କଲେଜକୁ ମୁହଁ ମୋଡ଼ିଲେଣି

କନକ ବ୍ୟୁରୋ : ଧୀରେ ଧୀରେ ଚମକ ହରାଉଛି ରାଜ୍ୟର କୋଣ ଅନୁକୋଣରେ ଥିବା କଲେଜ ଓ ମହାବିଦ୍ୟାଳୟ । ମେଧାବୀ ଛାତ୍ରଛାତ୍ରୀ ଚିରାଚରିଚ ପାଠ୍ୟକ୍ରମରୁ ଦୂରେଇ ରହିବା, ଏବେ ସରକାରଙ୍କ ପାଇଁ ମୁଣ୍ଡବିନ୍ଧାର କାରଣ ହୋଇଛି । କେମିତି ବି ହେବନି ଯେ? ଉଚ୍ଚଶିକ୍ଷା କ୍ଷେତ୍ରରେ ୮୦ହଜାର ସିଟ୍ ଖାଲିପଡ଼ିବା କ’ଣ ଗୋଟିଏ ସାଧାରଣ କଥା।

Advertisment

ଉଚ୍ଚଶିକ୍ଷାରୁ ମୁହଁ ମୋଡ଼ୁଛନ୍ତି ଛାତ୍ରଛାତ୍ରୀ
ଫାଙ୍କା ପଡ଼ିଛି ୮୦ ହଜାରରୁ ଉର୍ଦ୍ଧ୍ବ ସିଟ୍‌

ସ୍ଵୀକାର କଲେ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ ବଦଳୁଛି ଦୁନିଆ, ନିଯୁକ୍ତିର ସୁଯୋଗ ବି। ସାମନାକୁ ଆସୁଛି ନୂଆ ନୂଆ କ୍ୟାରିଅର । ଏଥିସହିତ ପରିବର୍ତ୍ତନ ହେଉଛି ଛାତ୍ରଛାତ୍ରୀଙ୍କ ମାନସିକତା । ଏବେ ଚିରାଚରିତ ପାଠ୍ୟକ୍ରମକୁ ମୁହଁ ମୋଡ଼ି, ବୃତ୍ତିଗତ ଶିକ୍ଷା ପ୍ରତି ଆଗହ ଦେଖାଉଛନ୍ତି ଛାତ୍ରଛାତ୍ରୀ । ନଜର ପକାନ୍ତୁ ଉଚ୍ଚ ଶିକ୍ଷା ବିଭାଗର ତଥ୍ୟ ଉପରେ। ଚଳିତ ଶିକ୍ଷାବର୍ଷରେ ରାଜ୍ୟରେ ଥିବା ମୋଟ ୧ ହଜାର ୫୮ ଟି କଲେଜରେ ୟୁଜି ସିଟ୍ ସଂଖ୍ୟା ମୋଟ୍ ୨ ଲକ୍ଷ ୭୭ ହଜାର ୮୮୧ । ବିଭିନ୍ନ ବିଭାଗରେ ଏଯାବତ୍ ନାମ ଲେଖାଇଛନ୍ତି ୧ ଲକ୍ଷ ୯୬ ହଜାର ୫୭୦ ଜଣ ଛାତ୍ରଛାତ୍ରୀ । ଆଉ ଖାଲି ପଡ଼ିଛି ୮୧ ହଜାର ୬୩୦ ଟି ସିଟ୍‌।

ସର୍ବାଧିକ ଖାଲି ଥିବା କିଛି ଜିଲ୍ଲା

ଖୋର୍ଦ୍ଧା ଜିଲ୍ଲାରେ ସର୍ବାଧିକ ୭୨ କଲେଜ - ୮୧୪୧ ସିଟ୍‌ ଖାଲି
କଟକ ଜିଲ୍ଲାରେ ୭୦ କଲେଜ - ୭୭୨୯ ସିଟ୍‌ ଖାଲି
ଗଞ୍ଜାମ ଜିଲ୍ଲାରେ ୬୮ କଲେଜ - ୬୯୬୯ ସିଟ୍‌ ଖାଲି
ଯାଜପୁର ଜିଲ୍ଲାରେ ୬୨ କଲେଜ - ୬୨୫୭ ସିଟ୍‌ ଖାଲି

ବିଶେଷଜ୍ଞ କହିବା କଥା, ସାଧାରଣ ଶିକ୍ଷା ପରେ ନିଯୁକ୍ତିର ବିଶେଷ ସୁଯୋଗ ନଥିବାରୁ ମୁଁହ ଫେରାଉଛନ୍ତି ଛାତ୍ର ଛାତ୍ରୀ । କ୍ୟାରିୟର କାଉନ୍ସେଲିଂର ମଧ୍ୟ ଅଭାବ ରହିଛି । ଜାତୀୟ ଶିକ୍ଷାନୀତି ଲାଗୁ ପରେ ସାଧାରଣ ଶିକ୍ଷାକୁ ଦକ୍ଷତା ଭିତ୍ତିକ ଶିକ୍ଷା ସହ ଯୋଡିବାକୁ ପ୍ରୟାସ କରାଯାଇଛି । ସାଧାରଣ ଶିକ୍ଷାର ଚମକ ଫେରି ଆସିବ, ସେନେଇ ପ୍ରଚେଷ୍ଟା ଜାରି ରହିଥିବା କହିଛନ୍ତି ଉଚ୍ଚଶିକ୍ଷା ମନ୍ତ୍ରୀ।

ଗତ ୨୦୨୪-୨୫ ଶିକ୍ଷାବର୍ଷରେ ୧୦୫୮ କଲେଜରୁ ୭୪୧୪୨ ସିଟ୍‌ ଫାଙ୍କା ଥିଲା। ସେହିପରି ୨୦୨୩-୨୪ ଶିକ୍ଷା ବର୍ଷରେ ୧୦୪୭ କଲେଜରୁ ୮୮୫୧୧ଟି ସିଟ୍‌ ଖାଲି ପଡ଼ିଲା ପରେ ଏବେ ଚିନ୍ତା ବଢ଼ିଛି ।