କନକ ବ୍ୟୁରୋ : ଆମେରିକା ଏବଂ ଭାରତ ମଧ୍ୟରେ ବାଣିଜ୍ୟ ଉତ୍ତେଜନା ଏବେ ଏକ ନୂଆ ମୋଡ଼ ନେଇଛି । ଆମେରିକା ରାଷ୍ଟ୍ରପତି ଡୋନାଲ୍ଡ  ଟ୍ରମ୍ପଙ୍କ ଭାରତ ଉପରେ ୫୦% ଶୁଳ୍କ ଲାଗୁ କରିବାର ନିଷ୍ପତ୍ତି କେବଳ ଦୁଇ ଦେଶ ମଧ୍ୟରେ ସମ୍ପର୍କକୁ ତିକ୍ତ କରିନାହିଁ ବରଂ ବିଶ୍ୱ ଅର୍ଥନୈତିକ ସମୀକରଣକୁ ମଧ୍ୟ ଦୋହଲାଇ ଦେଇଛି । ଏହି ପ୍ରସଙ୍ଗରେ ଆମେରିକୀୟ ଟିଭି ହୋଷ୍ଟ ରିକ୍ ସାଞ୍ଚେଜ୍ ଏବଂ ଜଣାଶୁଣା ଅର୍ଥନୀତିଜ୍ଞ ରିଚାର୍ଡ ୱଲ୍ଫ ଖୋଲାଖୋଲି କହିଛନ୍ତି ଯେ ଏହି ନିଷ୍ପତ୍ତି ବିଶ୍ୱରେ ନୂଆ ଅର୍ଥନୈତିକ ଶକ୍ତିର ଉଦୟ ହେବାର ଏକ ସଙ୍କେତ ।

Advertisment

ଋଷ ଟୁଡେ ଚ୍ୟାନେଲରେ ପ୍ରସାରିତ ଏକ କାର୍ଯ୍ୟକ୍ରମରେ ସାଞ୍ଚେଜ୍ କହିଛନ୍ତି, "ଯେତେବେଳେ ଟ୍ରମ୍ପ ଭାରତ ଉପରେ ଏତେ ବଡ଼ ଶୁଳ୍କ ଲାଗୁ କରିଥିଲେ, ସେହି ମୁହୂର୍ତ୍ତରେ ମୁଁ ଅନୁଭବ କରିଥିଲି ଯେ ବିଶ୍ୱ ବଦଳି ଯାଇଛି । ଏହା ଏପରି ଏକ ମୁହୂର୍ତ୍ତ ଯାହା ଉପରେ ଆଗାମୀ ବର୍ଷଗୁଡ଼ିକରେ ଇତିହାସକାରମାନେ ଲେଖିବେ।"

'ଆମେରିକା ନିଜ ଗୋଡ଼ରେ ନିଜେ କୁରାଢୀ ମାରିଛି'
ରିଚାର୍ଡ ଉଲ୍ଫ ହେଉଛନ୍ତି ଜଣେ ପ୍ରସିଦ୍ଧ ମାର୍କ୍ସବାଦୀ ଅର୍ଥନୀତିଜ୍ଞ । ସେ କହିଛନ୍ତି, ଭାରତ ଉପରେ ଚାପ ପକାଇ ଆମେରିକା ନିଜର ଦୁର୍ବଳତାକୁ ପ୍ରକାଶ କରୁଛି । "ଭାରତ ବର୍ତ୍ତମାନ ବିଶ୍ୱର ସର୍ବାଧିକ ଜନସଂଖ୍ୟା ବିଶିଷ୍ଟ ଦେଶ । ଦଶନ୍ଧି ଧରି ଋଷ ସହିତ ଭାରତର ଦୃଢ଼ ସମ୍ପର୍କ ରହିଛି । ଏପରି ପରିସ୍ଥିତିରେ, ଶୁଳ୍କ ଲାଗୁ କରି ଭାରତକୁ ଭୟଭୀତ କରିବାକୁ ଚେଷ୍ଟା କରିବା କେବଳ ବିଫଳ ହେବ ନାହିଁ ବରଂ ବିପରିତ ପ୍ରଭାବ ପକାଇବ ।" ଉଲ୍ଫ ଚେତାବନୀ ଦେଇ କହିଛନ୍ତି ଯେ ଯଦି ଆମେରିକା ଭାରତକୁ ତା'ର ବଜାରରୁ ବାଦ ଦିଏ, ତେବେ ଭାରତ ବ୍ରିକ୍ସ ଗୋଷ୍ଠୀ ଆଡ଼କୁ ଅଧିକ ଢଳିବ ଏବଂ ଏହି ପଦକ୍ଷେପ ଶେଷରେ ପଶ୍ଚିମ ଦେଶଗୁଡ଼ିକ ପାଇଁ ଏକ ଚ୍ୟାଲେଞ୍ଜ ପାଲଟିବ ।

