ଫେଲ୍ ମାରିଛି ପାନୀୟ ଜଳ ପ୍ରକଳ୍ପ, କୋଟି କୋଟି ଖର୍ଚ୍ଚ ପରେ ବି ରାସ୍ତାରେ ଗଡୁଛି ଷ୍ଟାଣ୍ଡପୋଷ୍ଟ

କନକ ବ୍ୟୁରୋ: ପ୍ରତି ଘରେ ଘରେ ପାଣି ପହଞ୍ଚିବ । ଏହି ଉଦ୍ଦେଶ୍ୟ ରଖି ତିଆରି ହେଉଛି ପାନୀୟ ଜଳ ପ୍ରକଳ୍ପ । ନିଆଳି ବ୍ଲକ ପୁରୁଣାବେତେଣ୍ଡା କୋଠମୂଳ ଗାଁରେ ବସୁଧା ଯୋଜନାରେ ଏହି ପ୍ରକଳ୍ପ ନିର୍ମାଣ ହେଉଛି। ଏଥିପାଇଁ କୋଟିଏ ଟଙ୍କା ଖର୍ଚ୍ଚରେ ପାଣିଟାଙ୍କି ବସିଛି । କେଉଁଠି ପାଇପ୍‌ ପଡ଼ିଛି ତ କେଉଁଠି ପଡ଼ିନି । ଷ୍ଟାଣ୍ଡପୋଷ୍ଟ ଉପରେ ଅନାବନା ଗଛ ମାଡ଼ିଗଲାଣି । ଆଉ କେଉଁଠି ଷ୍ଟାଣ୍ଡପୋଷ୍ଟ ଭାଙ୍ଗି ରାସ୍ତାରେ ଗଡ଼ୁଛି । ଫଳରେ ଟାଙ୍କି ନିର୍ମାଣର ୩ ବର୍ଷ ପରେ ବି ଲୋକେ ମୁନ୍ଦେ ବିଶୁଦ୍ଧ ପାଣି ପାଇପାରିନାହାଁନ୍ତି । 

ଏହି ଟାଙ୍କି ଉପରେ ପାଖାପାଖି ୫ଟି ଗାଁର ଲୋକ ନିର୍ଭର କରନ୍ତି । ଗାଁରେ ଦୀର୍ଘବର୍ଷ ଧରି ଆଇରନ ପାଣି ବାହାରୁଥିବାରୁ ବସୁଧା ଯୋଜନାରେ ଟାଙ୍କି ନିର୍ମାଣ କରାଯାଉଥିଲା । ହେଲେ ଠିକାଦାରଙ୍କ ମନମୁଖୀ କାର୍ଯ୍ୟ ପାଇଁ ଲୋକେ ଏବେ ବି ଆଇରନ ମିଶା ପାଣି ବ୍ୟବହାର କରୁଛନ୍ତି । ଘଟଣାର ଭିଜିଲାନ୍ସ ତଦନ୍ତ କଲେ ସତ ପଦାକୁ ଆସିବ ବୋଲି କହିଛନ୍ତି ଗ୍ରାମବାସୀ ।

ସବୁଠୁ ଆଶ୍ଚର୍ଯ୍ୟଜନକ କଥା ହେଉଛି, ସୂଚନା ଫଳକରେ ଗୋଟିଏ ପଞ୍ଚାୟତ ନାଁ ଲେଖାଯାଇଛି ଆଉ ଟାଙ୍କି ବସିଛି ଆଉ ଏକ ପଞ୍ଚାୟତରେ । ବିଭାଗୀୟ ଅଧିକାରୀ କହୁଛନ୍ତି, ଭୁଲରେ ଲେଖାଯାଇଛି। କେବେ ଲୋକ ବିଶୁଦ୍ଧ ପାଣି ପାଇବେ ତାକୁ ଅପେକ୍ଷା ।