ବିହାର ଏସ୍ଆଇଆର ରିପୋର୍ଟ ଆଧାରରେ ନିର୍ବାଚନ ଆୟୋଗଙ୍କ ବଡ଼ ପଦକ୍ଷେପ, ୩ ଲକ୍ଷ ସନ୍ଦିଗ୍ଧଙ୍କୁ ନୋଟିସ

କନକ ବ୍ୟୁରୋ : କିଛିଦିନ ମଧ୍ୟରେ ନିର୍ବାଚନ ଆୟୋଗ ବିହାର ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କରିବେ । ଏହା ଭିତରେ ନାଗରିକତା ପୁନଃ ନିରୀକ୍ଷଣ ଚାଲିଛି । ଏନେଇ ବିରୋଧୀ ସରକାର ସହ ନିର୍ବାଚନ ଆୟୋଗଙ୍କ ଉପରେ ଗୋଟିଏ ପରେ ଗୋଟି ସଂଗିନ ଅଭିଯୋଗ ଆଣିବାରେ ଲାଗିଛନ୍ତି । ବିହାର ଏସଆଇଆର ରିପୋର୍ଟ ଆସିବା ପରେ ୬୫ ଲକ୍ଷ ଭୋଟରଙ୍କ ନାମ କଟିଥିବା ଜଣାପଡିଛି । ଯାହାକୁ ନେଇ ବିରୋଧୀଦଳ ନେତା ରାହୁଲ ଗାନ୍ଧୀ, ବିହାର ବିରୋଧୀଦଳ ନେତା ତେଜସ୍ୱୀ ଯାଦବ ଓ ଅନ୍ୟ ବିରୋଧୀଦଳନେତାମାନେ ଏସଆଇଆରର ସ୍ୱଚ୍ଛତାକୁ ନେଇ ପ୍ରଶ୍ନ ଉଠାଇଛନ୍ତି । ସବୁଠାରୁ ବଡ଼ ପ୍ରଶ୍ନ ଥିଲା କି, ଏସଆଇଆରର ମୁଖ୍ୟ ଉର୍ଦ୍ଦେଶ୍ୟ ଥିଲା ଅନୁପ୍ରବେଶକାରୀଙ୍କ ମତଦାନ ଅଧିକାରକୁ ନେଇ । ଏନେଇ ଏସଆଇଆର ରିପୋର୍ଟରେ କାହିଁକି ଉଲ୍ଲେଖ ନାହିଁ ବୋଲି ବିରୋଧୀ ପ୍ରଶ୍ନ କରୁଥିଲେ । ହେଲେ ଏବେ ଜଣାପଡିଛି କି, ନିର୍ବାଚନ ଆୟୋଗ ବିହାରର ୩ ଲକ୍ଷ ସନ୍ଦିଗ୍ଧ ନାଗରିକଙ୍କୁ ଚିହ୍ନଟ କରି ସେମାନଙ୍କୁ ନୋଟିସ ପଠାଇଛି । ଏହି ୩ ଲକ୍ଷ ମତଦାତା ବିହାରର କିଶନଗଞ୍ଜ, ପୁର୍ଣ୍ଣିଆ, ପଶ୍ଚିମ ଚମ୍ପାରଣ, ପୂର୍ବ ଚମ୍ପାରଣ, ଅରରିୟା, ସହରସା ଓ ମଧୁବନୀ ଜିଲ୍ଲାର ବାସିନ୍ଦା । 

ସେପଟେ ବିହାରରେ ଇଣ୍ଡିଆ ବ୍ଲକ ତରଫରୁ ରାହୁଲ ଗାନ୍ଧୀଙ୍କ ନେତୃତ୍ୱରେ ଚାଲିଥିବା ଭୋଟ ଅଧିକାର ଯାତ୍ରାର ଆଜି ୧୩ ତମ ଦିନ । ଆଜି ଏହି ଯାତ୍ରା ଚମ୍ପାରଣ ଓ ଗୋପାଳଗଞ୍ଜ ପ୍ରବେଶ କରିବ । ଏହି କ୍ରମରେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ସାମିଲ ହେବେ ।