ବଢୁଛି ଦୁବୃର୍ତ୍ତଙ୍କ ଆତଙ୍କରାଜ । ପଳାସପଲ୍ଲୀରେ ସମାଜସେବୀଙ୍କୁ ଆକ୍ରମଣ ,ଗୁରୁତର ଅବସ୍ଥାରେ ଏମ୍ସରେ ଭର୍ତ୍ତି

କନକବ୍ୟୁରୋ : ଭୁବନେଶ୍ବର ପଳାସପଲ୍ଲୀରେ ଯୁବକଙ୍କୁ ଗୋଡାଇ ଗୋଡାଇ ହାଣିଲେ ଦୁର୍ବୃତ୍ତ । ଯୁବକଙ୍କ ନାଁ ଶିବପ୍ରସାଦ ଶ୍ରୀଚନ୍ଦନ। ସେ ଘରକୁ ଫେରୁଥିବା ବେଳେ ତିନି ଜଣ ଦୁର୍ବୃତ୍ତ ଆକ୍ରମଣ କରିଥିବା ସୂଚନା ମିଳିଛି । ଯୁବକଙ୍କ କାନ୍ଧ, ହାତ ଓ ଜଙ୍ଘରେ ଆଘାତ ଲାଗିଛି ।

ତାଙ୍କୁ ଗୁରୁତର ଅବସ୍ଥାରେ ଏମ୍ସରେ ଭର୍ତ୍ତି କରାଯାଇଛି । ଘଟଣା ପରେ ବିଳମ୍ବିତ ରାତିରେ ଏମ୍ସରେ ପହଂଚିଥିଲେ ପୋଲିସ କମିଶନର ଏସ୍‌ ଦେବଦତ୍ତ ସିଂ । ଗୁରୁତରଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ଡାକ୍ତରଙ୍କ ସହ ଆଲୋଚନା କରିଛନ୍ତି । ତୁରନ୍ତ ଦୁର୍ବୃତ୍ତଙ୍କୁ ଧରିବା ପାଇଁ ଡିସିପିଙ୍କୁ ନିର୍ଦ୍ଦେଶ ଦେଇଛନ୍ତି । 

ଶିବପ୍ରସାଦଙ୍କ ଘର ପଳାସପଲ୍ଲୀ ଲେନ୍-୧୦ରେ। ସେ ଜଣେ ସମାଜସେବୀ। ଗତକାଲି ରାତିରେ ସେ ତାଙ୍କ ସ୍କୁଟିରେ ଘରକୁ ଫେରୁଥିଲେ। କିଛି ଦୁର୍ବୃତ୍ତଙ୍କ ତାଙ୍କୁ ବାଇକ୍‌ରେ ପିଛା କରିଥିଲେ। ଏହା ପରେ ଦୁର୍ବୃତ୍ତମାନେ ତାଙ୍କୁ ଅଟକାଇ ଆକ୍ରମଣ କରିଥିଲେ ।

ସେ ଜୀବନ ବଞ୍ଚାଇବାକୁ ଏଣେତେଣେ ଦୌଡ଼ିଥିଲେ ମଧ୍ୟ ଦୁର୍ବୃତ୍ତମାନେ ତାଙ୍କୁ ଗୋଡାଇ ଗୋଡାଇ ହାଣିଥିଲେ। ଶିବ ତଳେ ପଡ଼ିଗଲା ପରେ ଅଭିଯୁକ୍ତମାନେ ଘଟଣାସ୍ଥଳରୁ ଚମ୍ପଟ ମାରିଥିଲେ।