ଟ୍ରମ୍ପଙ୍କ ଶୁଳ୍କ ନିଷ୍ପତ୍ତି : ଭାରତର ପ୍ରତିକ୍ରିୟା
ଆମେରିକା ରାଷ୍ଟ୍ରପତି ଟ୍ରମ୍ପ, ଭାରତ ଉପରେ ଶୁଳ୍କ ୨୫% ରୁ ୫୦% ବୃଦ୍ଧି କରିବାକୁ ଘୋଷଣା କରିଥିଲେ । ଏହି ପଦକ୍ଷେପ ସେତେବେଳେ ନିଆଯାଇଥିଲା ଯେତେବେଳେ ଆମେରିକା ପ୍ରାୟ ୭୦ଟି ଅନ୍ୟ ଦେଶ ଉପରେ ନୂତନ ଶୁଳ୍କ ମଧ୍ୟ ଲଗାଇଥିଲା । ଟ୍ରମ୍ପ ଅଭିଯୋଗ କରିଥିଲେ ଯେ ଭାରତ ଋଷରୁ ଅଶୋଧିତ ତେଲ କିଣି ଆମେରିକୀୟ ସ୍ୱାର୍ଥକୁ ଚ୍ୟାଲେଞ୍ଜ କରୁଛି । ଭାରତ ମଧ୍ୟ ଆମେରିକାର ରପ୍ତାନି ଉପରେ ଅତିରିକ୍ତ ୨୫% ଶୁଳ୍କ ଲାଗୁ କରି ପ୍ରତିଶୋଧ ନେଇଛି । ବିଶେଷଜ୍ଞମାନେ କହିଛନ୍ତି ଯେ ଏହି ଶୁଳ୍କ ଯୁଦ୍ଧ ଭବିଷ୍ୟତରେ ଦୁଇ ଦେଶ ମଧ୍ୟରେ ଆର୍ଥିକ ସମ୍ପର୍କକୁ ଆହୁରି ଖରାପ କରିପାରେ ।

ବ୍ରିକ୍ସ ଆହୁରି ଶକ୍ତିଶାଳୀ ହେଉଛି
ରିଚାର୍ଡ ୱୋଲଫ୍ କହିଛନ୍ତି, "ଯେପରି ୟୁରୋପରୁ ବିଚ୍ଛିନ୍ନ ହେବା ପରେ ଋଷ ଏସିଆ ଏବଂ ଆଫ୍ରିକାକୁ ତାର ଶକ୍ତି ବିକ୍ରୟ କରିବା ଆରମ୍ଭ କରିଥିଲା, ସେହିପରି ଭାରତ ମଧ୍ୟ ଆମେରିକା ଛାଡି ବ୍ରିକ୍ସ ଦେଶ ଆଡକୁ ମୁହାଁଇବ ।"

ପରିବର୍ତ୍ତନଶୀଳ ବିଶ୍ୱର ସଙ୍କେତ
ରିକ୍ ସାଞ୍ଚେଜ୍ କାର୍ଯ୍ୟକ୍ରମରେ କହିଥିଲେ, "ଆମେରିକା ଭାରତକୁ କାହାଠାରୁ କିଣିବ କିମ୍ବା ବିକିବ ତାହା କହିପାରିବ ନାହିଁ  । ଏହା ଅନ୍ୟାୟ ଏବଂ ଦାୟିତ୍ୱହୀନ । ଏବଂ ଏହା ହେବା ମାତ୍ରେ ମୁଁ ଅନୁଭବ କଲି ... ବିଶ୍ୱ ବଦଳି ଯାଇଛି ।" ତେବେ ଏଥିରୁ ସ୍ପଷ୍ଟ ହେଉଛି ଯେ, ଡୋନାଲ୍ଡ ଟ୍ରମ୍ପଙ୍କ ନିଷ୍ପତ୍ତିରେ ଆମେରିକୀୟ ବି ଖୁସି ନାହାନ୍ତି । ଅନ୍ୟ ପଟେ ଟାରିଫ ପାଇଁ ଭାରତ ଏବଂ ବ୍ରିକ୍ସ ଭଳି ଗୋଷ୍ଠି ଗୁଡ଼ିକ ଶକ୍ତିଶାଳୀ ହେବାରେ ଲାଗିଛନ୍ତି ।"