍ତି ହାତୀପଲ । ସ୍ଥାନୀୟ ଲୋକଙ୍କ କହିବା ଆନୁସାରେ, ହାତୀପଲ ପଶ୍ଚିମବଙ୍ଗର ଶାଳଗଡ଼ିଆ ରାସ୍ତା ପାର ହୋଇ ଜଳେଶ୍ୱର କୁଶଗଡ଼ ଗାଁ ଆଡକୁ ଆସିଥିଲେ । ଗ୍ରାମବାସୀ ବନ ବିଭାଗକୁ ହାତୀ ଆସୁଥିବା ଖବର ଦେଇଥିଲେ । ବନ କର୍ମଚାରୀ ଓ ଗଜସାଥି ସଂପୃକ୍ତ ଗ୍ରାମରେ ପହଞ୍ଚିଥିଲେ । ସେତେବେଳକୁ ରାତି ପ୍ରାୟ ୨ଟା ବେଳକୁ  ଧାନ ଚାଷ ଦଳିଚକଟି ଦେଇଥିଲେ ୭୦ଟି ହାତୀ । ଗ୍ରାମବାସୀ ଓ ବନ କର୍ମଚାରୀ ହାତୀପଲକୁ ଘଉଡାଇ ଦେଇଛନ୍ତି । ହାତୀ ଗୁଡ଼ିକ ପଶ୍ଚିମବଙ୍ଗର କୁଣ୍ଡଳିବଣୀ ଜଙ୍ଗଲକୁ ଚାଲିଯାଇଛନ୍ତି । କିନ୍ତୁ ପୁଣି ଆସିବାର ଭୟ ରହିଛି । ତେଣୁ କେନ୍ଦୁଖୁଣ୍ଟା, କୁଶଗଡ, କଙ୍କଡ଼ାଫେରା ବେଗୁନିଆ, ଛୋଟ ବେଗୁନିଆ ଓ ମହୁଡୁମା ଆଦି ଗ୍ରାମବାସୀଙ୍କୁ ସାବଧାନ ରହିବାକୁ ପରାମର୍ଶ ଦେଇଛି ବନ ବିଭାଗ ।