ହସ୍ପିଟାଲରେ ଡାକ୍ତରଙ୍କୁ ଛୁରାମାଡ : ଅଭିଯୁକ୍ତ ଯୁବକ ଗିରଫ

କନକ ବ୍ୟୁରୋ: ଚେନ୍ନାଇର ସରକାରୀ ହସ୍ପିଟାଲର ଜଣେ ଡାକ୍ତରଙ୍କୁ ରୋଗୀଙ୍କ ପୁଅର ଛୁରାମାଡ଼ କରିଛି । ଆକ୍ରମଣରେ ଡାକ୍ତର ବାଲାଜୀ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଅଭିଯୁକ୍ତ ଚେନ୍ନାଇ ବାସିନ୍ଦା ବିଘ୍ନେଶଙ୍କୁ ଗିରଫ କରାଯାଇଛି । 

ସୂଚନା ଅନୁସାରେ, ଅଭିଯୁକ୍ତଙ୍କ ମା’ ଜଣେ କର୍କଟ ରୋଗୀ । ପୂର୍ବରୁ ସେ ଏହି ଡାକ୍ତରଖାନାରେ ଭର୍ତ୍ତି ହୋଇଥିବା ବେଳେ ବର୍ତ୍ତମାନ ସେ ଅନ୍ୟ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଘରୋଇ ଡାକ୍ତରଖାନାର ଡାକ୍ତରମାନେ ତାଙ୍କୁ ଭୁଲ୍ ସୂଚନା ଦେଇ ବିଭ୍ରାନ୍ତ କରିଥିବା ଘଟଣାକୁ ନେଇ ସେ ଅତିଷ୍ଠ ହୋଇପଡିଥିଲେ । ଏହି ଘଟଣାକୁ ନେଇ ବିଘ୍ନେଶ କଲାଇନାର ଶତବାର୍ଷିକୀ ହସ୍ପିଟାଲର କର୍କଟ ୱାର୍ଡକୁ ଯାଇ ଡାକ୍ତର ବାଲାଜୀଙ୍କୁ ଛୁରୀରେ ଆକ୍ରମଣ କରିଥିଲେ । 

ଆକ୍ରମଣ ପରେ ବିଘ୍ନେଶ ଖସିଯିବାକୁ ଚେଷ୍ଟା କରିଥିଲେ ମଧ୍ୟ ତାଙ୍କୁ ଗିରଫ କରି ପୁଲିସକୁ ହସ୍ତାନ୍ତର କରାଯାଇଛି । ତାମିଲନାଡୁ ମୁଖ୍ୟମନ୍ତ୍ରୀ ଏମ୍‌କେ ଷ୍ଟାଲିନ ଆହତ ଡାକ୍ତରଙ୍କୁ ଆବଶ୍ୟକ ଚିକିତ୍ସା ସହ ଘଟଣାର ବିସ୍ତୃତ ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି । ସେପଟେ ଡାକ୍ତରଙ୍କ ଉପରେ ଆକ୍ରମଣରେ ନିଷ୍କ୍ରିୟତା ଅଭିଯୋଗ ଆଣି ଡିଏମକେ ସରକାରଙ୍କୁ ସମାଲୋଚନା କରିଛନ୍ତି ରାଜ୍ୟ ବିଜେପି ମୁଖ୍ୟ କେ ଆନ୍ନାମଲାଇ । ଡାକ୍ତର, ନର୍ସ ଓ ହସ୍ପିଟାଲ କର୍ମଚାରୀଙ୍କୁ ଅନେକ ଥର ଆକ୍ରମଣ କରାଯାଇଥିଲେ ମଧ୍ୟ ଡିଏମକେ ସରକାର କୌଣସି କାର୍ୟ୍ୟାନୁଷ୍ଠାନ ଗ୍ରହଣ କରିନାହାନ୍ତି। ପ୍ରତିଥର ଏଭଳି ଅପ୍ରୀତିକର ଘଟଣା ଘଟିଲେ ଆଇନଶୃଙ୍ଖଳା ନିୟନ୍ତ୍ରଣରେ ଥିବା ମୁଖ୍ୟମନ୍ତ୍ରୀ କହନ୍ତି, ସରକାର କାର୍ଯ୍ୟାନୁଷ୍ଠାନ ନେବେ, କିନ୍ତୁ କିଛି କରନ୍ତି ନାହିଁ ବୋଲି ସେ ଅଭିଯୋଗ କରିଛନ୍ତି।