କନକ ବ୍ୟୁରୋ :  ନିୟମଗିରିର ଡଙ୍ଗରିଆଙ୍କ ପାଇଁ ରାଜ୍ୟଠାରୁ କେନ୍ଦ୍ର ପର୍ଯ୍ୟନ୍ତ ବିଭିନ୍ନ ଯୋଜନା । ହେଲେ ଯୋଜନା ବାଟବଣା ହେବା ସହ ଗମନାଗମନ ଭଳି ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଡଙ୍ଗରିଆ । କୋଟିକୋଟି ଟଙ୍କା ବ୍ୟୟରେ ନିର୍ମିତ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ନିମ୍ନମାନର କାମ ଯୋଗୁଁ ରାସ୍ତା ଏବେ ଶୋଚନୀୟ ହୋଇପଡ଼ିଛି । ଫଳରେ ଲୋକେ ଯାତାୟାତରେ ସମସ୍ୟା ଭୋଗୁଛନ୍ତି । 

Advertisment

ଆଣ୍ଠୁଏ କାଦୁଅରେ ଗାଡ଼ି ତ’ ଦୂରର କଥା, ଚାଲିକି ଯିବା ବି ମୁସ୍କିଲ୍‌ । ବର୍ଷାଦିନେ ଆମ୍ବୁଲାନ୍ସକୁ ଠେଲି ଠେଲି ନେବା ପାଇଁ ପଡ଼େ । ଅନ୍ୟ କିଛି ବିକଳ୍ପ ନଥିବାରୁ ସେହି ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି ଲୋକ । ରାୟଗଡ଼ା ଜିଲ୍ଲା ମୁନିଗୁଡ଼ା ବ୍ଲକ ମୁନିଖୋଲ ଠାରୁ ଆମ୍ବଧୁନୀ ପର୍ଯ୍ୟନ୍ତ ରାସ୍ତାର ଅବସ୍ଥା ଏପରି । ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ଏନ୍‌ବିସିସି ନାମକ ଏକ ଘରୋଇ ସଂସ୍ଥାକୁ ଏହି ରାସ୍ତା କାମ ଦିଆଯାଇଛି । ହେଲେ କାମ ଆରମ୍ଭର ଦୀର୍ଘ ବର୍ଷ ପରେ ବି କାମ ସମ୍ପୂର୍ଣ୍ଣ ହୋଇପାରୁନାହିଁ । 

ମୁନିଗୁଡ଼ା ନିୟମଗିରି ପାର୍ବତ୍ୟାଞ୍ଚଳରେ ବସବାସ କରନ୍ତି ଡଙ୍ଗରିଆ ଜନଜାତି । ୧୫ରୁ ଅଧିକ ଗାଁରେ ରହୁଥିବା ଡଙ୍ଗରିଆଙ୍କ ଗମନାଗମନର ସୁବିଧା ପାଇଁ ଏହି ରାସ୍ତା ନିର୍ମାଣ ହେଉଛି । ନିର୍ମାଣ ଆରମ୍ଭର ଦୀର୍ଘ ଦିନ ପରେ ବି କାମ ସରୁନାହିଁ । ତେଣୁ ଏହି କାମର ସିବିଆଇ ତଦନ୍ତ ଦାବି କରିଛନ୍ତି ବିଷମକଟକ ବିଧାୟକ । ଡଙ୍ଗରିଆ ଜନଜାତି ଜଙ୍ଗଲଯାତ ଦ୍ରବ୍ୟ ବିକ୍ରି ପାଇଁ ମୁନିଗୁଡ଼ା ବଜାର ଉପରେ ନିର୍ଭର କରନ୍ତି । ହେଲେ ପକ୍କା ରାସ୍ତାଟିଏ ନଥିବାରୁ ପ୍ରତିଦିନ ସମସ୍ୟାର ସମ୍ମୁଖୀନ ହେଉଛନ୍ତି । ତୁରନ୍ତ ପ୍ରଶାସନ ରାସ୍ତା କାମ ଶେଷ କରିବା ପାଇଁ ଦାବି ହୋଇଛି ।