ଶିକ୍ଷାନୁଷ୍ଠାନ ଅଞ୍ଚଳରେ ମାଦକ ଦ୍ରବ୍ୟ ବିକ୍ରି ଅଭିଯୋଗ : ପାନ ଦୋକାନରୁ ବିପୁଳ ନିଶାଦ୍ରବ୍ୟ ଜବତ, ୪ ଅଟକ

କନକ ବ୍ୟୁରୋ : ଶିକ୍ଷାନୁଷ୍ଠାନ ଅଧୀନରେ ଗଞ୍ଜେଇ, ଡ୍ରଗ୍ସ ଭଳି ବିଭିନ୍ନ ମାଦକ ଦ୍ରବ୍ୟ ବିକ୍ରି ଅଭିଯୋଗରେ ଏସଟିଏଫର ଚଢ଼ାଉ । ଭୁବନେଶ୍ବର ଏୟାରଫିଲଡ ଥାନା ଅଞ୍ଚଳରେ ଅତର୍କିତ ଚଢ଼ାଉ କରିଛି ଏସଟିଏଫ ଟିମ୍ । ଓଡ଼ିଶାକୁ ନିଶା ମୁକ୍ତ କରିବା ଲକ୍ଷ୍ୟରେ ଗତ କିଛି ଦିନ ହେବ ଚାଲିଛି ଅପରେସନ । ଏହି ଆଧାରରେ ଏସଟିଏଫ ପକ୍ଷରୁ ଏୟାରଫିଲଡ ଥାନା ଅଞ୍ଚଳରେ ଥିବା ବିଭିନ୍ନ ପାନ ଦୋକାନ ଓ ସ୍ନାକ୍ସ ଦୋକାନରେ ଚଢ଼ାଉ କରି ବିପୁଳ ମାତ୍ରାରେ ମାଦକ ଦ୍ରବ୍ୟ ଜବତ କରାଯାଇଛି । ଏଥିରେ ୪ ଜଣଙ୍କୁ ଅଟକ ରଖାଯାଇଛି । 

ତେବେ ରାଜ୍ୟ ପୁଲିସ ନିଶା ମାଫିଆଙ୍କ ପାଇଁ ଚାପରେ ରହୁଛି । ଆଉ ଏହାରି ଭିତରେ ଆକ୍ସନ ମୋଡ଼କୁ ଆସିଛି STF । ଆରମ୍ଭ ହୋଇଛି ଅପରେସନ I କେମିତି ରହିଛି ସ୍କୁଲ କଲେଜ ନିକଟରେ ସ୍ପେଶାଲ ଟାସ୍କଫୋର୍ସର ଜିରୋ ଟଲେରାନ୍ସ ପଲିସି ? ନାକରେ ପାଣି ପିଇଲାଣି ପୁଲିସ । ଗଳିକନ୍ଦିରେ ବୁଲୁଛନ୍ତି ନିଶାଡ଼ି,ବେଧଡ଼କ ଚାଲିଛି ନିଶା କାରବାର । ଏ ସବୁକୁ ରୋକିବାରେ ଫେଲ୍ ମାରିଛି ପୁଲିସ, ଆକ୍ସନ ମୋଡ଼ରେ ସ୍ପେଶାଲ ଟାସ୍କ ଫୋର୍ସ । ସରିଛି ତାଲିକା, ଖୋଜା ଚାଲିଛି କେସ ହିଷ୍ଟ୍ରି । ଆନ୍ତଃରାଜ୍ୟ ନିଶା ମାଫିଆଙ୍କୁ ସାବାଡ଼ ପାଇଁ ପ୍ରସ୍ତୁତ ହୋଇଛି ତାଲିକା । ମିଶନ ଆଣ୍ଟି ଡ୍ରଗ୍ସ ଅପରେସନକୁ ବ୍ୟାପକ କରିଛି STF । କିଛି ଦିନ ତଳେ ସହର ଭିତରେ ଯୁବପିଢ଼ିଙ୍କ ଜୀବନ ସହ ଖେଳୁଥିବା କିଛି ଦୋକାନରେ ଛାପା ମାରିଥିଲା STF । ଆଉ ଏବେ ରାଜଧାନୀ ନୁହେଁ ବରଂ ସାରା ରାଜ୍ୟରେ ହେବ ଚଢ଼ାଉ । ଡିଜିପିଙ୍କ ନିର୍ଦ୍ଦେଶ କ୍ରମେ ବସ୍ତି, ଖଟି, ଆଡ୍ଡା ସ୍ଥଳୀରେ ଜଗିଛନ୍ତି ସାଦା ପୋଷାକଧାରୀ । ରାଜ୍ୟରେ ବଢ଼ିଚାଲିଥିବା ନିଶା କାରବାରରେ ରୋକ ଲଗାଇବା ପାଇଁ ଆସନ୍ତାକାଲି ଠାରୁ ସାରା ରାଜ୍ୟରେ ଚାଲିବ ମାରାଥନ ରେଡ୍ ।

ବଲିଉଡ ଷ୍ଟାର ସୁଶାନ୍ତ ସିଂ ରାଜପୁତଙ୍କ ସନ୍ଦେହଜନକ ମୃତ୍ୟୁ ସାରା ଦେଶରେ ହଲଚଲ ସୃଷ୍ଟି କରିଥିଲା । ଓଡ଼ିଶା ଗଞ୍ଜେଇର ଚାହିଦା କେମିତି ବଲିଉଡ଼ରେ ଛାଇ ଯାଇଥିଲା ତାହା ଦେଖିବାକୁ ମିଳିଥିଲା । ଆଉ ଏବେ ଓଡ଼ିଶାରେ ଥାଇଲ୍ୟାଣ୍ଡର ସିନ୍ଥେଟିକ୍ ଡ୍ରଗ୍ସ ଓ ମାରିଜୁଆନା ଓ କୋକେନ୍ ମୁଣ୍ଡବିନ୍ଧାର କାରଣ ପାଲଟିଛି । ନୋଡାଲ ଏଜେନ୍ସି ଭାବେ STF , ଏହାର ଓଡ଼ିଶା ଲିଙ୍କ୍ ଖୋଜିବା ଆରମ୍ଭ କରିଛି । ନିଶା ମାଫିଆଙ୍କୁ ଖୋଜିବାକୁ NCB, DRI ସହ ଲିଙ୍କରେ ରହିଛି STF । ସେପଟେ ଆନ୍ତଃରାଜ୍ୟ ମାଫିଆଙ୍କ ଯାତକ ଖୋଜିବା ପାଇଁ ଅନ୍ୟ ରାଜ୍ୟ STF ର ସାହାଯ୍ୟ ନିଆଯାଇଛି । ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଚାଲୁଥିବା ଆଣ୍ଟି ଡ୍ରଗ୍ସ ଅପରେସନ ୧୫ ଦିନ ତଳୁ ଚାଲୁଥିବା ବେଳେ ଆଗକୁ ଏହାକୁ ଆହୁରି ବ୍ୟାପକ କରାଯିବ । କିଛିଦିନ ତଳେ ରେକର୍ଡ ପରିମାଣର କଫସିରପ୍ ଜବତ କରି ମାଫିଆଙ୍କୁ ଘାଇଲା କରିଛି STF ।